'ಗೀಚಣಿಕೆ' - 'ಗೀಚಕ'ನ ಅಭಿವ್ಯಕ್ತಿ

ಜಪಾನಿನಾನುಭವ - ೨ : ಒದಾವರದ ಕೋಟೆಗೆ ಹೋದಾಗ...

2012-01-05T18:16:00.007+05:30

ಆ ದಿನ ನಾನು ಒದಾವರದ ಕೋಟೆಯನ್ನು ನೋಡಿಕೊಂಡು ಇನ್ನೇನು ಹೊರಡಬೇಕೆನ್ನುವಷ್ಟರಲ್ಲಿ ಕೋಟೆಯ ಸ್ಥಳದಿಂದ ಸ್ವಲ್ಪ ಕೆಳಗೆ ಹೋದರೆ ಜಪಾನಿನ ಶಿಂಟೊ ಜನಾಂಗದವರ ದೇವಸ್ಥಾನ (ಶ್ರೈನ್) ಇತ್ತು. ಇಲ್ಲಿಯ ಕ್ರೈಸ್ತೇತರ ಧಾರ್ಮಿಕ ಸ್ಥಳಗಳು ಹೇಗಿರುತ್ತೆ ಅಂತ ನೋಡುವ ಕುತೂಹಲ ಇತ್ತು. ಅದನ್ನು ಒಮ್ಮೆ ನೋಡಣ ಅಂತ ಹೊರಟೆ. ಶ್ರೈನ್ ನ ಮುಂದೆ ಹೋಗಿ ನಿಂತಾಗ ಯಾರೂ ಹೋಗುತ್ತಿದ್ದ ಹಾಗೆ ಅನ್ನಿಸಲಿಲ್ಲ. ನಿರ್ಜನ ಅಂತ ಅನ್ನಿಸಿತು. ವಾಪಸ್ ಹೊರಡುವ ಅನ್ನುವಷ್ಟರಲ್ಲಿ ದೇವಸ್ಥಾನದ ಒಳಕ್ಕೆ ಯಾರೋ ಹೋಗುತ್ತಿರುವ ಹಾಗೆ ಅನ್ನಿಸಿತು. ಅದೂ ವಿಶೇಷ ಬಾಗಿಲಿನಿಂದ. ಆ ವಿಶೇಷ ಬಾಗಿಲಿನ ಪ್ರವೇಶವನ್ನು ಹುಡುಕುತ್ತ ಹೊರಟಾಗ, ಮಂದಿರದ ಎಡಭಾಗಕ್ಕೆ ಇದ್ದ ಒಂದು ಕಟ್ಟಡದಿಂದ ಮಂದಿರಕ್ಕೆ ವಿಶೇಷ 'ಫ್ಲೈ ಓವರ್ 'ನ ಮೂಲಕ ಶ್ರೈನ್ ನ ಒಳಭಾಗಕ್ಕೆ ಹೋಗಲು ಇದ್ದ ದಾರಿ ಕಾಣಿಸಿತು.

ಆ ಕಟ್ಟಡಕ್ಕೆ ಪ್ರವೇಶಿಸಿದರೆ ಪೂರ್ಣ ಶ್ವೇತವಸ್ತ್ರಧಾರಿಗಳಾದ ಕೆಲವರು ಅಲ್ಲಿಂದಿಲ್ಲಿಗೆ ಇಲ್ಲಿಂದಲ್ಲಿಗೆ ಓಡಾಡುತ್ತಿದ್ದರು. ನಾನು ಅಲ್ಲಿದ್ದವರಲ್ಲೊಬ್ಬರಿಗೆ ಒಳಗೆ ಹೋಗಲು ಅವಕಾಶ ಕೇಳಿದೆ. ಇಂಗ್ಲಿಶ್ ಬರದ ಅವರು, ಜಪಾನೀಸ್ ಬರದ ನಾನು, ಭಾಷೆಯ ಸಮಸ್ಯೆಯಾಯಿತು. ಹೇಗೆ ಅರ್ಥ ಮಾಡಿಸುವುದು ಎಂದು ಕಷ್ಟ ಪಡುತ್ತಿರುವಾಗಲೇ ಒಬ್ಬಳು ಹುಡುಗಿ ಬಂದಳು. ನಮ್ಮ ಸಂಭಾಷಣೆಯನ್ನು ನೋಡಿ ಅವಳಿಗೆ ಅರಿವಾಗಿರಬೇಕು, ತಕ್ಷಣ ಬಂದು 'ನನಗೆ ಇಂಗ್ಲಿಷ್ ಸ್ವಲ್ಪ ಸ್ವಲ್ಪ ಬರುತ್ತೆ' ಅಂತ ಹೇಳಿ ಸಹಾಯಕ್ಕೆ ಬಂದಳು.

ನಾನು ಭಾರತದಿಂದ ಬಂದಿದ್ದೇನೆ, ನನ್ನ ಕಂಪನಿಯಿಂದ ೨ ತಿಂಗಳಿಗೆ ಇಲ್ಲಿಗೆ ಬಂದಿದ್ದೇನೆ, ಇಲ್ಲಿನ ದೇವಸ್ಥಾನವನ್ನ ನೋಡಬೇಕೆಂದು ಬಂದಿದ್ದೇನೆ ಎಂಬ ವಿವರಗಳನ್ನು ಕೊಟ್ಟೆ. ಅವಳೂ ಸಹ ಅವರಿಗೆ ತಿಳಿಸಿದಳು. 'ನೀವು ನಮ್ಮ ದೇವರನ್ನು ನಂಬುತ್ತೀರ? ನೀವು ನಮ್ಮ ದೇವರನ್ನು ಪೂಜಿಸಲು ಇಷ್ಟ ಪಡುತ್ತೀರ?' ಎಂಬ ಅವರ ಕೆಲವು ಪ್ರಶ್ನೆಗಳಿಗೆ ಸಕಾರಾತ್ಮಕವಾಗಿ ಉತ್ತರ ಕೊಟ್ಟ ನಂತರವೇ ನನ್ನನ್ನು ಒಳಗೆ ಬಿಟ್ಟಿದ್ದು.

ಒಳಗೆ ಹೋಗಿ ನೋಡಿದಾಗ ತಕ್ಷಣ ನನಗನ್ನಿಸಿದ್ದು ನಮ್ಮ ಕೆಲವು ಹಿಂದೂ ಪೂಜಾ ಪದ್ದತಿಗಳ ಜೊತೆಗಿನ ಸಾಮ್ಯತೆ. ಕೆಲವು ಅಲಂಕಾರಗಳು, ನೆವೈದ್ಯ, ಕಾಣಿಕೆ, ಪ್ರಸಾದ ಹಂಚಿಕೆಯ ತರಹ ಅವರಲ್ಲೂ ಕೆಲ ಪದ್ದತಿಗಳು ಇರುವುದನ್ನು ಕೇಳಿ ಆಶ್ಚರ್ಯವಾಯಿತು. ಜೊತೆಗೆ ನಮ್ಮ ಹಿಂದೂ ಧರ್ಮದ ಪ್ರಭಾವ ಎಲ್ಲಿಲ್ಲಿದೆ ಎಂಬುದನ್ನು ನೋಡಿ ಹೆಮ್ಮೆಯಾಯಿತು ಸಹ. ನಾನು ನಮ್ಮ ಹಿಂದೂ ಪದ್ದತಿಗಳಲ್ಲೂ ಹೀಗೆ ಇದೆ ಎಂದು ಕೆಲವು ಉದಾಹರಣೆಗಳನ್ನು ನೀಡಿದೆ. ನಂತರ ನಾವು ಪ್ರಾರ್ಥನೆಯನ್ನು ಹೇಗೆ ಮಾಡ್ತೇವೆ ಎಂದು ಕೆಲವು ಸಂಸ್ಕೃತ ಶ್ಲೋಕಗಳನ್ನು ಹೇಳಿ ತೋರಿಸಿದೆ. ಆಶ್ಚರ್ಯದಿಂದ ಕೇಳಿದ ಅವರು ನಾನು ಹೇಳಿದ ಶ್ಲೋಕದ ಅರ್ಥ ಹಾಗೂ ಸಂಸ್ಕೃತ ಭಾಷೆಯ ಬಗ್ಗೆ ಕೇಳಿದರು. ನಂತರ ನಮ್ಮ ಹಿಂದೂ ಪದ್ದತಿಯ ಪ್ರಕಾರವೇ ನಮಸ್ಕರಿಸಿ, ಎಲ್ಲರಿಗು ನನ್ನ ಧನ್ಯವಾದಗಳನ್ನು ಅರ್ಪಿಸಿ ನಾನು ಹೊರಬಂದೆ.

ನಮಗೆ ಸಹಾಯ ಮಾಡಿದ 'ದುಭಾಷಿ'ಯನ್ನು ವಿಚಾರಿಸಿದಾಗ ಅವಳು ಆಸ್ಟ್ರೇಲಿಯಾ ದಲ್ಲಿ ೨ ವರ್ಷಗಳ ಕಾಲ ಓದಿದ ಕಾರಣಕ್ಕೆ ಇಂಗ್ಲಿಷ್ ಭಾಷೆಯ ಪರಿಚಯವಾಗಿದ್ದು ತಿಳಿದುಬಂತು. ಅವಳಿಗೂ ನಾನು ಥ್ಯಾಂಕ್ಸ್ ಹೇಳಿದೆ.

ಬರೇ ಬುಲೆಟ್ ಟ್ರೈನಿನ ಅನುಭವಕ್ಕೊಸ್ಕರ ಒದಾವರದ ಕೋಟೆ ನೋಡಬೇಕೆಂದು ಬಂದು ಒಂದು ವಿಶೇಷ ಅನುಭವಕ್ಕೆ ಪಾತ್ರನಾದೆನಲ್ಲ ಎಂದು ಖುಷಿಯಾಗುತ್ತಿತ್ತು. ನಿಜ ಹೇಳಬೇಕೆಂದರೆ ಕೋಟೆ ನೋಡಿದ್ದಕಿಂತ ಶ್ರೈನ್ ನೋಡಿದ, ಅಲ್ಲಾದಂತಹ ಅನುಭವ ಮರೆಯಲಾರದ್ದು.

ಚಕ್ರವರ್ತಿಯವರ 'ಜಾಗೋ ಭಾರತ್' : ಅತ್ಯಂತ ಪ್ರೇರಣಾದಾಯಿ ಕಾರ್ಯಕ್ರಮ

2011-12-26T23:44:00.009+05:30

ಮೊನ್ನೆ ೨೫ರ ಸಂಜೆ ಗಿರಿನಗರದ ಶ್ರೀ ರಾಮಕೃಷ್ಣ ವಿಶ್ವಭಾವೈಕ್ಯ ಮಂದಿರದ ಆವರಣದಲ್ಲಿ, ರಾಮಕೃಷ್ಣ ಸೇವಾ ಟ್ರಸ್ಟ್ ಸಹಯೋಗದಲ್ಲಿ, ಯೋಗಶ್ರಿ ಸಂಸ್ಥೆ ಆಯೋಜಿಸಿದ್ದ, ೨೪೩ ನೆಯ 'ಜಾಗೋ ಭಾರತ್' ಕಾರ್ಯಕ್ರಮ, ನೆರೆದಿದ್ದ ಭಾರಿ ಜನಸ್ತೋಮ, ಮೈ-ಮನ 'ದೈಶಿಕ ಭಾವಮಯ'ವಾಗುವ ವಾತಾವರಣ, ಚಕ್ರವರ್ತಿ ಸೂಲಿಬೆಲೆಯವರ ಪ್ರೇರಣಾದಾಯಿ ಮಾತುಗಳು, ಅನುಭವಗಳು ಎಂಥವರಲ್ಲೂ 'ದೇಶಭಕ್ತಿ'ಯನ್ನು ಜಾಗೃತಗೊಳಿಸುವಂತಿತ್ತು. ಮಧ್ಯೆ ಮಧ್ಯೆ ದೇಶಭಕ್ತಿ ಗೀತೆಗಳ ಗಾಯನ ವಾತಾವರಣದ ಪಾವಿತ್ರ್ಯವನ್ನು ಹೆಚಿಸುತ್ತಿದ್ದವು.

ಬಹಳ ದಿನಗಳಿಂದ ಚಕ್ರವರ್ತಿಯವರ 'ಜಾಗೋ ಭಾರತ್' ಕಾರ್ಯಕ್ರಮ ವನ್ನು ವೀಕ್ಷಿಸಲೇಬೇಕು ಎಂದು ಕಾಯುತ್ತಿದ್ದೆ. ಕೊನೆಗೂ ಮೊನ್ನೆ ಆ ಅವಕಾಶ ಸಿಕ್ಕಿತು. ಸ್ಥಳ ಹುಡುಕಿಕೊಂಡು ಹೋಗಿ ಕಾರ್ಯಕ್ರಮದಲ್ಲಿ ಕೂತವನೇ ಕೊನೆಯಲ್ಲಿ ವಂದೇಮಾತರಂ ಮುಗಿಯುವವರೆಗೂ ಪ್ರಯತ್ನಪಟ್ಟರೂ ಮೇಲೆ ಏಳಲು ಸಾಧ್ಯವಾಗಲೇ ಇಲ್ಲ. ಆ ನಡುಗುವ ಚಳಿಯಲ್ಲೂ ಕೂತಿದ್ದ ಹೆಂಗಸರು ಮಕ್ಕಳನ್ನು ನೋಡಿ ನನಗೆ ನಾನೇ ಹಾಸ್ಯ ಮಾಡಿಕೊಂಡು ಕಾರ್ಯಕ್ರಮ ಮುಗಿಸಿಕೊಂಡೇ ತೆರಳಿದ್ದು.

ಕಾರ್ಯಕ್ರಮದ ವಾತಾವರಣ ಹೇಗಿತ್ತು ಅಂದ್ರೆ ಸಿಖ್ಖ್ ಪಂಥ ಪ್ರಾರಂಭವಾದ ಆ ದಿನ ವನ್ನು ನೆನಪಿಸುವಂತಿತ್ತು. ಆ ಸಂದರ್ಭದಲ್ಲಿ ಸೂಲಿಬೆಲೆ ಯವರೆನಾದರೂ 'ದೇಶಕ್ಕಾಗಿ ಯಾರು ಪ್ರಾಣ ಕೊಡಲು ತಯಾರಿದೀರ?' ಅಂತ ಏನಾದರು ಕೇಳಿದ್ದರೆ ಬಹುತೇಕ ಎಲ್ಲರು 'ನಾ ರೆಡಿ ' ಎಂದು ಏಳುತ್ತಿದ್ದರು. ಆ ತರಹದಲ್ಲಿ ಸ್ವದೇಶದ ಬಗೆಗಿನ ಅಭಿಮಾನವನ್ನ ತಟ್ಟಿ ಎಬ್ಬಿಸಿದಂತಿತ್ತು. ಹೆಸರಿಗೆ ತಕ್ಕಂತೆ 'ಭಾರತವನ್ನ ಜಾಗೃತ'ಗೊಳಿಸು ವಂತಿತ್ತು. 'ಜಾಗೋ ಭಾರತ್ 'ಕಾರ್ಯಕ್ರಮಕ್ಕೆ ತಾವೇನಾದರೂ ಮಾಡಬೇಕೆಂದು ಬಂದಿದ್ದ ವೇದಿಕೆಯ ಮೇಲಿದ್ದ ವರನ್ನ ಪರಿಚಯ ಮಾಡಿಸಿದಾಗ ಎಂಥವರಲ್ಲೂ 'ತಾವೂ ಸಹ ಏನಾದರು ಮಾಡಬೇಕು' ಎಂದೆನಿಸದೇ ಇರಲು ಸಾಧ್ಯವೇ ಇಲ್ಲ.

ಚಕ್ರವರ್ತಿಯವರ ೨೪೩ ನೆಯ 'ಜಾಗೋ ಭಾರತ್' ಕಾರ್ಯಕ್ರಮವಾದ್ದರಿಂದ ಅವರ ಹಿಂದಿನ ಅನುಭವಗಳು ಎಂಥವರ ಕಣ್ಣಲ್ಲೂ ಕಂಬನಿ ಬರಿಸದೆ ಇರಲಿಲ್ಲ. ಅವಾಗವಾಗ ಅವರು ಹಾರಿಸುತ್ತಿದ್ದ ನಗೆ ಚಟಾಕಿಗಳು ಸಹ ಎಲ್ಲರನ್ನು ನಗಿಸಿತ್ತು. ಅವರು ಹೇಳಿದ ಒಂದು ಘಟನೆ.

ಮದುವೆ ನಿಶ್ಚಯವಾದ ಒಬ್ಬಳು ಹುಡುಗಿ ಚಕ್ರವರ್ತಿಯವರನ್ನು ತನ್ನ ಮದುವೆಯ ಸಂದರ್ಭದ ಆರತಕ್ಷತೆಗೆ 'ಜಾಗೋ ಭಾರತ್' ಕಾರ್ಯಕ್ರಮ ವನ್ನು ನಡೆಸಿಕೊಡಲು ಕೇಳಿಕೊಳ್ಳುತ್ತಾಳೆ. ಎಷ್ಟು ಬೇಡವೆಂದರೂ ಕೇಳದೆ ಹಠ ಹಿಡಿಯುತ್ತಾಳೆ. ಕಾರ್ಯಕ್ರಮ ಮುಗಿದ ನಂತರ ಚಕ್ರವರ್ತಿಯವರ ಹತ್ತಿರ ಬಂದು ತನ್ನ ಮಕ್ಕಳನ್ನು ದೇಶದ ಕೆಲಸಕ್ಕಾಗಿ ಕಳಿಸಿಕೊಡ್ತೇನೆ ಅಂತ ಹೇಳುವಷ್ಟರ ಮಟ್ಟಿಗೆ ಪ್ರೇರಣೆ ಪಡೆದಿರುತ್ತಾಳೆ. ಇಂತಹ ಎಷ್ಟೋ ಘಟನೆಗಳ ಸರಮಾಲೆಯನ್ನೇ ನಮ್ಮ ಮುಂದಿರಿಸಿದ ಕಾರ್ಯಕ್ರಮ ನಿಜವಾಗಲು ಅತ್ಯಂತ ಪ್ರೇರಣಾದಾಯಿಯಾಗಿತ್ತು. ತಕ್ಷಣ ಮನೆಗೆ ಬಂದು ಮುಂದಿನ ಜಾಗೋ ಭಾರತ್ ಕಾರ್ಯಕ್ರಮ ಯಾವಾಗ ಎಂದು

ತಪತಪಿಸುವ ಮಟ್ಟಿಗೆ ಪ್ರಭಾವಿಯಾಗಿತ್ತು ಎಂದು ಹೇಳಲು ಹೆಮ್ಮೆಯಾಗುತ್ತದೆ.

ಕಾರ್ಯಕ್ರಮದ ಕೊನೆಯಲ್ಲಿ ಸೂಲಿಬೆಲೆಯವರು ಎಲ್ಲರಿಗು ಪ್ರಾರ್ಥನೆ ಮಾಡಿದ್ದು ಏನು ಗೊತ್ತ? 'ದಯವಿಟ್ಟು ಇನ್ನಾದರು ನಮ್ಮ ಭಾರತವನ್ನ ಬೈಯುವುದನ್ನ ನಿಲ್ಲಿಸಿ' ಅಂತ.

ಖಂಡಿತ ಎಲ್ಲರು ಹಾಗು ಎಲ್ಲವಾಗಲೂ ಕೇಳಬೇಕಾದ, ನೋಡಬೇಕಾದ ಕಾರ್ಯಕ್ರಮ 'ಜಾಗೋ ಭಾರತ್'. ನಮ್ಮ ದೇಶದ ಹಿರಿಮೆಗಳೇನು ಎಂದು ತಿಳಿದುಕೊಳ್ಳಲು, ಭಾರತವನ್ನು ಪ್ರೀತಿಸಲು, 'ಭಾರತೀಯ'ನಾಗಲು ಹೆಮ್ಮೆಪಡಲು ಏನಿದೆ ಏನು ತಿಳಿದುಕೊಳ್ಳಲು ಯಾರಾದರು 'ಕಷ್ಟ' ಪಡುತ್ತಿದ್ದರೆ ದಯವಿಟ್ಟು ತಪ್ಪಿಸಿಕೊಳ್ಳಬೇಡಿ, 'ಜಾಗೋ ಭಾರತ್'.

ಆರೆಸ್ಸೆಸ್ ಮತ್ತು ಭಾಜಪದ ಸಂಬಂಧ: ಸಜ್ಜನ ಹಿಂದೂಸಮಾಜದ ಕಳಕಳಿ

2011-12-09T16:06:00.008+05:30

ಕೆಲ ದಿನಗಳ ಹಿಂದೆ ಮತ್ತೊಂದು ಹೊಸ 'ಆರೋಪ ಸುದ್ದಿ' ಚಾಲ್ತಿಗೆ ಬಂದಿತ್ತು. ಅದು ಯಡಿಯೂರಪ್ಪನವರು 'ಹೊಸ ದಿಗಂತ' ಎಂಬ ದಿನಪತ್ರಿಕೆಗೆ ನೀಡಿದ ಅಪಾರ ಕೊಡುಗೆಗಳ ಬಗ್ಗೆ. ಯಡ್ಡಿಯವರು ಆರೆಸ್ಸೆಸ್ ನ ಜೊತೆ ಗುರುತಿಸಿಕೊಂಡಿರುವ ಒಂದೇ ಕಾರಣಕ್ಕೆ, ಇದನ್ನೇ ಆಧಾರವಾಗಿಟ್ಟುಕೊಂಡು ಸಂಘಪರಿವಾರದ ವಿರುದ್ಧ ಮಾತಾಡಲು, ಬರೆಯಲು, ಸುದ್ಧಿ ಹಬ್ಬಿಸಲು, ಆ ಮೂಲಕ 'ಹೆಸರುವಾಸಿ'ಯಾಗಲು, ಪ್ರಶಸ್ತಿ -ಅನುದಾನಗಳನ್ನು 'ಸಂಪಾದಿಸಲು' ದೇಶದಲ್ಲಿ ಬಹಳ ದೊಡ್ಡ ದೊಡ್ಡ 'ಸಂಘಟನೆ'ಗಳೇ ಇವೆ. ಅವಕ್ಕೇನು ಕೊರತೆಯಿಲ್ಲ. ಇವುಗಳ ಹಿಂದಿನ ಹೇಸಿಗೆ ರಾಜಕಾರಣ ಎಲ್ಲರಿಗು ಗೊತ್ತಿರುವಂಥದ್ದೇ.

ಆದರೆ ಯಡಿಯೂರಪ್ಪ ಅಧಿಕಾರಕ್ಕೆ ಬಂದಾಗಲೇ 'ಹೊಸ ದಿಗಂತ ' ಪತ್ರಿಕೆ ತನ್ನ ಅಸ್ತಿತ್ವವನ್ನು ಉಳಿಸಿಕೊಳ್ಳಲು ಸಾಧ್ಯವಾದದ್ದು ಎಂಬುದು ನಿಜವಾಗಿರಬಹುದು. ಯಡಿಯೂರಪ್ಪನವರು ಜೈಲಿನಿಂದ ಬಿಡುಗಡೆಯಾದ ಮರುದಿನದ 'ಹೊಸದಿಗಂತ' ಪತ್ರಿಕೆಯ ಮುಖಪುಟದ ಶೀರ್ಷಿಕೆ ಕೂಡ ಇದಕ್ಕೆ ಪುಷ್ಟಿ ನೀಡುವಂತಿರಬಹುದು. ಹಾಗು ಅದೇ ಯಡಿಯೂರಪ್ಪಾಧಿಕಾರದ ಸಮಯದಲ್ಲೇ ಆರೆಸ್ಸೆಸ್ಸಿನ ಜತೆ ಗುರುತಿಸಿಕೊಂಡವರು ಕೆಲವರು 'ತಮ್ಮ ಆರೆಸ್ಸೆಸ್ ತನವನ್ನು' ಬಳಸಿ ಭಾಜಪದ ಅಧಿಕಾರವನ್ನು ದುರ್ಬಳಕೆ ಮಾಡಿಕೊಂಡಿರುವುದಕ್ಕೆ ಆರೆಸ್ಸೆಸ್ ಗೆ ಮುಜುಗರವಾಗಿರುವುದು ಸತ್ಯವಾದರೂ ಅದಕ್ಕೆ ಆರೆಸ್ಸಸ್ಸನ್ನು ಹೊಣೆಯಾಗಿಸಲು ಸಾಧ್ಯವಿಲ್ಲ. ಅದು ಪರಮ ಮೂರ್ಖತನವಾದೀತು. ಆದರೆ ಪಂಚಾಯಿತಿ ಮಟ್ಟದ ಅಥವಾ ತಾಲ್ಲೂಕು ಮಟ್ಟದಲ್ಲೇ ತಮ್ಮ 'ಭ್ರಷ್ಟತೆಯನ್ನು ಸಾಬೀತು' ಪಡಿಸುವವರಿಗೆ ಜಿಲ್ಲಾಮಟ್ಟಕ್ಕೆ, ರಾಜ್ಯಮಟ್ಟಕ್ಕೆ ಹೋಗುವ ಅವಕಾಶವನ್ನು ನೀಡದಿರುವಲ್ಲಿ ಆರೆಸ್ಸೆಸ್ ಪ್ರಮುಖ ಪಾತ್ರ ವಹಿಸಬೇಕಾದ ಅವಶ್ಯಕತೆ ಈ ದೇಶದ ಸಜ್ಜನ ಹಿಂದೂ ಸಮಾಜದ ಅವಶ್ಯಕತೆಯೇ ಆಗಿದೆ.

ಆರೆಸ್ಸೆಸ್ ಮಾಡುತ್ತಿರುವ ಸೇವಾ ಕೆಲಸಗಳು, ಹಿಂದೂ ಸಂಘಟನೆ ಹಾಗು ಅದಕ್ಕೆ ಪೂರಕವಾದ ಎಲ್ಲ ಕೆಲಸಗಳು ಖಂಡಿತ ಈ ದೇಶಕ್ಕೆ ಅವಶ್ಯ, ಅನಿವಾರ್ಯ. ಈ ವಿಷಯವನ್ನು ಸಾಕಷ್ಟು ಕಾಂಗ್ರೆಸ್ಸಿಗರೂ ವೈಯಕ್ತಿಕವಾಗಿ ಒಪ್ಪುತ್ತಾರೆ. ಅಷ್ಟೇ ಅಲ್ಲ ರಹಸ್ಯವಾಗಿ ಪ್ರೋತ್ಸಾಹಿಸುತ್ತಾರೆ ಕೂಡ. ಆದರೆ ಕಾಂಗ್ರೆಸ್ಸಿನಲ್ಲಿನ 'ಅಸ್ತಿತ್ವದ' ಪ್ರಶ್ನೆಯ ಕಾರಣಕ್ಕೆ ಅದನ್ನು ಸಾರ್ವಜನಿಕವಾಗಿ ತೋರಿಸಿಕೊಳ್ಳುವುದಿಲ್ಲವಷ್ಟೇ. ಅವರ ಅಸಹಾಯಕತೆ ನಮಗೆ ಅರ್ಥವಾಗುತ್ತದೆ. ಪಾಪ..!

ಆದರೆ ಆರೆಸ್ಸೆಸ್ 'ಮಾಡದಿರುವ' ಕೆಲಸದ ಹಾಗು ಅದರ ಪರಿಣಾಮಗಳ ಬಗ್ಗೆ ಸಮಾಜದ ಹಲವರಲ್ಲಿ ವ್ಯಕ್ತವಾಗಿರುವ ಅಭಿಪ್ರಾಯಗಳು ಆರೆಸ್ಸೆಸ್ಸಿನ ನಿಷ್ಠಾವಂತ ಕಾರ್ಯಕರ್ತರಲ್ಲೇ ಚಿಂತೆಗೆ ಕಾರಣವಾಗಿರುವುದು ನಿಜ. ತಮ್ಮ ಮನೆಯ ಮಕ್ಕಳ ತಪ್ಪಿಗೆ ತಾವೇ ಮೊದಲು ದಂಡಿಸಬೇಕೆ ಹೊರತು ಬೇರೆಯವರು ದಂಡಿಸಲು ಅವಕಾಶ ಕೊಡಬಾರದು ಎಂಬುದು ಆರೆಸ್ಸೆಸ್ಸಿನಲ್ಲೇ ಆಡುವ ಮಾತು. ಅದೇ ತರಹದಲ್ಲಿ ಆರೆಸ್ಸೆಸ್ಸಿನ ಕಾರ್ಯಕರ್ತರಾದ ಕಾರಣಕ್ಕೆ, ಕೆಲ ತಿಂಗಳುಗಳ ಕಾಲ ಪೂರ್ಣಾವಧಿ ಕಾರ್ಯಕರ್ತರಾದ ಕಾರಣಕ್ಕೆ, ಭಾಜಪದಲ್ಲಿ ಸೀಟು ಗಿಟ್ಟಿಸಿಕೊಂಡವರು, 'ಸ್ವಯಂಸೇವಕನು' ಮಾಡಬಾರದ್ದನ್ನು ಮಾಡುತ್ತಿದ್ದರೂ ಸಂಘದ ಹಿರಿಯರು ಬರೇ 'ಸಲಹೆ - ಸೂಚನೆ'ಗಳಿಗೆ ಸೀಮಿತವಾದದ್ದು ಮಾತ್ರ ಆರೆಸ್ಸಸ್ ನ ಅಸಹಾಯಕತೆಯನ್ನು ತೋರಿಸುತ್ತದೆ. ಅಧಿಕಾರವೇರಿದ ಒಬ್ಬ ಸ್ವಯಂಸೇವಕನನ್ನು ಅವನ ಚಾರಿತ್ರ್ಯದ ಆಧಾರದ ಮೇಲೆ ನಿಯಂತ್ರಣ ಮಾಡುವ ಇಚ್ಛೆ ಅಥವಾ ಅವಕಾಶ ಸಂಘಕ್ಕೆ ಇಲ್ಲದಿದ್ದರೂ ಅವನಿಂದ ಬರೇ ಉತ್ತಮ ಆಡಳಿತವನ್ನು ಅಪೇಕ್ಷಿಸುವ ಈ ಅಸಹಾಯಕತೆಗೆ ಉತ್ತರ?

ಪ್ರಸ್ತುತ ಸಮಯದಲ್ಲಿ ಆರೆಸ್ಸೆಸ್ಸಿನ ಸಾಮಾನ್ಯ ಕಾರ್ಯಕರ್ತ ಅಥವಾ ಸಜ್ಜನ ಹಿಂದೂ ಸಮಾಜದ ವರ್ಗ ಬಯಸುವುದು, ಆರೆಸ್ಸಸ್ ಖಡಾಖಂಡಿತವಾಗಿ ಬಿಜೆಪಿಯನ್ನು ತನ್ನ ಪರಿವಾರವಲ್ಲ ಎಂದು ಘೋಷಿಸುವುದು ಅಥವಾ 'ಸ್ವಯಂಸೇವಕತ್ವ'ವನ್ನು ಕಾಪಾಡಿಕೊಳ್ಳಲಾಗದವರನ್ನು ಮುಲಾಜಿಲ್ಲದೆ ಭಾಜಪದಿಂದ ಹೊರಹಾಕಿ 'ತಾನು ನಿರ್ಮಾಣ' ಮಾಡಿದ ವ್ಯಕ್ತಿಯನ್ನು ಆ ಜಾಗಕ್ಕೆ ತಂದು ಕೂರಿಸುವುದು. ಹೊಸ ವ್ಯಕ್ತಿಗಳಿಂದ ಅಧಿಕಾರಕ್ಕೆ ಬರಲು ಕಷ್ಟವಾಗಬಹುದು ಹಾಗು ಅಧಿಕಾರಕ್ಕೆ ಬಂದ ಮೇಲೆ ಹೊಸಬರೂ ಸಹ ತಪ್ಪು ಹಾದಿ ತುಳಿಯಬಹುದು. ಅಧಿಕಾರಕ್ಕೆ ಬರಲು ಸಾಧ್ಯವೋ ಅಲ್ಲವೋ, ಕಷ್ಟವೋ ನಷ್ಟವೋ, ಸಚ್ಚಾರಿತ್ರ್ಯ ವ್ಯಕ್ತಿಗಳಿಗೆ ಮಾತ್ರ ಅವಕಾಶ ನಿಡಿದಾಗ ಮಾತ್ರ ಆರೆಸ್ಸೆಸ್ ತನ್ನ ಮೇಲೆ ಸಮಾಜದ ಸಜ್ಜನ ವರ್ಗ ಇಟ್ಟಿರುವ ನಂಬಿಕೆಯನ್ನು ಉಳಿಸಿಕೊಳ್ಳಲು ಸಾಧ್ಯವಾಗುತ್ತದೆ.

ಸಾಮಾನ್ಯ ಸ್ವಯಂಸೇವಕನಾಗಿದ್ದಾಗ ಅತ್ಯಂತ ಒಳ್ಳೆಯ ಚಾರಿತ್ರ್ಯವುಳ್ಳ ವ್ಯಕ್ತಿಯಾಗಿದ್ದವ ಅಧಿಕಾರಕ್ಕೆ ಬಂದ ಕೂಡಲೇ ಆಸ್ತಿವಂತನಾಗುತ್ತಾನೆ. ಸಂಘದ ಜವಾಬ್ದಾರಿಯಿದ್ದವ 'ಭಾಜಪದ ಅಧಿಕಾರವುಳ್ಳವ'ನಾಗುತ್ತಾನೆ ಎಂದರೆ, ಸಾಮಾನ್ಯ ವ್ಯಕ್ತಿಯಾಗಿ 'ಅಧಿಕಾರ ಏರುವವ'ನಿಗೂ, ಒಬ್ಬ ಸ್ವಯಂಸೇವಕನಾಗಿ 'ಅಧಿಕಾರ ಏರುವವ'ನಿಗೂ ಏನು ವ್ಯತ್ಯಾಸ? ಹಾಗಿದ್ದಾಗಲೂ ಆ ವ್ಯಕ್ತಿಗೆ ಸಂಘದ ಪೋಷಣೆ ಸಿಕ್ಕಿದರೆ ಅವನಿಗೆ ಎಂದಿಗೂ ತನ್ನ ತಪ್ಪಿನ ಅರಿವಾಗುವುದಿಲ್ಲ. ಅವನಿಗೆ 'ಅಪರಾಧಿತನ' ಕಾಡುವುದಿಲ್ಲ. ಅವನು ತನ್ನ ತಪ್ಪನ್ನು ತಿದ್ದಿಕೊಳ್ಳುವುದಿಲ್ಲ.

ಯಾವಾಗ ತನ್ನ ತಪ್ಪಿನ ಕಾರಣಕ್ಕೆ ಆರೆಸ್ಸೆಸ್ ನನ್ನನ್ನು ಉಪೇಕ್ಷಿಸುತ್ತದೆ ಎಂದೆನಿಸುತ್ತದೋ ಆಗ ತಪ್ಪಿತಸ್ಥನಿಗೆ ಯಾವುದೋ ಮಟ್ಟದ ಹಿಂಜರಿಕೆ ಆಗುವುದು ಖಂಡಿತ. ಮತ್ತೊಮ್ಮೆ ಅವನು ಸಾಮಾನ್ಯ ಸ್ವಯಂಸೇವಕನ ಮಟ್ಟದಿಂದ ತನ್ನ ಚಾರಿತ್ರ್ಯವನ್ನು ಸಾಬೀತು ಪಡಿಸಿ ಭಾಜಪಕ್ಕೆ ಬರಲು ಪ್ರಯತ್ನಿಸುತ್ತಾನೆ. ಆರೆಸ್ಸೆಸ್ ಏನು ಮಾಡುತ್ತದೆ ಎಂಬುದನ್ನು ಸಮಾಜ ನೋಡುವುದು ಸ್ವಯಂಸೇವಕರ ಮೂಲಕವೇ. ಅದು ಸ್ಥಳೀಯ ಸ್ವಯಂಸೇವಕರ ಮೂಲಕ. ಇನ್ನೂ ಮುಖ್ಯವಾಗಿ ಸ್ಥಳೀಯ 'ಅಧಿಕಾರಸ್ಥ ಸ್ವಯಂಸೇವಕರ' ಮೂಲಕ. ಆ ಜಾಗಕ್ಕೆ ನಾವು ಸರಿಯಾದವರನ್ನು ನಿಲ್ಲಿಸದಿದ್ದರೆ 'ಅಧಿಕಾರಕ್ಕೆ ಬಂದ ನಂತರ ಸ್ವಯಂಸೇವಕನೂ ಒಂದೇ, ಇತರರೂ ಒಂದೇ' ಎಂದಾಗುತ್ತದೆ. ಸಂಘಟನಾ ಕೌಶಲ, ಮಾತಿನ ಕೌಶಲ, ಹಣದ ಸಾಮರ್ಥ್ಯ, ಸಂಪರ್ಕ ಸಾಮರ್ಥ್ಯ ಇವೆಲ್ಲವೂ ಚಾರಿತ್ರ್ಯದ ನಂತರದ ಸ್ಥಾನವನ್ನು ಪಡೆಯುವಂತಾದರೆ ಮಾತ್ರ ಭಾಜಪದಲ್ಲಿ ಸಜ್ಜನರು ಇರಲು ಹಾಗು ಸಜ್ಜನರು ಉಳಿಯಲು ಸಾಧ್ಯವಾಗುತ್ತದೆ.

ಈ ಕೆಲಸ ನಾವು ಹೇಳುವಷ್ಟು ಅಥವಾ ಬರೆಯುವಷ್ಟು ಸುಲಭವಲ್ಲ ಎಂಬ ಸತ್ಯದ ಅರಿವಿದ್ದರೂ ನಮ್ಮ ಅಪೇಕ್ಷೆಯ ಹಿಂದೆ ಉತ್ತಮ ಸಮಾಜ ನಿರ್ಮಾಣದ ಕಳಕಳಿಯಿದೆ ಎಂಬುದನ್ನು ಇಲ್ಲಿ ಉಲ್ಲೇಖಿಸಲೇಬೇಕು. ಸಸಿಯಿಂದ ಹೆಮ್ಮರದೆತ್ತರಕ್ಕೆ ಬೆಳೆದ ಆರೆಸ್ಸೆಸ್ಸಿನ ಬಗ್ಗೆ ಅತ್ಯಂತ ನಂಬಿಕೆ, ವಿಶ್ವಾಸವಿದ್ದರೂ, ಭವಿಷ್ಯದ 'ಭವ್ಯ ಭಾರತ ನಿರ್ಮಾಣ'ದ ಕನಸು ಎಲ್ಲಿ ಅಸಾಧ್ಯವಾಗುವುದೋ ಎಂಬ ಸಂಶಯ, ಭಯ ಹಿಂದೂಸಮಾಜದ ನಮ್ಮಂತಹ ಹಲವರಲ್ಲಿ ಮೂಡಿರುವ ಕಾರಣಕ್ಕೆ ನಮ್ಮ ಮನಸ್ಸಿನ ದುಗುಡಗಳನ್ನ ಹೊರಕ್ಕೆ ಹಾಕಿದ ಸಮಾಧಾನವಷ್ಟೇ.

"ವಂದೇ ಭಾರತಮಾತರಂ"

ಮತ್ತೂರು ವಿಜಯದಶಮಿ ಬೌದ್ಧಿಕ್ : ಭಾಗ - ೪

2011-12-01T15:18:00.004+05:30

ಒಮ್ಮೆ ಒಂದು ಘೋಷ್ ವರ್ಗ ನಡೀತಿತ್ತು. ಅವಾಗ ಒಬ್ಬ ಘೋಷ್ ಶಿಕ್ಷಕ, ಒಬ್ಬ ಘೋಷ್ ಶಿಕ್ಷಾರ್ಥಿ ಅಪ್ಪಾಜಿ ಜೋಶಿಯವರೊಡನೆ ಹೋಗ್ತಾ ಇದ್ದರು. ಆಗ ಡಾಕ್ಟರ್ ಜಿ ಆ ಘೋಷ್ ಶಿಕ್ಷಕ ಮತ್ತು ಶಿಕ್ಷಾರ್ಥಿಯವರ ಮಧ್ಯೆ ನಡೆದು ಹೋದರು. ಆಗ ಘೋಷ್ ಶಿಕ್ಷಕ 'ಡಾಕ್ಟರ್ ಜಿ ಹಾಗೆ ಮಧ್ಯೆ ಹೋಗಬಾರದು. ಪಕ್ಕದಲ್ಲಿ ಹೋಗಬಹುದು' ಅಂತ ಹೇಳಿದ. ಆ ನಂತರ ಅಪ್ಪಾಜಿ ಜೋಷಿ ಡಾಕ್ಟರ್ ಜಿಯವರಿಗೆ ಕೇಳಿದರು 'ನೀವು ಬೇಕು ಅಂತಲೇ ಹಾಗೆ ನಡೆದುಕೊಂಡಿರಲ್ಲವೇ?, ಯಾಕೆ?' ಅಂತ ಕೇಳಿದಾಗ ಅದಕ್ಕೆ ಡಾಕ್ಟರ್ ಜಿ 'ಸಂಘದ ಸ್ವಯಂಸೇವಕ ನನಗೆ ತಲೆಬಾಗುತ್ತಾನೋ ಅಥವಾ ಸಂಘದ ನಿಯಮಗಳಿಗೆ ತಲೆಬಾಗುತ್ತಾನೋ ಅನ್ನೋದನ್ನ ತಿಳಿದುಕೊಳ್ಳಲು. ಅವನು ಸರಿ ಮಾಡಿದ.' ಅಂತ ಅಪ್ಪಾಜಿಯವರಿಗೆ ಹೇಳಿದರು.

ಇನ್ನೊಮ್ಮೆ ವರ್ಗದ ಬೈಠಕ್ ನಲ್ಲಿ ಡಾಕ್ಟರ್ ಜಿ 'ನಾನು ಡಾಕ್ಟರ ಕೇಶವ ಬಲಿರಾಮ ಹೆಡಗೆವಾರ್ ಹೇಳ್ತಾ ಇದ್ದೀನಿ ಇದು ಹಿಂದೂ ರಾಷ್ಟ್ರ ಅಲ್ಲ' ಅಂತ ಹೇಳಿದಾಗ ಎಲ್ಲರಿಗೂ ಆಶ್ಚರ್ಯ .! ತುಂಬಾ ಜನ 'ಅದು ಸಾಧ್ಯ ಇಲ್ಲ' ಅಂತ ಅಂದ್ರು. 'ಅದಿರಲಿ, ಇದಕ್ಕೆ ನಿಮ್ಮಗಳ ಉತ್ತರ ಏನು?' ಅಂತ ಡಾಕ್ಟ ರ್ ಜಿ ಕೇಳಿದ್ದಕ್ಕೆ 'ಆಗ ಡಾಕ್ಟರ್ ಜಿ ಸರಸಂಘಚಾಲಕರಾಗಿರೋದಿಲ್ಲ' ಅಂತ ಉತ್ತರ ಕೊಟ್ರು. ಅಂದ್ರೆ ಡಾಕ್ಟರ್ ಜಿ ಯವರಿಗೆ ಸ್ವಯಂಸೇವಕರು ತನ್ನನ್ನು ನಿಷ್ಠೆಯಿಂದ ನೋಡಬೇಕು ಅಂತ ಇರಲಿಲ್ಲ, ಸಂಘವನ್ನ ನಿಷ್ಠೆಯಿಂದ ನೋಡಬೇಕು ಅಂತ ಇತ್ತು. ಸಂಘದ ವಿಚಾರವನ್ನ, ಗುರಿಯನ್ನ, ನಿಷ್ಠೆಯಿಂದ ಅನುಸರಣೆ ಮಾಡಬೇಕು ಅಂತ ಇತ್ತು. ತುಂಬಾ ಸಂದರ್ಭದಲ್ಲಿ ಮನುಷ್ಯ ಇಲ್ಲೇ ಎಡವುವಂಥದ್ದು. ಸಂಘಕ್ಕೆ ಬರುವುದಕ್ಕೆ ಯಾರೋ ಒಬ್ಬರು ಸ್ನೇಹಿತರು ಕಾರಣರಾಗಬಹುದು. ಆದರೆ ಇಲ್ಲಿ ಉಳಿಯಬೇಕಾದರೆ ಸಂಘದ ನಿಷ್ಠೆಯನ್ನೇ ಉಳಿಸಿಕೊಳ್ಳಬೇಕಾದ್ದು. ಇದನ್ನ ಹೆಜ್ಜೆಹೆಜ್ಜೆನಲ್ಲಿ ಡಾಕ್ಟರ್ ಜಿ ಕಲಿಸ್ತಾ ಇದ್ರು.

ಪ್ರತ್ಯಕ್ಷ ಡಾಕ್ಟರ್ ಜಿ ಬಗ್ಗೆ ತುಂಬಾ ಜನಕ್ಕೆ ಡಾಕ್ಟರ್ ಜಿ ತುಂಬಾ ದೊಡ್ಡವರು ಅಂತ ಅನ್ನಿಸ್ತಾನೇ ಇರ್ಲಿಲ್ಲ. ಅಂದ್ರೆ ತಮಗಿಂತ ೨ ಹೆಜ್ಜೆ ಮುಂದಿರಬಹುದು, ನಾವು ೨ ಹೆಜ್ಜೆ ಮುಂದಿಟ್ರೆ ನಾವು ಡಾಕ್ಟರ್ ಜಿ ಜೊತೆ ಅಂತ ಯೋಚಿಸ್ತಾ ಇದ್ರು. ಆದ್ರೆ ತಾವು ೨ ಹೆಜ್ಜೆ ಇಡುವ ಹೊತ್ತಿಗೆ ಡಾಕ್ಟರ್ ಜಿ ಇನ್ ೨ ಹೆಜ್ಜೆ ಮುಂದೆ ಇಡ್ತಾ ಇದ್ರು. ನೋಡಕ್ಕೆ ೨ ಹೆಜ್ಜೆ ಮಾತ್ರ ಮುಂದಿದ್ರೂ ಮನಸ್ಸಿನಲ್ಲಿ ೫೦ ಹೆಜ್ಜೆ ಮುಂದೆ ಇರ್ತಾ ಇದ್ರು ಅಂತ. ಆದ್ರೆ ನೋಡುವವರಿಗೆ ಅವರು ೨ ಹೆಜ್ಜೆ ಮಾತ್ರ ಮುಂದಿದಾರೆ ಅಂತ ಅನ್ನಿಸ್ತಾ ಇತ್ತು. ಸಂಘದ ವಿಶೇಷತೆ ಅಂದ್ರೆ ಇದೇ.

ಸಾಮಾನ್ಯವಾಗಿ ವ್ಯಕ್ತಿಗತ ಪವಾಡಗಳಿಗೆ ಮನುಷ್ಯ ಬೇಗ ಮಾರುಹೋಗ್ತಾನೆ. ಸತ್ತು ಹೋದ ಪಾರಿವಾಳಕ್ಕೆ ಯಾವನೋ ಒಬ್ಬ ಜೀವ ಬರಿಸಿದ ಅಂದ್ರೆ ನಾವು ಬಹಳ ಆಶ್ಚರ್ಯ ಪಡ್ತೇವೆ. ಯಾರಾದ್ರೂ ಕೃತಕ ಹೂವಿಗೆ ವಾಸನೆ ಬರಿಸಿದ್ರು ಅಂದ್ರೆ ಕಣ್ ಕಣ್ ಬಿಡ್ತೇವೆ. ಆದರೆ ಸಂಘ ಮಾಡಿರುವ ಪವಾಡ ಇದೆಯಲ್ಲ, ಇಷ್ಟು ಜನರನ್ನ 'ದೇಶಭಕ್ತ'ರನ್ನಾಗಿ ಮಾಡಿರುವುದಿದೆಯಲ್ಲ, ಇಷ್ಟು ಜನರನ್ನ 'ಈ ದೇಶಕ್ಕೆ ನಿಷ್ಠೆಯಿಂದಿರುವಂತೆ' ಮಾಡಿರುವುದಿದೆಯಲ್ಲ ಇಂಥ ಪವಾಡವನ್ನ ಜಗತ್ತಿನಲ್ಲಿ ಯಾರೂ ಮಾಡಲು ಸಾಧ್ಯ ಇಲ್ಲ.

ಹಾಗಾಗಿ ಸ್ವಯಂಸೇವಕರು ಹೊರಗಡೆ ಪ್ರಪಂಚದ ಪವಾಡಗಳಿಗೆ ಮರುಳಾಗದೆ ನಾವು ಸಂಘದ ಪವಾಡವನ್ನೇ ತೆರೆದ ದೃಷ್ಟಿಯಿಂದ ನೋಡುವುದರಿಂದ ಸಂಘ ಕಾರ್ಯದಲ್ಲಿ ಉಳಿಯಲು ಸಾಧ್ಯವಾಗುತ್ತೆ. ಸಂಘದ ವಿಶೇಷತೆಗಳನ್ನ ಆಗಾಗ್ಗೆ ಮೆಲುಕು ಹಾಕುತ್ತಾ, ಸಂಘದ ಹಿರಿಯರು ಹೇಳಿದ ವಿಚಾರಗಳನ್ನ ಆಗಾಗ್ಗೆ ಚಿಂತಿಸುತ್ತಾ, ಸಂಘದ ಜೊತೆ ನಿರಂತರ ಸಂಪರ್ಕ ಇಟ್ಟುಕೊಳ್ಳುವ ಮೂಲಕ, ನಾವು ಜೀವನಪೂರ 'ಸ್ವಯಂಸೇವಕ'ರು ಎಂಬ ಮಾನಸಿಕತೆಯನ್ನ ಬೆಳೆಸಿಕೊಳ್ಳೋಣ.

( ಮುಗಿಯಿತು)

ಮತ್ತೂರು ವಿಜಯದಶಮಿ ಬೌದ್ಧಿಕ್ : ಭಾಗ - ೩

2011-11-24T13:27:00.006+05:30

ನಮ್ಮ ದೇಶದಲ್ಲಿ ಬಹಳಷ್ಟು ಜನ ದೊಡ್ಡವರು ದೇಶಭಕ್ತರಿದ್ದರು. ಗಾಂಧೀಜಿ, ಸಾವರ್ಕರ್, ಸುಭಾಶ್ ಚಂದ್ರ ಬೋಸ್ ಮುಂತಾದವರು. ಈ ರೀತಿಯಾಗಿ ದೇಶಭಕ್ತರಾಗಿದ್ದಂತಹ ದೊಡ ವ್ಯಕ್ತಿಗಳು ಇಂಗ್ಲೆಂಡ್ ನಲ್ಲಿ ಬಹಳ ಕಡಿಮೆ ಜನರಿದ್ದರು. ಆದರೆ ಬ್ರಿಟಿಷರು ನಮ್ಮನ್ನ ಆಳಿದರು, ನಾವು ಸೋತೆವು. ೧೫ ಇಂಗ್ಲೆಡ್ ಅನ್ನು ನಮ್ಮ ದೇಶದಲ್ಲಿ ಇಡಬಹುದು. ಆದರೂ ನಾವು ಸೋತೆವು. ಅಂದರೆ ನಾವು ಎಷ್ಟೇ ಸಮರ್ಥರಾಗಿದ್ದರೂ ನಾವು ನಮಗಿಂತ ಅಸಮರ್ಥರಾದವರ ಮುಂದೆ ಸೋತಿದ್ದೇವೆ. ಯಾಕೆ ನಾವು ಸೋತ್ವಿ?

ಎರಡನೇ ಮಹಾಯುದ್ಧದ ಸಮಯದಲ್ಲಿ ಜರ್ಮನಿಯವರು ಇಂಗ್ಲೆಂಡ್ ಮೇಲೆ ಪ್ರತಿನಿತ್ಯ ಬಾಂಬುಗಳನ್ನು ಹಾಕ್ತಾಯಿರ್ತಾರೆ. ಒಂದು ದಿನ ಇಂಗ್ಲೆಂಡಿನ ಪೋಲೀಸಿನವರು ಒಬ್ಬನನ್ನ ಬಂಧಿಸ್ತಾರೆ. ಅವನು ಜರ್ಮನಿಯ ಸಿಐಡಿ ಅಂತ ಹೇಳಿ ಅರೆಸ್ಟ್ ಮಾಡ್ತಾರೆ. ಅವನು ಪ್ರತಿನಿತ್ಯ ಇಂಗ್ಲೆಂಡಿನ ರಹಸ್ಯಗಳನ್ನ ಜರ್ಮನಿಗೆ ತಿಳಿಸ್ತಿರ್ತಾನೆ ಅಂತ. ವಿಚಾರಣೆ ಎಲ್ಲ ಆಗುತ್ತೆ. ಜರ್ಮನಿಯವನಿಗೆ ಕುತೂಹಲ ತಡೆಯಲಾರದೆ ಕೇಳ್ತಾನೆ 'ನನ್ನನ್ನ ಹೇಗೆ ಹಿಡಿದ್ರಿ? ಯಾವ ಡಿಪಾರ್ಟ್ ಮೆಂಟ್ ನನ್ನನ್ನ ಹಿಡಿದಿದ್ದು?, ಹೇಗೆ ನನ್ನ ಹಿಡಿದದ್ದು? ' ಅಂತ. ಅದಕ್ಕೆ ಪೋಲೀಸಿನವರು 'ಯಾವ ಡಿಪಾರ್ಟ್ ಮೆಂಟೂ ಅಲ್ಲ. ನೀನು ಪ್ರತಿ ದಿನ ತಿಂಡಿ ತಿನ್ನಲು ಹೋಗುತ್ತಿದ್ದ ಹೋಟೆಲಿನ ಮಾಣಿ ನಿನ್ನನ್ನ್ದು ಹಿಡಿದುಕೊಟ್ಟದ್ದು ಅಂತ!'.

ಅದನ್ನು ಕೇಳಿದ ಕೂಡಲೇ ಅವನಿಗೆ ಪರಮಾಶ್ಚರ್ಯ..!! ಅದಕ್ಕೆ ಆ ಹೋಟೆಲ್ ಮಾಣಿಯನ್ನು ಕುರಿತು 'ನಾನು ನಿಮ್ಮ ರೀತಿಯಲ್ಲೇ ಇಂಗ್ಲಿಷ್ ಮಾತಾಡ್ತಿದ್ದೆ, ನಿಮ್ಮ ರೀತಿಯಲ್ಲೇ ಬಟ್ಟೆಗಳನ್ನ ಹಾಕ್ತಿದ್ದೆ, ನಿಮ್ಮ ರೀತಿಗಳಲ್ಲೇ ನನ್ನ ಆಹಾರವನ್ನ ತೆಗೆದುಕೊಳ್ಳುತ್ತಿದ್ದೆ. ಹಾಗಿದ್ದಾಗ್ಲು ಹೇಗೆ ನನ್ನನ್ನ ಗುರುತು ಹಿಡಿದೆ?' ಅಂತ ಕುತೂಹಲದಿಂದ ಕೇಳ್ತಾನೆ. ಅದಕ್ಕೆ ಮಾಣಿ 'ಆ ದಿನ ನೀವು ಹೊಡೆದ ಸೀಟಿ ನಮ್ಮ ದೇಶದವ ಹೊಡೆಯುವ ಸೀಟಿಗಿಂತ ಭಿನ್ನವಾಗಿತ್ತು. ಆಗಲೇ ನೀವು ನಮ್ಮ ದೇಶದವರಲ್ಲ ಎಂಬ ಖಾತರಿಯೊಂದಿಗೆ ಯುದ್ಧದ ಸಮಯದಲ್ಲಿ ನೀವು ನಮ್ಮ ದೇಶದಲ್ಲಿರುವ ಬಗ್ಗೆ ಅನುಮಾನದಿಂದ ಪೊಲೀಸರಿಗೆ ದೂರು ಕೊಟ್ಟೆ.' ಅಂತ ಉತ್ತರಿಸಿದ.

ಅಂದರೆ ಸರ್ವ ಸಾಮಾನ್ಯ ಮನುಷ್ಯನ ದೇಶಭಕ್ತಿಯ ಮತ್ತ ಆ ದೇಶದಲ್ಲಿ ಜಾಸ್ತಿಯಿರುವುದರಿಂದ ಇದು ಸಾಧ್ಯವಾಯಿತು.

ಒಂದು ಸಂಘಟಿತ ಸ್ವರೂಪ, ಒಂದು ಏಕ ಸೂತ್ರತೆಯನ್ನ ಆ ದೇಶದಲ್ಲಿ ಕಾಣ್ತೇವೆ. ಹಾಗಾಗಿ ಅವರು ನಮ್ಮ ದೇಶವನ್ನು ಆಳಿದರು. ಸಂಖ್ಯೆಯಲ್ಲಿ ನಾವು ಅವರಿಗಿಂತ ಜಾಸ್ತಿ ಆದರೆ ಸರ್ವಸಾಮಾನ್ಯ ಮನುಷ್ಯನ ದೇಶಭಕ್ತಿಯ ಮಟ್ಟ ಯಾವ ಮಟ್ಟದಲ್ಲಿದೆ ಎಂದರೆ ಆ ರೀತಿಯಾಗಿಲ್ಲ. ರಾಬರ್ಟ್ ಕ್ಲೈವ್ ಬಂಗಾಳವನ್ನು ಗೆದ್ದಾಗ ಅವನು 'ನಾನು ಬಂಗಾಳದ ರಾಜ' ಅಂತ ಹೇಳಲಿಲ್ಲ ಅವನು. 'ನಾನು ಬ್ರಿಟಿಷ್ ಸಾಮ್ರಾಜ್ಯದ ಪ್ರತಿನಿಧಿಯಾಗಿ ಇಲ್ಲಿದೀನಿ' ಅಂತ ಹೇಳಿಕೊಂಡ. ಆದರೆ ನಮ್ಮ ದೇಶದ ಜನರಾದ ನಾವು ಇವತ್ತಿಗೂ ಅಷ್ಟೇ, ಅವತ್ತಿಗೂ ಅಷ್ಟೇ. ಒಂದು ಸಣ್ಣ ಜಾಗ ಸಿಕ್ಕಿದರೂ 'ನನ್ನದು' ಎಂಬ ಅಹಂನಿಂದ ಹೇಳ್ಕೊತೀವಿ. ನಾನು ಇಷ್ಟು ದೊಡ್ಡ 'ಹಿಂದೂಸಮಾಜದ ಪ್ರತಿನಿಧಿ' ಅಂತ ಯೋಚನೆ ಮಾಡೋದಿಲ್ಲ, ಈ ದೇಶದ ಒಬ್ಬ ಪ್ರಜೆ ಅಂತ ಯೋಚನೆ ಮಾಡೋದಿಲ್ಲ. ಆ ಕೆಲಸವನ್ನೇ ಡಾಕ್ಟರ್ ಜಿ ಮಾಡಿದ್ದು. ಡಾಕ್ಟರ್ ಜಿ ಸಣ್ಣ ಸಣ್ಣ ಸಂಗತಿಗಳ ಮುಖಾಂತರ ನಮಗೆ ಇದನ್ನ ಕಲಿಸಿದರು.

ಸಾಮಾನ್ಯವಾಗಿ ವ್ಯಕ್ತಿಗು ಹಾಗು ಕುಟುಂಬದ ಸ್ವಾರ್ಥಕ್ಕು ಏನಾದ್ರು ಸಮಸ್ಯೆ ಬಂದ್ರೆ, ಪ್ರತಿಯೊಂದು ಸಂದರ್ಭದಲ್ಲೂ ಸಾಮಾನ್ಯ ವ್ಯಕ್ತಿ ತನ್ನ ಸ್ವಾರ್ಥವನ್ನೇ ಹಿಡಿಯುತ್ತಾನೆ. ಕುಟುಂಬದ ಹಿತಕ್ಕೂ , ಊರಿನ ಹಿತಕ್ಕೂ ಏನಾದರೂ ತಾಕಲಾಟ ಬಂದ್ರೆ, ತನ್ನ ಕುಟುಂಬದ ಹಿತವನ್ನು ಹಿಡಿಯುತ್ತಾನೆ. ಆದರೆ ಸಂಘ ಇದನ್ನ ಉಲ್ಟಾ ಮಾಡುವಂತಹ ಪ್ರಯತ್ನ ಮಾಡುತ್ತೆ. ತನಗಿಂತ ಕುಟುಂಬ ದೊಡ್ಡದು, ತನಗಿಂತ ಸಮಾಜ ದೊಡ್ಡದು, ತನಗಿಂತ ದೇಶ ದೊಡ್ಡದು ಅನ್ನೋದನ್ನ ಕಲಿಸೋ ಪ್ರಯತ್ನ ಸಂಘದ್ದು. ಹಾಗಾಗಿ ನಮ್ಮ ನಿಷ್ಠೆ ವ್ಯಕ್ತಿಗಲ್ಲ, ಸಂಘಟನೆಗೆ. ನಮ್ಮ ನಿಷ್ಠೆ ಸಂಘಟನೆಗಲ್ಲ ದೇಶಕ್ಕೆ, ದೇಶನಿಷ್ಠೆ ಮತ್ತು ಸಂಘನಿಷ್ಠೆ ಗಳ ನಡುವೆ ಪ್ರಶ್ನೆ ಬಂದು ದೇಶದ ನಿಷ್ಠೆಗೆ ತೊಂದರೆ ಆಗೋದಾದ್ರೆ ಆಗ ಸಂಘನಿಷ್ಠೆಯನ್ನು ಬಿಡಬೇಕಾಗುತ್ತೆ. ಹಾಗಾಗಿ ಡಾಕ್ಟರ್ ಜಿ ಸಣ್ಣ ಸಣ್ಣ ಸಂಗತಿಗಳ ಮುಖಾಂತರ ಇದನ್ನ ಕಲಿಸ್ತಿದ್ರು.

(ಸಶೇಷ: ಮುಂದಿನ ಭಾಗದೊಂದಿಗೆ ಮುಕ್ತಾಯ )

ಮತ್ತೂರು ವಿಜಯದಶಮಿ ಬೌದ್ಧಿಕ್ : ಭಾಗ - ೨

2011-11-09T12:56:00.002+05:30

ಸಂಘ ಅನ್ನೋದಕ್ಕಿಂತ ಸಂಘ ಮಾಡುವಂತಹ ಕೆಲಸಕ್ಕೆ ವಿಜಯ ನಿಶ್ಚಿತ. ಸಂಘದ ವಿಚಾರ ಇದ್ದಾಗ ಮಾತ್ರ ಪ್ರಪಂಚ ಉಳಿಯೋದಕ್ಕೆ ಸಾಧ್ಯ, ಎಂಬ ನಂಬಿಕೆ ಯೊಂದಿಗೆ ನಾವು ಸಂಘದ ಕೆಲಸವನ್ನ ಮಾಡ್ಬೇಕು.

ಮಾನನೀಯ ದತ್ತೊಪಂತ್ ತೇಂಗಡಿಜಿಯವರು ಸಂಸತ್ ಸದಸ್ಯರಾಗಿದ್ರು. ಹೀಗೆ ಸದಸ್ಯರ ಜೊತೆ ಮಾತಾಡುತ್ತಿದ್ರು. ಎಲ್ಲ ಪಕ್ಷದವರು ಇದ್ರೂ. ಯಾರೋ ಒಬ್ಬರು 'ಯಾರು ಅದು ಆರ್ಎಸ್ಸೆಸ್ ಶುರು ಮಾಡಿದ್ದು?' ಅಂತ ಹೇಳಿದ್ದಕ್ಕೆ ಇನ್ನೊಬ್ಬರು 'ಆರೆಸ್ಸಸ್ ಶುರು ಮಾಡಿದ್ದು ಯಾರು ಅಂತ ಗೊತ್ತಿಲ್ವಾ?' ಅಂದಾಗ ಮಾನನೀಯ ದತ್ತೊಪಂಥರು 'ಗೊತ್ತಿಲ್ದೆ ಇರೋದು ಸರಿ ಇದೆ ' ಅಂತ ಸಮಾಧಾನ ಮಾಡಿದರು. ಡಾಕ್ಟರ್ ಜಿಯವರ ನೆರಳು ಡಾಕ್ಟರ್ ಜಿಯವರಿಗಿಂತ ದೊಡ್ಡದಿದೆ. ಡಾಕ್ಟರ್ ಜಿ ಯಾವಾಗಲು ತಮ್ಮನ್ನ ಸಂಘಟನೆಗಿಂತ ದೊಡ್ಡವರನ್ನಾಗಿ ಮಾಡಿಕೊಳ್ಳಲೇ ಇಲ್ಲ. ಹಾಗಾಗಿ ಜಗತ್ತಿನಲ್ಲಿ ಡಾಕ್ಟರ್ ಜಿ ಯವರು ಗೊತ್ತಿಲ್ಲದಿರುವವರು ಸಾಕಷ್ಟು ಜನ ಇದ್ದಾರೆ ಆದರೆ ಆರೆಸ್ಸಸ್ ಗೊತ್ತಿಲ್ಲದಿರುವವರು ತುಂಬಾ ಕಡಿಮೆ. ಬರೆ ಡಾಕ್ಟರ್ ಜಿ ಅಂತಲ್ಲ, ಸಂಘದ ಸಾಕಷ್ಟು ಹಿರಿಯರು ಸಹ ಸಂಘದ ಪದ್ದತಿಯ ಕಾರಣಕ್ಕೆ ತಾವು ಸಾಕಷ್ಟು ದೊಡ್ಡ ವ್ಯಕ್ತಿಗಳಾದರೂ ಹೊರಗಡೆ ಪ್ರಪಂಚಕ್ಕೆ ಸಾಧಾರಣ ವ್ಯಕ್ತಿಗಳಾಗಿಯೇ ಇರ್ತಾರೆ.

ಮಾನನೀಯ ದತ್ತೊಪಂತ್ ತೇಂಗಡಿಜಿಯವರು ನಿಧನರಾದಾಗ ಪತ್ರಿಕೆಯ ಮೂಲೆಯಲ್ಲಿ 'ಭಾರತಿಯ ಮಜ್ದೂರ್ ಸಂಘದ ಸಂಸ್ಥಾಪಕ ದತ್ತೊಪಂತ್ ತೇಂಗಡಿಯವರು ನಿಧನರಾದರು' ಅಂತ ಬಂದಿತ್ತು. ವಾಜಪೇಯಿ, ಆಡ್ವಾಣಿ ಅಂಥವರನ್ನು ನಿರ್ಮಾಣ ಮಾಡಿದಂತಹ ತೇಂಗಡಿಜಿಯವರು ಎಷ್ಟು ದೊಡ್ಡ ವ್ಯಕ್ತಿಗಳೆಂದು ಅವರನ್ನು ಹತ್ತಿರದಿಂದ ನೋಡಿದವರಿಗೆ ಮಾತ್ರ ಗೊತ್ತು. ಆದರೆ ಹೊರಗಡೆ ಪ್ರಪಂಚಕ್ಕೆ ಅವರು ಸಾಧಾರಣ ವ್ಯಕ್ತಿಯಾಗಿಯೇ ಉಳಿದರು.

ನಿಧನರಾದ ಹೋ.ವೆ.ಶೇಷಾದ್ರಿಯವರ ಶ್ರದ್ಧಾಂಜಲಿ ಕಾರ್ಯಕ್ರಮ ಬೆಂಗಳೂರಿನಲ್ಲಿ ನಡೆ ಯಿತು. ಕಾರ್ಯಕ್ರಮಕ್ಕೆ ಆಡ್ವಾಣಿ, ವಾಜಪೇಯಿ ಯವರೆಲ್ಲ ಬಂದಿದ್ದರು. ನೆರೆದಿದ್ದ ಪತ್ರಕರ್ತರಿಗೆ ಸಿಕ್ಕಾಪಟ್ಟೆ ಆಶ್ಚರ್ಯ..! ಯಾರೋ ಶೇಷಾದ್ರಿ ಅನ್ನೋವ್ರು ಹೋಗಿದ್ದಕ್ಕೆ ಆಡ್ವಾಣಿ, ವಾಜಪೇಯಿ ಯವರೆಲ್ಲ ಯಾಕೆ ಬಂದಿದ್ದಾರೆ..!? ಅಂತ.

ಹೀಗೆ ಸಂಘದ ವಿಶೇಷ ಅಂದ್ರೆ ತನ್ನನ್ನ ತಾನು ದೊಡ್ಡವನನ್ನಾಗಿ ಮಾಡಿಕೊಳ್ಳದೆ ಇರೋದು.

ಸರ್ವಸಾಮಾನ್ಯ ಮನುಷ್ಯನ ದೇಶಭಕ್ತಿಯ ಮಟ್ಟವನ್ನ ಜಾಸ್ತಿ ಮಾಡಿದಾಗ ಈ ದೇಶ ಉಳಿಯತ್ತೆ ಅನ್ನೋದು ನಮ್ಮ ವಿಚಾರ. ಸಂಘದ ಪ್ರಾರ್ಥನೆಯಲ್ಲೂ ನಾವು ಅದನ್ನೇ ಹೇಳ್ತೇವೆ. ಧರ್ಮದ ಆಧಾರದ ಮೇಲೆ ಈ ದೇಶದ ಸಮಾಜವನ್ನ ಸಂಘಟನೆ ಮಾಡಿ ಧರ್ಮ ರಕ್ಷಣೆ ಮಾಡೋ ಮುಖಾಂತರ ಈ ದೇಶವನ್ನ ಪರಮ ವೈಭವವನ್ನಾಗಿ ಮಾಡ್ತೇವೆ ಅಂತ.ನಾವು ಸಾಮಾನ್ಯವಾಗಿ ಮಾತಾಡ್ತಿರ್ತೇವೆ, 'ಯತೋ ಧರ್ಮಃ ತತೋ ಜಯಃ' ಅಂತ. ಆದರೆ ಅದರ ಪ್ರತ್ಯಕ್ಷ ಅನುಭವ ನಮಗೆ ಕಷ್ಟ.

ಇತ್ತೀಚಿಗೆ ಕೆ.ಎಸ.ಲಾಲ್ ಎಂಬುವರು 'ಇಂಡಿಯನ್ ಮುಸ್ಲಿಂ ಸ್ ಹೂ ಆರ್ ದೆ ?' ಅನ್ನೋ ಪುಸ್ತಕ ಬರೆದಿದ್ದಾರೆ. ಭಾರತದಲ್ಲಿ ಮುಸ್ಲಿಮರ ಸಂಖ್ಯೆ ಹೇಗೆ ಜಾಸ್ತಿಯಾಯ್ತು ಅನ್ನೋದನ್ನ ಅದರಲ್ಲಿ ಅವರು ಹೇಳಿದಾರೆ. ಮತಾಂತರ, ಹಿಂದೂ ಹೆಣ್ಣುಮಕ್ಕಳನ್ನು ಮ ದುವೆಯಾಗುವುದು, ಹೆಚ್ಚಿಗೆ ಹೆಣ್ಣುಮಕ್ಕಳನ್ನು ಮದುವೆ ಯಾಗುವುದು, ಯುದ್ಧಗಳಲ್ಲಿ ಹಿಂದೂ ಸೈನಿಕರನ್ನೇ ಮುಂದೆ ನಿಲ್ಲಿಸಿ ಯುದ್ಧ ಮಾಡುವುದು ಈ ಎಲ್ಲ ರೀತಿಗಳಿಂದ ಮುಸ್ಲಿಮರು ತಮ್ಮ ಸಂಖ್ಯೆಯನ್ನ ಹೆಚ್ಚಿಸಿಕೊಂಡರು ಅನ್ನೋದನ್ನ ಅವರು ಉಲ್ಲೇಖ ಮಾಡಿದಾರೆ.

ಅವತ್ತಿನ ಕಾಲದಲ್ಲಿ ಸಾಕಷ್ಟು ದೇವಸ್ಥಾನಗಳು ಇದ್ದವು, ಧರ್ಮದ ಬಗ್ಗೆ ಪ್ರವಚನ ಮಾಡುವವರಿದ್ದರು. ಹೀಗಿದ್ದೂ ಎಲ್ಲ ಕಡೆ ಹೊಡೆತ ಬಿತ್ತು. ಆಶ್ಚರ್ಯದ ವಿಷಯ ಅಂದರೆ, ಸಿಂಧ್ ಪ್ರಾಂತ್ಯ ದಿಂದ ಮುಸಲ್ಮಾನರ ಆಕ್ರಮಣ ಆಯ್ತು. ಬಂಗಾಳ, ಅಂದರೆ ಈಗಿನ ಬಾಂಗ್ಲಾದೇಶ, ಇರೋದು ಸಿಂಧ್ ಪ್ರಾಂತ್ಯದಿಂದ ಸಾವಿರಾರು ಮೈಲುಗಳ ದೂರ. ಆದರೂ ಅಲ್ಲಿ ಮತಾಂತರ ಮಾಡಿದ್ರು. ಅದರ ಪ್ರಮಾಣ ಎಷ್ಟು ಅಂದ್ರೆ ನಿಶ್ಚಿತ ಸಮಯದಲ್ಲಿ ಕಪ್ಪ ಕೊಡದಿದ್ದಾಗ ತನ್ನ ಕುಟುಂಬ ಸಮೇತ ಅವನು ಇಸ್ಲಾಂಗೆ ಮತಾಂತರವಾಗಬೇಕಾಗಿತ್ತು. ಒಬ್ಬ ರಾಜ ಕಪ್ಪ ಕೊಡಕ್ಕೆ ಹೋಗ್ತಾನೆ. ಅವನ ಪಕ್ಕದ ರಾಜ್ಯದ ಒಬ್ಬ ರಾಜ ಬಂದಿರೋದಿಲ್ಲ. ಅವನು ಸ್ವಲ್ಪ ದೊಡ್ಡ ರಾಜ. ಅವನು ಮತಾಂತರನಾದರೆ ಕಷ್ಟ ಅಂತ ಅವನ ಕಪ್ಪವನ್ನು ಇವನೇ ಕೊಟ್ಟು ಇಸ್ಲಾಂಗೆ ಮತಾಂತರವಾಗುತ್ತಿದ್ದ.

ಮೊಹಮ್ಮದ್ ಕುಲಿಖಾನ್ ಒಬ್ಬ ಬ್ರಾಹ್ಮಣನಾಗಿದ್ದವ, ಜಲಾಲುದ್ದೀನ್ , ಅವರು ಇವತ್ತಿನ ಬಾಂಗ್ಲಾದೇಶವನ್ನ ನಿರ್ಮಾಣ ಮಾಡಕ್ಕೆ ಕಾರಣರಾದರು. ಅಂದರೆ ಅಂದಿಗೂ, ಇಂದಿಗೂ ನಾವು ಏನನ್ನ ಅಂದುಕೊತೀವಿ ಎಲ್ಲಿ ಧರ್ಮವಿರುತ್ತೋ ಅಲ್ಲಿ ವಿಜಯ ಅಂತ ಅದರ ಪ್ರತ್ಯಕ್ಷ ಅನುಭವ ನಮಗಿಲ್ಲ. ಅಂದರೆ ನಮ್ಮ ಕಲ್ಪನೆಯಲ್ಲಿ ನಾವು ಯಾವುದನ್ನ ಧರ್ಮ ಅಂತ ನಂಬಿದ್ದೇವೋ ಆ ಧರ್ಮ ಇದ್ದಾಗಲೂ ನಾವು ಸೋತಿದೇವೆ. ಹಾಗಾದರೆ ನಿಜವಾದ ಧರ್ಮ ಅಂದರೆ ಯಾವುದು ಅಂತಲಾದರೂ ಗೊತ್ತಾಗಬೇಕು ಅಥವಾ ಯತೋ ಧರ್ಮಃ ತತೋ ಜಯಃ ಅನ್ನೋದು ಗೆಲುವಲ್ಲ ಅನ್ನೋದಾದ್ರೂ ಗೊತ್ತಾಗಬೇಕು.

ಹೀಗಾಗಿ ಸಂಘಧರ್ಮ ಉಳಿದಾಗ ವ್ಯಕ್ತಿಗತವಾದಂತಹ ನಮ್ಮ ಎಲ್ಲ ಸಂಗತಿಗಳೂ ಉಳಿಯೋದಕ್ಕೆ ಸಾಧ್ಯ. ಆ ಸಂಘಧರ್ಮವನ್ನ ಪಾಲನೆ ಮಾಡುವಂತಹ ವ್ಯವಸ್ಥೆಯನ್ನ ಡಾಕ್ಟರ ಜಿ ನಿರ್ಮಾಣ ಮಾಡಿದ್ರು. ಅಂದರೆ ಸರ್ವಸಾಮಾನ್ಯ ಮನುಷ್ಯನ ದೇಶಭಕ್ತಿಯ ಮಟ್ಟವನ್ನ ಜಾಸ್ತಿ ಮಾಡಿದ್ರು.

(ಸಶೇಷ)

ಮತ್ತೂರು ವಿಜಯದಶಮಿ ಬೌದ್ಧಿಕ್ : ಭಾಗ - ೧

2011-11-04T18:25:00.002+05:30

ಮತ್ತೂರು ವಿಜಯದಶಮಿ ಉತ್ಸವ
ತಾರೀಖು: ಅಕ್ಟೋಬರ್ ೬, ೨೦೧೧, ಗುರುವಾರ
ಬೌದ್ಧಿಕ್: ಶ್ರೀಯುತ ರಾಜಾರಾಮ್, ಮತ್ತೂರು

ವಿಜಯದಶಮಿ ಹಿಂದೂ ಸಮಾಜದ ಒಂದು ಉತ್ಸವ. ಸಂಘ ಯಾವುದೇ ಉತ್ಸವಗಳನ್ನ ಅಷ್ಟೇ ಅಲ್ಲ ಯಾವುದನ್ನು ಹೊಸದಾಗಿ ಪ್ರಾರಂಭ ಮಾಡಿಲ್ಲ. ಸಂಘದ ವಿಶೇಷವೇ ಸಂಘ ಪ್ರಾರಂಭ ಆದಂತಹ ದಿನ.

ಸಂಘದ ಕೆಲಸವನ್ನ ಎಷ್ಟೋ ಉತ್ಸಾಹದಿಂದ ಮಾಡಿದ ಎಷ್ಟೋ ದಿನಗಳ ನಂತರ ನಮಗೆ ಸಹಜವಾಗಿ ಅನ್ಸುತ್ತೆ, ಎಷ್ಟು ದಿನದವರೆಗೆ ಸಂಘದ ಕೆಲಸವನ್ನ ಮಾಡೋದು, ಯಾವುದು ಇದಕ್ಕೆ ಗುರಿ, ಯಾವುದು ಕೊನೆ ಅಂತ ಅನ್ನಿಸೋದಕ್ಕೆ ಶುರು ಆಗುತ್ತೆ. ಯಾಕೆ ಅಂದರೆ ಸಾಮಾನ್ಯವಾಗಿ ಮನುಷ್ಯನಿಗೆ ಇಷ್ಟು ದಿನದ ಕೆಲಸ ಅಂತ ನಿಗದಿಯಾಗಿರೋ ಕೆಲಸವನ್ನ ಮಾಡೋದು ಸುಲಭ. ಆದರೆ ನಿರಂತರವಾಗಿ ಮಾಡುವ ಕೆಲಸ ಕಷ್ಟ. ವರ್ಷದ ಅಷ್ಟು ದಿನವೂ ನಿತ್ಯ ಒಂದರಂತೆ ಸೂರ್ಯನಮಸ್ಕಾರ ಮಾಡೋದು ಕಷ್ಟ. ಆದರೆ ೧ ತಿಂಗಳ ಅವಧಿಯಲ್ಲಿ ೫೦೦ ಸೂರ್ಯನಮಸ್ಕಾರ ಮಾಡೋದು ಸುಲಭ.

ಸಂಘದ ಕೆಲಸವೂ ನಿರಂತರವಾಗಿ ಮಾಡ್ತಕ್ಕಂತಹ ಕೆಲಸ. ಇದಕ್ಕೆ ಗೆಲುವು ಸಿಗುತ್ತಾ? ಅಂತ ಮನುಷ್ಯ ಸಹಜವಾಗಿ ಯೋಚಿಸ್ತಾನೆ. ಯಾಕೆಂದ್ರೆ ಮನುಷ್ಯನಿಗೆ ತಕ್ಷಣ ಫಲ ಸಿಗಬೇಕು ಅಂತ ಯೋಚಿಸ್ತಾನೆ. ಇತ್ತೀಚಿಗೆ ಬೆಂಗಳೂರಿನಲ್ಲಿ ಸಂಘಚಾಲಕರ ವರ್ಗ ನಡೆಯಿತು. ವರ್ಗದಲ್ಲಿ ಪರಮ ಪೂಜನೀಯ ಸರಸಂಘಚಾಲಕರ ಅವಧಿಯಲ್ಲಿ ಅವರೊಂದು ಕಥೆ ಹೇಳಿದರು.

ಮುಸಲ್ಮಾನರ ಆಡಳಿತ ಕಾಲದಲ್ಲಿ ಇಬ್ಬರು ಸ್ನೇಹಿತರಿದ್ದರು. ಒಬ್ಬ ಮುಸ್ಲಿಂ ಇನ್ನೊಬ್ಬ ಹಿಂದೂ. ಒಮ್ಮೆ ಆ ಮುಸಲ್ಮಾನನಿಗೆ ೧೦೦ ರುಪಾಯಿ ಬೇಕಾಗುತ್ತೆ. ಸ್ನೇಹಿತನ ಮನೆಗೆ ಕೇಳಕ್ಕೆ ಬರ್ತಾನೆ, ಆದರೆ ಅವನು ಕೃಷಿಕ, ಗದ್ದೆಗೆ ಹೋಗಿರ್ತಾನೆ. ಅವನ ಮಡದಿಗೆ 'ನಾನಿಲ್ಲೇ ಮಸೀದಿಯಲ್ಲಿ ಇರ್ತೇನೆ, ಬಂದ ಕೂಡಲೇ ಹೇಳಿ ಕಳಿಸಿ' ಅಂತ ಹೇಳಿ ಮಸೀದಿಗೆ ಹೋಗ್ತಾನೆ. ಸ್ನೇಹಿತ ಬಂದೊಡನೆಯೇ ಮಸೀದಿಗೆ ಹೋಗ್ತಾನೆ ಅಲ್ಲಿ ಒಬ್ಬ ಮೌಲ್ವಿಯ ಪ್ರವಚನ ಆಗ್ತಿರುತ್ತೆ. ಇವನು ಪ್ರವಚನವನ್ನ ಪೂರ್ಣ ಕೇಳಿ ನಂತರ ಸ್ನೇಹಿತನಿಗೆ 'ಪ್ರವಚನ ತುಂಬಾ ಚೆನ್ನಾಗಿತ್ತು, ಅವರನ್ನು ಪರಿಚಯ ಮಾಡಿಸು' ಅಂತ ಕೇಳ್ತಾನೆ.

ಪರಿಚಯ ಮಾಡಿಸಿದ ನಂತರ, ಮೌಲ್ವಿಯನ್ನ ಕುರಿತು ಹಿಂದೂ ಸ್ನೇಹಿತ 'ನಿಮ್ಮ ಪ್ರವಚನ ತುಂಬಾ ಚೆನ್ನಾಗಿತ್ತು, ಆದರೆ ಒಂದು ವಿಷಯ ನನಗೆ ಹಿಡಿಸಲಿಲ್ಲ' ಹೇಳಿದಾಗ ಅದಕ್ಕೆ ಮೌಲ್ವಿ ಆಶ್ಚರ್ಯದಿಂದ 'ಯಾವ ವಿಷಯ?' ಅಂತ ಕೇಳ್ತಾರೆ. ಅದಕ್ಕೆ ಹಿಂದೂ ಸ್ನೇಹಿತ 'ದೇವರ ದೇವತ್ವ ಅನ್ನೋದು ಯಾರಿಗೂ ಅರ್ಥ ವಾಗದ ವಿಷಯ ಅಂತ ಹೇಳಿದ್ರಲ್ಲ ಆದರೆ ನನಗೆ ಗೊತ್ತಾಗುತ್ತೆ, ಬೇಕಾದ್ರೆ ತೋರಿಸ್ತೀನಿ, ಆದರೆ ಒಂದು ಷರತ್ತು' ಅಂತ ಹೇಳಿದಾಗ ಅಲ್ಲಿದ್ದವರಿಗೆಲ್ಲ ಆಶ್ಚರ್ಯ..! ಮೌಲ್ವಿಗೆ ಗೊತ್ತಾಗದೆ ಇರೋ ವಿಷಯ ಅವನಿಗೆ ಹೇಗೆ ಗೊತ್ತಾಗುತ್ತೆ ಅಂತ ! 'ವಿಷಯ ಸಮರ್ಥನೆಯ ನಂತರ ನಂಗೆ ೨೦೦ ರುಪಾಯಿಯನ್ನು ಕೊಡಬೇಕು' ಎಂಬ ಶರತ್ತನ್ನು ಮುಂದಿಟ್ಟು ಎಲ್ಲರನ್ನು ನದಿಯ ದಂಡೆಯ ಬಳಿಗೆ ಕರೆದುಕೊಂಡು ಹೋಗ್ತಾನೆ.

ನದಿಯ ನೀರನ್ನು ತೋರಿಸುತ್ತ 'ಇದೇ ದೇವರ ದೇವತ್ವ' ಅಂತ ತೋರಿಸುತ್ತ 'ಈ ನೀರು ಎಲ್ಲಿಂದ ಬಂತು, ಹೇಗೆ ಬಂತು' ಅಂತ ಹೇಳಿದಾಗ ಎಲ್ಲ ಒಪ್ಪಿಕೊಂಡರು, ೨೦೦ ರುಪಾಯಿಯನ್ನು ಕೊಟ್ರು. ೧೦೦ ರುಪಾಯನ್ನು ಮುಸ್ಲಿಂ ಸ್ನೇಹಿತನಿಗೆ ಕೊಟ್ಟು, ತಾನು ೧೦೦ ರುಪಾಯನ್ನು ಇಟ್ಕೊಂಡ.

ಇದೇ ರೀತಿ ಇನ್ನೊಮ್ಮೆ ಮುಸ್ಲಿಮ ಸ್ನೇಹಿತನಿಗೆ ೨೦೦ ರುಪಾಯಿ ಬೇಕಾಗುತ್ತೆ, ಹಿಂದೂ ಸ್ನೇಹಿತ ಮಸೀದಿಗೆ ಹೋಗ್ತಾನೆ, ಪ್ರವಚನ ಆಗುತ್ತೆ, ಯಥಾ ಪ್ರಕಾರ ಪ್ರವಚನ ಮಾಡಿದ ಮೌಲ್ವಿಯನ್ನ ಕುರಿತು 'ಪ್ರವಚನ ತುಂಬಾ ಚೆನ್ನಾಗಿತ್ತು, ಆದರೆ ಇನ್ನೊಬ್ಬರ ಮನಸ್ಸಿನಲ್ಲಿ ಇರೋ ವಿಷಯ ವನ್ನ ಹೇಳೋದಿಕ್ಕಾಗಲ್ಲ ಅನ್ನೋದು ವಿಷಯ ಹಿಡಿಸಲಿಲ್ಲ. ಯಾಕೆಂದ್ರ ನಾನ್ ಹೇಳ್ತೀನಿ ಅಂದ, ಆದ್ರೆ ೪೦೦ ರುಪಾಯಿ ಷರತ್ತು ' ಅಂದ, ಎಲ್ಲ ಒಪ್ಕೊಂದ್ರು. ಹೇಗೆ ಅಂತ ಕೇಳಿದಾಗ 'ಈಗ ನಾನು ನಿಮ್ಮ ಮನಸ್ಸಿನಲ್ಲಿ ಇರೋ ವಿಷಯ ಹೇಳ್ತೀನಿ.' ಎಲ್ಲ ಆಯ್ತು ಅಂದ್ರು. 'ಇಡೀ ಪ್ರಪಂಚದಲ್ಲಿ ಇಸ್ಲಾಂ ಧರ್ಮ ಒಂದೇ ಶ್ರೇಷ್ಠ . ಜಗತ್ತಿನ ಎಲ್ಲರನ್ನು ಇಸ್ಲಾಂನ ಅನುಯಾಯಿಗಳಾಗಿ ಮಾಡ್ಬೇಕು' ಎಂದು ಯಾವುದೇ ಕಾರಣಕ್ಕೂ ಅವನು ತಿರಸ್ಕಾರ ಮಾಡಬಾರದು ಅನ್ನೋ ರೀತಿಯಲ್ಲಿ ಹೇಳಿದ. ಮೌಲ್ವಿ ಸರಿ ಅಂತ ಒಪ್ಕೊಂಡು ೪೦೦ ರುಪಾಯಿಯನ್ನು ಕೊಟ್ಟ, ಯಥಾ ಪ್ರಕಾರ ೨೦೦ ರುಪಾಯಿ ಸ್ನೇಹಿತನಿಗೆ, ೨೦೦ ತನಗೆ.

ಮತ್ತೊಮ್ಮೆ ಮುಸ್ಲಿಮ ಸ್ನೇಹಿತನಿಗೆ ೧೦೦೦ ರುಪಾಯಿ ಬೇಕಾಗುತ್ತೆ, ಕೊಡಲು ಮಸೀದಿಗೆ ಹೋಗ್ತಾನೆ, ಯಥಾ ಪ್ರಕಾರ ಪ್ರವಚನ ಮಾಡಿದ ಮೌಲ್ವಿಯನ್ನ ಕುರಿತು 'ಪ್ರವಚನ ತುಂಬಾ ಚೆನ್ನಾಗಿತ್ತು, ಆದರೆ ಪ್ರಳಯ ಆಗುತ್ತೆ ಅನ್ನೋದು ಸುಳ್ಳು. ಪ್ರಳಯ ಖಂಡಿತ ಆಗಲ್ಲ. ಈ ಸಲ ೨೦೦೦ ರುಪಾಯಿ ಷರತ್ತು ' ಅಂದ, ಎಲ್ಲ ಒಪ್ಪಿಕೊಂಡರು. ೨೦೦೦ ರುಪಾಯಿ ಕೊಟ್ರು. ಆದರೆ ಅವನ ಮುಸ್ಲಿಂ ಸ್ನೇಹಿತ ಹೇಗೆ ನಿರೂಪಿಸ್ತೀಯ ಅಂತ ಕೇಳಿದಾಗ 'ಅಲ್ಲ ಕಣಯ್ಯಾ, ಪ್ರಳಯ ಆಗದೆ ಇದ್ರೆ ಏನು ತೊಂದ್ರೆ ಇಲ್ಲ. ಅಕಸ್ಮಾತ್ ಪ್ರಳಯ ಆದ್ರೆ ಕೊಡೋಕ್ಕೆ ನಾನೂ ಇರೋಲ್ಲ, ತೊಗೊಳಕ್ಕೆ ಅವರು ಇರೋಲ್ಲ ಅಂದ'.

ಸಂಘದ ಕೆಲಸಕ್ಕೆ ವಿಜಯ ಅನ್ನೋದು ಶತಃಸಿದ್ದ. ಅಕಸ್ಮಾತ್ ವಿಜಯ ಸಿಗದೇ ಇದ್ದಲ್ಲಿ ಜಗತ್ತೇ ಇರೋಲ್ಲ ಎನ್ನುವ ನಂಬಿಕೆ ಸ್ವಯಂಸೇವಕರದ್ದಾಗಿರಬೇಕು ಅನ್ನೋ ವಿಷಯವನ್ನ ಸರಸಂಘಚಾಲಕರು ಹೇಳಿದ್ರು.

(ಸಶೇಷ)

'ಶರಿಯಾ' ಇದು ಸರಿಯಾ?

2011-10-21T18:58:00.002+05:30

ಮೊನ್ನೆ ರಾತ್ರಿ ಕಚೇರಿಯಿಂದ ಮನೆಗೆ ಹೊರಡುವಾಗ ಆತ್ಮೀಯರೊಬ್ಬರು ರಾಜ್ಯದ ಕಿರಿಯ ರಾಜಕಾರಣಿಯೊಬ್ಬರ 'ಹೆಂಡತಿಯರನ್ನು ಎಣಿಸಿದವ'ರೊಬ್ಬರು ಪೋಲಿಸ್ ಗೆ ದೂರು ಕೊಟ್ಟಿರುವ ವಿಚಾರ ತಿಳಿಯಿತು. ಮಾರನೆ ದಿನ ದಿನಪತ್ರಿಕೆಯಲ್ಲೂ ಅದೇ ಬಿಸಿ ಬಿಸಿ ಸುದ್ದಿ. ವಿಚಾರ ಸರಿಯಿರಬಹುದು. ಏಕೆಂದರೆ ರಾಜಕಾರಣಿಯೊಬ್ಬರ ವೈಯಕ್ತಿಕ ಜೀವನ ಸಾಮಾಜಿಕ ಜವಾಬ್ದಾರಿ ಹೊಂದಿರುತ್ತದೆ ಎಂದು ಕೇಳಿದ್ದೆ.

ಅವರು ಹಿಂದೂ ಎಂಬ ಕಾರಣಕ್ಕೆ ಮೊದಲ ಹೆಂಡತಿ ಬದುಕಿರುವಾಗಲೇ ಇನ್ನೊಬ್ಬ ಹೆಂಡತಿಯನ್ನು ಹೊಂದುವುದು ಕಾನೂನಿನ ಪ್ರಕಾರ ತಪ್ಪಾಗಿರಬಹುದು. ಆದರೆ 'ಎಲ್ಲೆಡೆಯಲ್ಲೂ ಮೀಸಲಾತಿ', ಹಣ ಸಹಾಯ, ವಿಶೇಷ ಸ್ಥಾನಮಾನ ಮುಂತಾದ ಎಲ್ಲ ವಿಷಯಗಳಲ್ಲೂ ಎಷ್ಟು ಸಾಧ್ಯವೂ ಅದಕ್ಕಿಂತ ಹೆಚ್ಚಾಗಿಯೇ ಸಕಲ ಸವಲತ್ತುಗಳನ್ನು ಅನುಭವಿಸಲು ಈ ದೇಶದ ಕಾನೂನಿನ ಸಹಾಯವನ್ನು ಪಡೆಯುವವರು, ಈ ದೇಶದ ಕಾನೂನನ್ನು ಮಾತ್ರ ಒಪ್ಪದೇ ತಮಗೆ ಬೇಕಾದ ವಿಶೇಷ ಕಾನೂನನ್ನು ರಚಿಸಿಕೊಂಡು ಆ ಮೂಲಕ ಅಧಿಕ ಹೆಂಡತಿಯರು, ಅಧಿಕ ಮಕ್ಕಳನ್ನು ಹೊಂದಿ ತಮ್ಮ 'ವ್ಯಾಪಕ'ತೆಯನ್ನು ಹೆಚ್ಚಿಸಿಕೊಳ್ಳುವ ವ್ಯವಸ್ಥೆ ಈ ದೇಶದಲ್ಲಿ ಮಾತ್ರ ನೋಡುವಂಥದನ್ನು ನೆನೆದು ಖೇದವುಂಟಾಯಿತು.

ಇತ್ತೀಚಿಗೆ ಜಪಾನಿಗೆ ಹೋದಾಗ ಸಹೋದ್ಯೋಗಿಯೊಬ್ಬರ ಜತೆ ಮಾತಾಡುವಾಗ ನಮ್ಮ ದೇಶ ಈ 'ಎರಡು ಕಾನೂನಿನ' ಬಗ್ಗೆ ಉಲ್ಲೇಖಿಸಿದಾಗ ಅವರಿಗೂ ಅದೇ ಆಶ್ಚರ್ಯ..! ಆದರೆ ತಕ್ಷಣವೇ ಅವರಿಗೆ ನಮ್ಮ ದೇಶ ದ ಎಲ್ಲ ಆಂತರಿಕ ಸಮಸ್ಯೆಗಳಿಗೆ ಕಾರಣ ಅರ್ಥವಾಗಿ ಹೋಯಿತು.

ಈ ದೇಶದ ಅಭ್ಯುದಯವನ್ನು ಅಪೇಕ್ಷಿಸುವ ಹಾಗು ದೇಶದ ಸಮಗ್ರತೆಯನ್ನು ಎತ್ತಿಹಿಡಿಯುವ ಪ್ರತಿಯೊಬ್ಬರೂ ಸ್ವಯಿಚ್ಚೆಯಿಂದ ಈ ದೇಶದ ಕಾನೂನನ್ನು 'ಮಾತ್ರ' ಗೌರವಿಸಿ ಅನುಸರಿಸುವ ಪರಿಸ್ಥಿತಿ ಎಂದಿಗೆ ನಿರ್ಮಾಣವಾಗುದೋ, ನಮ್ಮ ದೇಶದ ಎಲ್ಲ ಆಂತರಿಕ ಸಮಸ್ಯೆಗಳು ಎಂದಿಗೆ ಬಗೆಹರಿಯುವುದೋ ಎಂಬ ಹಗಲುಗನಸು ನನಸಾಗುವುದು ಆವಾಗ?

ಜಪಾನಿನಾನುಭವ - ೧ : ಶಿನ್ ಕಾನ್ ಸೆನ್ ಬುಲೆಟ್ ಟ್ರೈನಿನಲ್ಲಿ ಪ್ರಯಾಣ

2011-09-22T14:52:00.006+05:30

ಕಳೆದ ಏಪ್ರಿಲ್ 23 ರಿಂದ ಜೂನ್ 6 ರ ವರೆಗೆ ನಾನು ಜಪಾನ್ ಪ್ರವಾಸದಲ್ಲಿದ್ದೆ. ಅಲ್ಲಿನ ಕೆಲ ಅನುಭವಗಗಳಿಗೆ ಅಕ್ಷರ ರೂಪ ಕೊಟ್ಟು ಇಲ್ಲಿಡುವ ಪ್ರಯತ್ನ.

ಜಪಾನಿನಲ್ಲಿ ಬುಲೆಟ್ ರೈಲು ಬಹಳ ಪ್ರಸಿದ್ದಿ. ಅವನ್ನು ಶಿನ್ ಕಾನ್ ಸೆನ್ ಎಂದು ಕರೆಯುತ್ತಾರೆ. ಅದರಲ್ಲಿ ಪ್ರಯಾಣ ಮಾಡಲು ಮನಸ್ಸು ತವಕಿಸುತ್ತಿತ್ತು. ಆದರೆ ಪ್ರಯಾಣ ದುಬಾರಿಯೂ ಹೌದು ಹಾಗು ತೀರ ಹತ್ತಿರದ ಸ್ಥಳಗಳಿಗೆ ಬುಲೆಟ್ ಟ್ರೈನುಗಳ ಸಂಪರ್ಕವಿರುದಿಲ್ಲ. ಈ ಕಾರಣಕ್ಕಾಗಿ ಬುಲೆಟ್ ರೈಲಿನಲ್ಲಿ ಪ್ರಯಾಣಿಸಿದಂತಾಗಬೇಕು, ಹತ್ತಿರದ ಪ್ರಯಾಣವೂ ಆಗಬೇಕು(ವೆಚ್ಚ ಕಡಿಮೆ ಮಾಡಲು) ಹಾಗು ಹೋದ ಸ್ಥಳದಲ್ಲಿ ಏನಾದರೂ ನೋಡುವಂತಿರಬೇಕು ಎಂಬ ಉದ್ದೇಶವನ್ನಿಟ್ಟುಕೊಂಡು ಹುಡುಕಿದಾಗ ತೋಚಿದ್ದೇ ಓಡಾವರದ ಕೋಟೆ (Odawara Castle). ನನ್ನ ಆತ್ಮೀಯ ಸಹೋದ್ಯೋಗಿಯ ಸಹಾಯದಿಂದ ಟ್ರೈನುಗಳ ವಿವರ, ಮಾರ್ಗಗಳು ಮುಂತಾದ ಟಿಪ್ಪಣಿಗಳನ್ನು ಬರೆದುಕೊಂಡು ಹೊರಟುನಿಂತೆ.

ನಾನಿದ್ದ ಇಸೋಗೋಯಿಂದ ಹಿಗಾಶಿ-ಕನಗವ, ಅಲ್ಲಿಂದ ಶಿನ್-ಯೋಕೋಹಾಮ ತನಕ ಎಲೆಕ್ಟ್ರಿಕ್ ಟ್ರೈನ್ (ಕೆಯಿನ್-ತೊಹೊಕು ನೆಗಿಷಿ ಲೈನ್ ಮತ್ತು ಜೆಆರ್ ಯೋಕೋಹಾಮ ಲೈನ್ )ನಲ್ಲಿ ಹೋಗಿ ಅಲ್ಲಿಂದ ಶಿನ್ ಕಾನ್ ಸೆನ್ ಕೊಡಾಮ 807 ಎಂಬ ಬುಲೆಟ್ ಟ್ರೈನ್ ನಲ್ಲಿ ಓಡಾವರ ತಲುಪಿದೆ.

ಬುಲೆಟ್ ರೈಲಿಗೆ ಇದು ಕಡಿಮೆ ಅಂತರವಾದ್ದರಿಂದ ಸಾಧಾರಣ ವೇಗದಲ್ಲಿ ಚಲಿಸುತ್ತದೆ. ಸರಿಸುಮಾರು ೬೦ ಕಿಲೋಮೀಟರು ಗಳಿರುವ ಶಿನ್-ಯೋಕೋಹಾಮದಿಂದ ಓಡಾವರಕ್ಕೆ ೧೪ ನಿಮಿಷಗಳಲ್ಲಿ ತಲುಪಿದೆ! ಪ್ರಯಾಣ ಮಾಡಿದ್ದೆ ಗೊತ್ತಾಗಲಿಲ್ಲ. ಬೇರೆ ರೈಲುಗಳಲ್ಲಿ ಆಗುವ ವೈಬ್ರೆಶನ್ ಬುಲೆಟ್ ಟ್ರೈನಿನಲ್ಲಿ ಇರದ ಕಾರಣ ರೈಲು ಚಲಿಸುತ್ತಿರುವುದೇ ಅನುಭವಕ್ಕೆ ಬಾರದು. ಕಿಟಕಿಯಿಂದ ಹೊರಗೆ ನೋಡಿದಾಗ ಮಾತ್ರ ರೈಲಿನ ವೇಗ ತಿಳಿಯುತ್ತದೆ.

ನಾನು ಓಡಾವರದಲ್ಲಿ ಇಳಿದು ಓಡಾಡುವ ಶಿನ್ ಕಾನ್ ಸೆನ್ ಬುಲೆಟ್ ಟ್ರೈನುಗಳನ್ನು ಕೆಲಕಾಲ ನೋಡಿ ಹೋಗುವ ಎಂದು ಕೂತ ಮರುಕ್ಷಣವೇ ಒಂದು ಟ್ರೇನು ಓಡಾವರದಲ್ಲಿ ನಿಲ್ಲಿಸದೆ ಹೋಯಿತು. ಕೇವಲ ೧ ಸೆಕೆಂಡುಗಳಲ್ಲಿ ಟ್ರೇನು ಮಾಯ..! ನಾನು ಟ್ರೈನನ್ನು ನೋಡಿದ್ದು ಕನಸಾ ಎಂಬ ಮಟ್ಟಿಗೆ ವೇಗದಲ್ಲಿ ಚಲಿಸಿ ಕಣ್ಮರೆಯಾಯಿತು.!

ಓಡಾವರದಲ್ಲಿ ಕೆಲ ಹೊತ್ತು ಹೋಗುವ-ಬರುವ ಬುಲೆಟ್ ಟ್ರೈನುಗಳ ಫೋಟೋಗಳು ಹಾಗು ವೀಡಿಯೊಗಳನ್ನ ಫೇಸ್ ಬುಕ್ಕಿಗಾಗಿ ತೆಗೆದುಕೊಂಡು ಅಲ್ಲಿಂದ ಓಡಾವರದಕೋಟೆಯನ್ನ (Odawara Castle) ಹುಡುಕಿಕೊಂಡು ಹೊರಟೆ.

ಒಟ್ಟಿನಲ್ಲಿ ಶಿನ್ ಕಾನ್ ಸೆನ್ ಟ್ರೈನಿನಲ್ಲಿ ಪ್ರಯಾಣ ಮಾಡಬೇಕೆಂಬ ಆಸೆ ಈಡೇರಿತ್ತು. ಆದರೆ ಇನ್ನು ಹೆಚ್ಚಿನ ವೇಗದ ಬುಲೆಟ್ ಟ್ರೈನಾದ 'ಹಯಬುಸ' ದಲ್ಲಿ ಯಾವಾಗ ಪ್ರಯಾಣ ಮಾಡುವೆನೋ... ಎಂಬ ಆಸೆ ಹುಟ್ಟಿತ್ತು.

ಜಪಾನಿನ ರೈಲುಗಳಲ್ಲಿ ಯಾರು ಜೋರಾಗಿ ಮಾತಾಡುವುದಿಲ್ಲ. ನಾವು ಮಾತಾಡಿದರೆ ನಮ್ಮ ಮಾತು ಮಾತ್ರ ಕೇಳುತ್ತದೆ ಇಡೀ ನಮ್ಮ ಭೋಗಿಗೆ. ಇದೆಲ್ಲ ನೋಡಿ, ಜಪಾನಿನ ಟ್ರೈನುಗಳು ನೋಡಲು ಅಥವಾ ಒಮ್ಮೆ ಪ್ರಯಾಣಿಸಲು ಚೆಂದ. ಆದರೆ ನಮ್ಮ ದೇಶದ ರೈಲುಗಳಲ್ಲಿ ಸಿಗುವಷ್ಟು ಆನಂದ ಅಲ್ಲಿ ಸಿಗುವುದಿಲ್ಲ ಎಂಬುದು ಮಾತ್ರ ಖಾತರಿಯಾಯಿತು.

ಶಿವಮೊಗ್ಗ : ಪ್ರತಿಷ್ಟಿತ ಹಿಂದೂಮಹಾಸಭಾ ಗಣಪತಿ ವಿಸರ್ಜನೆ

2011-09-12T17:40:00.006+05:30

ಮೊನ್ನೆ ಭಾನುವಾರ ದಿನಾಂಕ ೧೧-೦೯-೨೦೧೧ ರಂದು ಶಿವಮೊಗ್ಗದ ಪ್ರತಿಷ್ಟಿತ ಹಿಂದೂ ಮಹಾಸಭಾದವತಿಯಿಂದ ಪ್ರತಿಷ್ಟಾಪಿಸಿದ ಗಣಪತಿಯ ವಿಸರ್ಜನಾ ಮಹೋತ್ಸವ ಸುಮಾರು ೧೦, ೦೦೦ ಜನರ ಸಮ್ಮುಖದಲ್ಲಿ , ಸುಮಾರು ೨೦೦೦ ಕ್ಕೂ ಹೆಚ್ಚು ಪೋಲೀಸರ ಬಿಗಿ ಬಂದೋಬಸ್ತ್ ನಲ್ಲಿ, ಅತ್ಯಂತ ವೈಭವೋಪೇತವಾಗಿ ಹಾಗು ಅತ್ಯಂತ ಶಾತಿಯುತವಾಗಿ ನೆರವೇರಿತು. ಭಾನುವಾರ ಬೆಳಿಗ್ಗೆ ಸುಮಾರು ೧೧ ರ ವೇಳೆಗೆ ಪ್ರಾರಂಭವಾದ ಮೆರವಣಿಗೆಗೆ ಹಲವಾರು ಜಾನಪದ ಕಲಾವಿದರ, ಚಂಡಿ ಮೇಳದವರ ಉಪಸ್ಥಿತಿ, ನೆರೆದಿದ್ದ ಭಕ್ತ ಸಮೂಹವನ್ನು ಸದಾ ಉತ್ಸಾಹದಲ್ಲಿರುವಂತೆ ಹುರಿದುಂಬಿಸುತ್ತಿತ್ತು.

ಮೆರವಣಿಗೆ ಸಾಗುವ ಮಾರ್ಗದಲ್ಲಿ ಎಲ್ಲಿ ನೋಡಿದರೂ ಅಲ್ಲಿ ತಳಿರು ತೋರಣಗಳು, ಕೇಸರಿ ಧ್ವಜಗಳು ಕಣ್ಣಿಗೆ ತಂಪನ್ನೆರೆಯುತ್ತಿತ್ತು. ಭಾರತ ಮಾತಾಕಿ ಜೈ, ವಂದೇ ಮಾತರಂ, ಕಟ್ಟುವೆವು ಕಟ್ಟುವೆವು ರಾಮ ಮಂದಿರ ಕಟ್ಟುವೆವು, ಭಾರತ ಮಾತೆಯ ಸಿಂಧೂರ ಕಾಶ್ಮೀರ ಕಾಶ್ಮೀರ ಎಂಬ ಘೋಷಣೆಗಳು ಹೆಚ್ಚಾಗಿ ಕೇಳಿಸುತ್ತಿದ್ದವು. ಸಾಕಷ್ಟು ಕಡೆ ವೀರ ಸಾವರ್ಕರ್, ಚಂದ್ರಶೇಖರ್ ಆಜಾದ್ ಮುಂತಾದ ಪ್ರಾತಃ ಸ್ಮರಣೀಯ ಕ್ರಾಂತಿಕಾರರ ಭಾಚಿತ್ರಗಳು ಕಾಣಿಸುತ್ತಿದ್ದವು.

ನೆರೆದಿದ್ದ ಭಕ್ತ ಸಮೂಹಕ್ಕೆ ಅಲ್ಲಲ್ಲಿ ನೀರು, ಪಾನಕ, ಲಘು ಉಪಹಾರದ ವ್ಯವಸ್ಥೆಯಿತ್ತು. ಮೆರವಣಿಗೆಯಲ್ಲಿ ಭಾಗವಹಿಸಿದ್ದ ಹಲಾವರು ಮಹಿಳೆಯರು ದೇಶಭಕ್ತಿ ಗೀತೆ - ಭಜನೆಗಳನ್ನು ಹಾಡುತ್ತ ಮೆರವಣಿಗೆಗೆ ಶ್ರದ್ಧೆ ತುಂಬುತ್ತಿದ್ದುದು ಕಂಡು ಬಂತು. ಈ ನಡುವೆ ಕೆಲ ಕಾಲ ಮಳೆ ಬಂದು ಅಡ್ಡಿಪಡಿಸಲೆತ್ನಿಸಿದರೂ ಜನರ ಉತ್ಸಾಹ ನೋಡಿ ನಂತರ ಸುಮ್ಮನಾಯಿತು.

ನಗರದ ಗಾಂಧೀ ಬಜಾರ್ , ಶಿವಪ್ಪನಾಯಕ ವೃತ್ತ, ಗೋಪಿ ವೃತ್ತ, ಶಿವಮೂರ್ತಿ ವೃತ್ತ, ಜೈಲ್ ವೃತ್ತ, ಮಹಾವೀರ್ ವೃತ್ತ ಹಾಗು ಕಾನ್ವೆಂಟ್ ವೃತ್ತಗಳ ಮೂಲಕ ಸಾಗಿದ ಮೆರವಣಿಗೆ ರಾತ್ರಿ ಸುಮಾರು ೧೧ ಗಂಟೆಯ ಸುಮಾರಿಗೆ ಮುಕ್ತಾಯವಾಗಿ ಮೂರ್ತಿಯನ್ನು ತುಂಗಾ ನದಿಯಲ್ಲಿ ವಿಸರ್ಜಿಸಲಾಯಿತು.

ಧಾರ್ಮಿಕ ವಿಷಯ ಅತ್ಯಂತ ಸೂಕ್ಷ್ಮ ಹಾಗು ಅವರವರ ನಂಬಿಕೆಗೆ ಬಿಟ್ಟ ವಿಷಯ. ಬೇರೆಯವರ ಶ್ರದ್ಧಾ-ನಂಬಿಕೆಗಳ ವಿರುಧ್ಧ ದುಷ್ಟ ಕೃತ್ಯಗಳನ್ನು ಎಸಗುವವರ ಪುಂಡರಿಗೆ ಇದನ್ನು ಅರ್ಥ ಮಾಡಿಸಲು ಇಂತಹ ಸಾಮಾಜಿಕ ಜಾಗೃತಿಯ ಕಾರ್ಯಕ್ರಮಗಳು ಅವಶ್ಯವೂ ಹೌದು, ಅನಿವಾರ್ಯವೂ ಹೌದು.

'ಸಂಸ್ಕೃತ ಗ್ರಾಮ' ಮತ್ತೂರಿನ ಹಿರಿಮೆಗೆ ಮತ್ತೊಂದು ಗರಿ - ಪುರಾತನ ದೇವಸ್ಥಾನದ ಲೋಕಾರ್ಪಣೆ

2011-06-23T11:01:00.005+05:30

ಸಂಸ್ಕೃತ ಭಾಷೆಯ ಬಗ್ಗೆ ಕೇಳಿದವರಿಗೆ ಮತ್ತೂರಿನ ಬಗ್ಗೆ ವಿಶೇಷವಾಗಿ ಹೇಳಬೇಕಾಗಿಲ್ಲ. ಸಂಸ್ಕೃತ ಭಾಷೆಯ ಬಗ್ಗೆ ಅತ್ಯಂತ ಕಾಳಜಿ ಹೊಂದಿರುವ ಹಾಗು ಆ ಕಾಳಜಿಯನ್ನು ತನ್ನದೇ ಆದ ರೀತಿಯಲ್ಲಿ ಅಭಿವ್ಯಕ್ತಗೊಳಿಸುತ್ತಿರುವ ಗ್ರಾಮ ಮತ್ತೂರು. ಸಂಸ್ಕೃತ ಭಾಷೆಯನ್ನು ಕಲಿಯಲು ಹಾಗೂ ಗ್ರಾಮವನ್ನು ನೋಡಲು ವಿದೇಶೀಯರಾದಿಯಾಗಿ ಬಂದವರು ಸಾಕಷ್ಟು ಮಂದಿ. ನಮ್ಮ ಮನೆಯಲ್ಲೂ ಉಳಿದವರು ಅವಿರಾಚನ್ ಎಂಬ ಜರ್ಮನ್ ಕಂ ಕೇರಳದವರು.

ಈಗ ಮತ್ತೂ ರಿನ ಹಿರಿಮೆಗೆ ಮತ್ತೊಂದು ಗರಿ ಸೇರ್ಪಡೆಯಾಗಿದೆ. ಸುಮಾರು ೧೪೦೦ ವರ್ಷದ ಇತಿಹಾಸವಿರುವ ಶ್ರೀ ಭೀಮೇಶ್ವರ ದೇವಸ್ಥಾನ ಸದ್ದುಗದ್ದಲವಿಲ್ಲದೆ, ಯಾವುದೇ ಆಡಂಬರವಿಲ್ಲದೆ, ರಾಜಕೀಯದ ಲೇಪನವಿಲ್ಲದೆ ಎದ್ದು ನಿಂತಿದೆ. ಮತ್ತೂರಿನಿಂದ ಸುಮಾರು ೧ ಕಿಲೋಮೀಟರ್ ನ ದೂರದಲ್ಲಿ ಈ ದೇವಸ್ಥಾನ ಸಾರ್ವಜನಿಕರ ದರ್ಶನಕ್ಕೆ ಲಭ್ಯವಿದೆ. ಸಮೃದ್ಧ ತುಂಗಾ ನದಿಯ ದಡದಲ್ಲಿ ಶುದ್ಧ ಹಸಿರಿನ ರಮಣೀಯ ವಾತಾವರಣದ ಮಡುವಿನಲ್ಲಿ ಅತ್ಯಂತ ಪುರಾತನವಾದ ಆದರೆ ಅವಸಾನದ ಅಂಚಿನಲ್ಲಿದ್ದ ಈ ದೇವಸ್ಥಾನವನ್ನು ಮರು ಜೋಡಿಸಿ ಧಾರ್ಮಿಕ ವಿಧಿ ವಿಧಾನಗಳ ಮೂಲಕ ಸಾರ್ವಜನಿಕರ ದರ್ಶನಕ್ಕೆ ಅನುವುಮಾಡಿಕೊಡಲಾಗಿದೆ.

ಸೂರ್ಯೋದಯವಾದ ಮರುಕ್ಷಣದಲ್ಲೇ ಸೂರ್ಯನ ಪ್ರಥಮ ಕಿರಣ ದೇವಾಲಯದ ಒಳಗಿರುವ ಈಶ್ವರ ಲಿಂಗದ ಮೇಲೆ ಬೀಳುವ ದೃಶ್ಯ ಕ್ಕೆ ಇತಿಹಾಸವಿರುವ ಬಗ್ಗೆ ನಂಬಿಕೆಯಿದೆ. ಅತ್ಯಂತ ಪುರಾತನವಾದ ಈ ದೇವಸ್ಥಾನ ಹಲವು ಇತಿಹಾಸ ಹಾಗೂ ವಿಶೇಷ ನಂಬಿಕೆಗಳಿಂದ ಕೂಡಿದ್ದು ಕೇವಲ ದೈವಭಕ್ತರಿಗಷ್ಟೇ ಅಲ್ಲದೆ ಇತಿಹಾಸದ ಅಧ್ಯಯನಕಾರರಿಗೂ ಇದು ಹಲವು ವಿಶೇಷ ಮಾಹಿತಿಗಳನ್ನೂ ಒದಗಿಸಬಲ್ಲುದಾಗಿದೆ. ಕಾರಣ, ತುಂಗಾ ನದಿಯ ದಡದಲ್ಲಿ ಇದೆ ರೀತಿಯ ಪುರಾತನವಾದ ದೇವಸ್ಥಾನಗಳು ಇರುವಿಕೆಯ ಬಗ್ಗೆ ಹಲವಾರು ಮಾಹಿತಿಗಳು ಕಾಣಸಿಗುತ್ತವೆಯಂತೆ.

ಒಂದು ಒಳ್ಳೆಯ ದೈವಿಕ ವಾತಾವರಣವನ್ನು ನಿರ್ಮಿಸುವ ಉದ್ದೇಶದಿಂದ ಹಾಗೂ ಪ್ರಾಚೀನ ದೇವಾಲಯದ ರಕ್ಷಣೆಯ ಕಾರಣಕ್ಕಾಗಿ ಸಾಕಷ್ಟು ಶ್ರಮ ವಹಿಸಿ ದೇವಸ್ಥಾನದ ಜೀರ್ಣೋದ್ಧಾರದ ಕೆಲಸವನ್ನು ಬಹುತೇಕ ಪೂರ್ಣಗೊಳಿಸಿಯಾಗಿದೆ. ಇನ್ನು ಹಲವಾರು ಜನರ ಸಹಾಯ ಹಾಗೂ ಶ್ರದ್ಧೆಯ ಅವಶ್ಯಕತೆಯಿದೆ. ಎಲ್ಲ ಸಹೃದಯ ಆಸ್ತಿಕರಿಗೂ ಹಾಗೂ ಇತಿಹಾಸದ ಆಸಕ್ತರಿಗೂ ಆತ್ಮೀಯ ಸ್ವಾಗತ.

ವಿಶ್ವ ಸಂಸ್ಕೃತ ಪುಸ್ತಕ ಮೇಳ : ಉತ್ತಮ ಜಾಗೃತಿ

2011-03-10T19:08:00.009+05:30

ಬಹಳ ದಿನಗಳಿಂದ ಬರೆಯಬೇಕು ಎಂದುಕೊಡಿದ್ದರೂ ಆಗಿರಲಿಲ್ಲ. ಸಮ್ಮೇಳನ ನಡೆದ ಬಹಳ ದಿನಗಳ ನಂತರ ಬರೆಯುತ್ತಿದ್ದೇನೆ.
'ವಿಶ್ವಸಂಸ್ಕೃತ ಪುಸ್ತಕ ಮೇಳ' ನಡೆದದ್ದು ಜನವರಿ ೭ ರಿಂದ ೧೧ ರ ವರೆಗೆ. ನಾವು ಸಂಸ್ಕೃತ ಗ್ರಾಮದ 'ಕೈಲಾಗದ' ಪ್ರಜೆಗಳಾಗಿರುವ ಕಾರಣ ಹಾಗು ಬರದಿರುವವರ ಮುಂದೆ ಸಂಸ್ಕೃತ ಮಾತನಾಡಲು ಬರುವ ಕಾರಣ ನಾನು ಸಹ ಮೇಳವನ್ನು ನೋಡಲು ಹೋಗಿದ್ದೆ.

ಅಲ್ಲಿ ಕಾದಿತ್ತು ಅಚ್ಚರಿ ಹಾಗು ಸಂತೋಷ. 'ಮೃತ ಭಾಷೆ' ಎಂದು ಕೆಲ ಬುದ್ದಿ(ಇಲ್ಲದ)ಜೀವಿಗಳು ಮೂದಲಿಸುವ ಸಂಸ್ಕೃತಕ್ಕೆ ಸಂಬಧಿಸಿದ ಒಂದು ಸಮ್ಮೇಳನಕ್ಕೆ ಬಂದ ಜನಸಾಗರ ವನ್ನು ನೋಡಿ ನಿಜವಾಗಲು ಎಷ್ಟು ಆಶ್ಚರ್ಯ ಆಯ್ತು ಅಂದರೆ ಎಲ್ಲೂ ಸರಿಯಾಗಿ ಜಾಗವಿಲ್ಲದನ್ನು ನೋಡಿ ವಾಪಸ್ ಮನೆಗೆ ಹೊಗುವಂತಾಗಿತ್ತು. ಪುಸ್ತಕ ಮಳಿಗೆ ಗಳಲ್ಲಿ ಕೊಂಡುಕೊಳ್ಳುವು ದಿರಲಿ , ಪುಸ್ತಕಗಳನ್ನು ನೋಡಲೂ ಸಾಧ್ಯವಾಗಲಿಲ್ಲ ಆ ಜನ ದಟ್ಟಣೆಯಲ್ಲಿ.

ಆದರೆ ಒಂದು ಉತ್ತಮ ವಾತಾವರಣವನ್ನು ಹಾಗು ಸಂಸ್ಕೃತ ಭಾಷೆಯ ಬಗ್ಗೆ ಜಾಗೃತಿಯನ್ನು ಉಂಟು ಮಾಡುವಲ್ಲಿ ನಡೆದ ಪುಸ್ತಕ ಮೇಳ ಖಂಡಿತ ಪರಿಣಾಮಕಾರಿಯಾಯಿತು ಎಂಬುದು ನನ್ನ ಅಭಿಪ್ರಾಯ. ಆ ಸಲುವಾಗಿನ ನೆನಪಿಗೋಸ್ಕರ ಕೆಲ ಭಾವ ಚಿತ್ರಗಳನ್ನು ನನ್ನ ಬ್ಲಾಗುಸ್ತಕ ದಲ್ಲಿ ಹಿಡಿದಿಡುವ ಪ್ರಯತ್ನ ವಷ್ಟೇ.

ನಾನು ಮತ್ತೂರಿನವನು ಎಂದು ಹೇಳಿದ ತಕ್ಷಣ 'ಸಂಸ್ಕೃತ ಬರುತ್ತಾ?' ಎಂದು ಕೇಳುವವರೇ ಹೆಚ್ಚು. ಬರುತ್ತೆ ಎಂದು ಹೇಳುವುದರಲ್ಲಿ ನಮಗೆ ಹೆಮ್ಮೆ ಇದೆ.

ಸಾಮಾನ್ಯವಾಗಿ ಯಾರಿಗೆ ದೇಶದ ಬಗೆಗೆ ಅಭಿಮಾನ, ಶ್ರಧ್ಧೆಗಳು ಪ್ರಾಮಾಣಿಕವಾಗಿರುತ್ತದೋ ಅಂತಹ ಮೂರ್ಖರಿಗೆ ಸಂಸ್ಕೃತದ ಬಗ್ಗೆ ಸ್ವಲ್ಪವಾದರೂ ಹೆಮ್ಮೆ ಇದ್ದೇ ಇರುತ್ತದೆ. ನಮ್ಮ ದೇಶಕ್ಕೆ ತನ್ನದೇ ಆದ ಹಿರಿಮೆಗಳಿರುವುದರ ಕಾರಣಗಳಲ್ಲಿ ಸಂಸ್ಕೃತ ಭಾಷೆಯೂ ಒಂದು. ಸಂಸ್ಕೃತದ ಬಗ್ಗೆ ಶ್ರದ್ಧಾ-ಗೌರವಗಳನ್ನು ಆಚರಿಸುವುದು ನಮ್ಮ ಕರ್ತವ್ಯವೂ ಹೌದು.

ನಮ್ಮ ಬದ್ಧತೆ ವಿಚಾರಕ್ಕೋ, ಸ್ವಾರ್ಥಕ್ಕೋ?

2011-02-26T15:27:00.004+05:30

ಅಮೆರಿಕಾದಲ್ಲಿ ೨ ವಾರ ಪತ್ರಿಕೆಗಳು ನಡೆಯುತ್ತಿದ್ದವು. ಎರಡೂ ಪತ್ರಿಕೆಗಳ ಮಾರಾಟ ದಿನೇ ದಿನೇ ಆಶ್ಚರ್ಯಕರ ರೀತಿಯಲ್ಲಿ ಹೆಚ್ಚಾಗುತ್ತಿದ್ದವು. ಏಕೆಂದರೆ ಒಂದು ಪತ್ರಿಕೆ ಇನ್ನೊಂದು ಪತ್ರಿಕೆಯಲ್ಲಿ ಅಚ್ಚಾದ ಸುದ್ದಿಗಳ ಕುರಿತಾಗಿ ತೀಕ್ಷ್ಣವಾಗಿ ಟೀಕಿಸುತ್ತಾ, ವಿಮರ್ಶಾತ್ಮಕವಾಗಿ ಬರೆಯುತ್ತಿತ್ತು. ಅವಹೇಳನ ಮಾಡುತ್ತಿತ್ತು. ತಪ್ಪುಗಳನ್ನು ಎತ್ತಿ ಹಿಡಿಯುತ್ತಿತ್ತು. ಇನ್ನೊಂದು ಪತ್ರಿಕೆಯೂ ಅದೇ ರೀತಿಯಲ್ಲಿ ವಿಶ್ಲೇಷಣೆ ಮಾಡುತ್ತಾ ಬರೆಯುತ್ತಿತ್ತು. ಆ ಕಾರಣಕ್ಕಾಗಿ ಒಂದು ಪತ್ರಿಕೆ ಇನ್ನೊಂದು ಪತ್ರಿಕೆಯನ್ನ ಯಾವ ರೀತಿಯಲ್ಲಿ ಟೀಕಿಸುತ್ತದೆ ಎಂಬುದನ್ನು ತಿಳಿದುಕೊಳ್ಳುವ ಸಲುವಾಗಿ ಜನರು ಪ್ರತಿ ವಾರ ಕುತೂಹಲದಿಂದ ಎರಡೂ ಪತ್ರಿಕೆಯನ್ನು ಕೊಂಡು ಓದುತ್ತಿದ್ದರು. ಹೀಗೆ ದಿನೇ ದಿನೇ ಪತ್ರಿಕೆಯ ಪ್ರಸಾರ ಬೆಳೆಯುತ್ತ ಹೋಯಿತು. ರಾಷ್ಟ್ರ ಮಟ್ಟದಲ್ಲಿ ಸುದ್ದಿಯಾಯಿತು.

ಇದನ್ನೆಲ್ಲಾ ಗಮನಿಸುತ್ತಿದ್ದ ಅಲ್ಲಿನ ಸಚಿವನೊಬ್ಬ ತನ್ನ ಜನ್ಮದಿನೋತ್ಸವದ ಆಚರಣೆಗೆ ಎರಡೂ ಪತ್ರಿಕೆಯ ಸಂಪಾದಕನನ್ನು ಕರೆಯಬೇಕೆಂಬ ಆಸೆಯಿಂದ ಎರಡೂ ಪತ್ರಿಕೆಯ ಕಚೇರಿಗೆ ಆಹ್ವಾನವನ್ನು ಕಳಿಸಿದ. ಈ ಮೂಲಕ ತನ್ನ ಪ್ರಸಿದ್ದಿಯನ್ನು ಹೆಚ್ಚಿಸಿಕೊಳ್ಳಬೇಕೆಂಬ ಉದ್ದೇಶ ಹೊಂದಿದ್ದ. ಆಚರಣೆಯ ದಿನ ಬಂತು. ಸಂಜೆಯಿಂದಲೇ ಇಬ್ಬರು ಸಂಪಾದಕರಿಗೂ ಕಾಯುತ್ತಲಿದ್ದ. ಸುಮಾರು ೭ ರ ವೇಳೆಗೆ ಒಬ್ಬ ಸಂಪಾದಕ ಬಂದ. ಸಚಿವ ಬರಮಾಡಿಕೊಂಡ. ಇನ್ನೊಬನಿಗೆ ಕಾಯುತ್ತಿರುವಾಗ ಮೊದಲಿನವನು 'ಯಾರಿಗೆ ಕಾಯುತ್ತಿರುವಿರಿ?' ಎಂದು ಕೇಳಿ ಇನ್ನೊಂದು ಪತ್ರಿಕೆಯ ಸಂಪಾದಕನಿಗೆ ಎಂದ ಸಚಿವನಿಗೆ ಆಶ್ಚರ್ಯ ಕಾದಿತ್ತು. ಎರಡೂ ಪತ್ರಿಕೆಯ ಸಂಪಾದಕ ಒಬ್ಬನೇ ಆಗಿದ್ದ !!!!!

ನನಗೆ ಪ್ರಸ್ತುತ ಈ ಕಥೆ ಮನಸ್ಸಿಗೆ ಬಂದದ್ದು 'ವೈಚಾರಿಕ ಬದ್ದತೆ'ಯ ವಿಚಾರದ ಬಗ್ಗೆ ಯೋಚಿಸುತ್ತಿರುವಾಗ.ಇಲ್ಲಿ ಸಂಪಾದಕನ ಬದ್ದತೆ ವಿಚಾರಕ್ಕೋ ಅಥವಾ ವ್ಯಾಪರಕ್ಕೋ ? ಇಲ್ಲಿ ಬಹುಶಃ ಈ ಸಂಪಾದಕನ ಉದ್ದೇಶ ತನ್ನ ಪ್ರತಿಭೆಯ ಕಾರಣದಿಂದ ವ್ಯಾಪಾರವಷ್ಟೇ ಇರಬಹುದು.

ನನ್ನೊಬ್ಬ ಬಹಳ ಒಳ್ಳೆಯ ಸ್ನೇಹಿತನೂ ಇದೇ ಸಮಯದಲ್ಲಿ ನೆನಪಿಗೆ ಬಂದ. ಅವನು ಬಹಳ ಒಳ್ಳೆಯ ವಾಗ್ಮಿ. ಸಾಮಾನ್ಯರಿಗಿಂತ ವೈಚಾರಿಕವಾಗೂ ಸಾಕಷ್ಟು ತಿಳಿದುಕೊಂಡವನು. ಅವನ ಇನ್ನೊಂದು ವಿಶೇಷ ವೆಂದರೆ ಯಾವುದೇ ವಿಷಯದ ಕುರಿತಾಗಿ ಪರವಾಗಿಯೂ ಅಥವಾ ವಿರೋಧವಾಗಿಯೂ ಅಷ್ಟೇ ಚೆನ್ನಾಗಿ ಮಾತಾಡಬಲ್ಲ ವಾಗ್ಮಿ. ಹೀಗಿರುವಾಗ ಇಲ್ಲಿ ಅವನ ಬಧ್ಧತೆ ಯಾವ ವಿಚಾರದ ಕಡೆಗೆ ಎಂಬ ಪ್ರಶ್ನೆ ಬಂದಾಗ ಅನುಮಾನ ಎದುರಾಗುತ್ತದೆ. ಇಂತಹ ಸಮಯಗಳಲ್ಲಿ ನಮ್ಮ ಬದ್ದತೆ ವಿಚಾರಕ್ಕೋ ಅಥವಾ ನಮ್ಮ ಸಾಮರ್ಥ್ಯಕ್ಕೋ?

ಯಾಕೆಂದರೆ ಒಮ್ಮೊಮ್ಮೆ ನಮ್ಮ ಬಂಧುಗಳೋ ಅಥವಾ ನಮಗೆ ಹತ್ತಿರದವರೋ ತಪ್ಪು ಮಾಡಿದರೆ ನಾವು ಅದರ ಸಮರ್ಥನೆಗೇ ಹೋಗಿಬಿಡುತ್ತೇವೆ. ಆದರೆ ಅದೇ ತಪ್ಪನ್ನು ಪಕ್ಕದಮನೆಯವರು ಮಾಡಿಬಿಟ್ಟರೆ ಅವರನ್ನು ಜೈಲಿಗೇ ಅಟ್ಟುವಂತೆ ಆಗ್ರಹಿಸುತ್ತೇವೆ. ನಮ್ಮ ಮಗ ಮಾಡಿದ ಸಣ್ಣ ಕಳ್ಳತನ 'ಮಗು ಮಾಡಿದ್ದು'!!! ಪಕ್ಕದ ಮನೆಯ ಹುಡುಗ ಮಾಡಿದ ಕಳ್ಳತನ 'ಬೆಳೆಯುವ ಸಿರಿ ಮೊಳಕೆಯಲ್ಲಿ'...!!!!

ಎಷ್ಟು ಅಸಹ್ಯ ಆಲ್ವಾ ಈ ನಮ್ಮ ಸ್ವಜನ ಪಕ್ಷಪಾತದಂತಹ ನಡವಳಿಕೆ ? ಈ ಕಾರಣದಿಂದ ಹಣವಿರುವವರು, ರಾಜಕೀಯ ಶಕ್ತಿಗಳು ತಮ್ಮ ತಮ್ಮ ಆಟಗಳನ್ನು ಸಮಾಜದಲ್ಲಿ ಆಡುತ್ತಲೇ ಬಂದಿದ್ದಾರೆ. ನಾವೂ ಸಾಕಷ್ಟು ಬಾರಿ ಅವುಗಳಿಂದಲೇ ಸ್ವಾರ್ಥಾನುಕೂಲವನ್ನು ಪಡೆಯುತ್ತಲೇ ಬಂದಿದ್ದೇವೆ...

ಕರ್ನಾಟಕದ ಹಲವಾರು ಕಡೆ ನ್ಯಾಯಾಲಯದ ಆದೇಶದ ಮೇರೆಗೆ ಅನಧಿಕೃತ ಧಾರ್ಮಿಕ ಕಟ್ಟಡಗಳನ್ನು ತೆರವುಗೊಳಿಸುವ ವಿಚಾರವಾಗಿ ಹಲವಾರು ಪ್ರತಿಭಟನೆಗಳು ನಡೆದಿವೆ. ಶ್ರಧ್ಧಾ ಭಕ್ತಿಗಳ ಸಂಕೇತವಾದ ಮಂದಿರಗಳನ್ನ ತೆರವುಗೊಳಿಸುವುದು ಅಷ್ಟು ಸಮಂಜಸವಲ್ಲವೆನ್ನುದು ಅಕ್ಷರಶಃ ಸತ್ಯ. ಅದನ್ನು ಅಲ್ಲಗೆಳೆಯುವ ಮಾತೆ ಇಲ್ಲ. ಆದರೆ ಒಂದು ಕಡೆ ತೆರವುಗೊಳಿಸುವುದನ್ನು ಖಂಡಿಸುವ , ಪ್ರತಿಭಟಿಸುವ ನಾಯಕರೇ ಮಗದೊಂದು ಕಡೆ ತಮ್ಮ ಸ್ವಾರ್ಥಕ್ಕೋಸರ ಅಥವಾ ರಾಜಕೀಯ ದುರುದ್ದೇಶಗಳಿಗೋಸ್ಕರ ಅಭಿವೃದ್ಧಿಯ ನೆಪವನ್ನೊಡ್ಡಿ ದೇವಸ್ಥಾನಗಳನ್ನ ನೆಲಸಮ ಮಾಡುವ 'ಆಸಕ್ತಿ'ಯನ್ನು ಹೊಂದಿರುವುದನ್ನು ನೋಡಿ, ಹೇಳಬೇಕಾದವರು ಸುಮ್ಮನಿದ್ದಾರೆ. ಸುಮ್ಮನಿರಬೇಕಾದವರು 'ತಾನು ಮಾಡಿದ್ದೆ ಸರಿ' ಎಂಬ ಧೋರಣೆಯಲ್ಲಿ 'ಮುನ್ನಡೆ'ಯುತ್ತಿದ್ದಾರೆ ಎಂಬ ದುಃಖದಲ್ಲಿ 'ನಮ್ಮ ಬದ್ಧತೆ ವಿಚಾರಕ್ಕೋ, ವ್ಯಕ್ತಿಗೋ, ಸ್ವಾರ್ಥಕ್ಕೋ?' ಎಂಬ ಪ್ರಶ್ನೆ ಹಾಗೆ ಬಂದು

ಕುರುಡು ಕಾಂಚಾಣ ಬಳಿಯಿರದ ನಾವು

ಅಧಿಕಾರ ಬಲವಾ ಪಡೆಯದವರು ನಾವು

ಜನಬಲವನಂತೂ ಅರಿಯದವರು ನಾವು

ಯಾವುದನು ತಾನೇ ಎದುರಿಸಲು ಸಾಧ್ಯ?

ಎದುರಿಸಿದರಂತೂ ಮುಗಿಯಿತು ಕಥೆ

ಇದೆ ತಾನೇ ನಮ್ಮ ಕೈಲಾಗದವರ ವ್ಯಥೆ....

ಎಂಬ ನಾನೇ ಬರೆದ ಸಾಲುಗಳ ನೆನಪಾಗಿ, ಎಲ್ಲ ಆಲೋಚನೆಗಳೂ ಹಾಗೆ ವಾಪಸ್ ಹೋಯಿತು.

ಸೈದ್ಧಾಂತಿಕ ಸಂಸ್ಕಾರದ ಕಾರಣಕ್ಕೆ ರಾಜಕೀಯಕ್ಕೆ ಕಾಲಿಟ್ಟವರೂ ಸಹ ಭ್ರಷ್ಟಾಚಾರದಲ್ಲಿ, ಸುಳ್ಳು ಹೇಳುವಲ್ಲಿ, ಅಕ್ರಮ ಆಸ್ತಿ ಮಾಡಿಕೊಳ್ಳುವಲ್ಲಿ, ಸ್ವಜನಪಕ್ಷಪಾತದಲ್ಲಿ ನಿರತರಾಗಿದ್ದಾರೆ. ಅದಕ್ಕೆ ಉತ್ತರವಾಗಿ, 'ಎಲ್ಲ ಬಿಟ್ಟವರಂತೆ', ಇತರ ಪಕ್ಷಗಳ ನಾಯಕರೂ ಮಾಡಿದ್ದಾರೆ ಎಂಬ ಬೇಜವಾಬ್ದಾರಿತನದ ಉತ್ತರ ಕೊಡುತ್ತಾರೆ. ಛೆ ಇವರೂ ಮನುಷ್ಯರಾ? ಹೇಳುವುದು ಸುಲಭ, ಆದರೆ ರಾಜಕೀಯ ಕ್ಷೇತ್ರದಲ್ಲಿ ಸರಿಯಿರುವುದು ಸುಲಭದ ಮಾತಲ್ಲ ಎನ್ನುವುದು ನಮ್ಮ ನಾಯಕರಿಗೆ ಅಭ್ಯಾಸವಾಗಿ ಬಿಟ್ಟಿದೆ. ಅದನ್ನೇ ದುರುಪಯೋಗ ಮಾಡಿಕೊಂಡು ಭ್ರಷ್ಟಾಚಾರದಲ್ಲಿ ಆಗ್ರಹಪೂರ್ವಕವಾಗಿ ನಿರತರಾಗಿದ್ದಾರೆ. ಎಷ್ಟು ಅಸಹ್ಯ ಆಲ್ವಾ? ಮಾಡಿದ ಅನ್ಯಾಯಗಳನ್ನ ಸಮರ್ಥನೆ ಮಾಡಿಕೊಳ್ಳುವ ಮಟ್ಟಕ್ಕೆ ರಾಜಕೀಯ ನಾಯಕರು ಹೋಗುತ್ತಾರೆ ಎಂದರೆ ಈ ವ್ಯವಸ್ಥೆ ನಮಗೆ ಬೇಕಾ ಎಂಬ ಪ್ರಶ್ನೆಯೂ ಉದ್ಭವವಾಗುತ್ತದೆ. ಆದರೆ ಕಮ್ಯುನಿಸ್ಟ್ ವ್ಯವಸ್ಥೆಗೆ ಹೋಲಿಸಿಕೊಂಡರೆ ನಮ್ಮ ಪ್ರಜಾಪ್ರಭುತ್ವ ಎಷ್ಟೋ ವಾಸಿ ಎಂಬ ಸಮಾಧಾನ ಪಟ್ಟು ಕೊಳ್ಳ ಬೇಕಾಗುತ್ತದೆ.

ನಮ್ಮ ನಾಯಕರಲ್ಲಿ ಒಳ್ಳೆಯ ಕೆಲಸಗಳನ್ನು ಮಾಡುವ ಸಲುವಾಗಿ ಸ್ಪರ್ಧೆ ಏರ್ಪಡಬೇಕು. ಅದನ್ನು ಬಿಟ್ಟು ಭ್ರಷ್ಟಾಚಾರ ದಲ್ಲೇ ಸ್ಪರ್ಧೆ ಏರ್ಪಟ್ಟಿರುವುದು ವಿಪರ್ಯಾಸ. ಹಣಬಲ, ಜನಬಲ, ಅಧಿಕಾರಬಲ ಎಲ್ಲವೂ ಒಬ್ಬರ ಬಳಿಯಲ್ಲೇ ಶೇಖರವಾಗುವುದೂ ಆ ಭಗವಂತನ ಸೃಷ್ಟಿಯ ವಿಪರ್ಯಾಸ. ಎಲ್ಲವನ್ನು ಅವನ ಮೇಲೆ ಹಾಕಿ ನಾವು ಆತ್ಮಸಾಕ್ಷಿಯ ವಿರುದ್ಧವಾಗಿ ನಡೆಯದೇ ಇರುವುದೇ ನಮ್ಮ ಕರ್ತವ್ಯವಾಗಿದೆ. ಹಾಗು ಅದೇ ಸವಾಲಾಗಿದೆ ಕೂಡ.

ಸರಾಗವಾಗಲ್ಲದಿದ್ದರೂ ಸಾಂಗವಾಗಿ ಮುಗಿದ 'ಸಾಂಗತಾ ಯಜ್ಞ'

2011-01-25T19:07:00.007+05:30

ನಮ್ಮ ನಂಬಿಕೆಗಳು, ಶ್ರದ್ಧೆಗಳು, ಯಾವುದೇ ವಿಷಯದ ಕುರಿತಾದಿರಬಹುದು, ನಮಗೆ ಸಮಾಧಾನಪಡಿಸುವಂತಿದ್ದರೆ ಹಾಗು ಒಳ್ಳೆಯ ಚಿಂತನೆ ಮಾಡುವ ರೀತಿಯಲ್ಲಿ ಪ್ರೇರೇಪಿಸುವಂತಿದ್ದರೆ ಆ ನಂಬಿಕೆಗೆ 'ಸರಿಯೋ? ತಪ್ಪೋ?' ಎನ್ನುವ ತರ್ಕ ಬೇಕಿಲ್ಲ ಎಂಬುದು ನನ್ನ ಇತ್ತೀಚೆಗಿನ ಅನಿಸಿಕೆ.

ಇದೇ ವಿಷಯಕ್ಕೆ ಸಂಬಂಧಿಸಿದ್ದು 'ದೇವರು' ಎಂಬ 'ಅನುಭವ'.

ನಾನು ಉದ್ದೇಶಪೂರ್ವಕವಾಗಿಯೇ 'ದೇವರು' ಎನ್ನುವುದನ್ನು 'ಅನುಭವ' ಎಂದು ಕರೆದಿದ್ದೇನೆ. ಆದರೆ ಇದು 'ಪ್ರತ್ಯಕ್ಷ'ವಾಗುವ ಅನುಭವವಲ್ಲ. ನಂಬಿಕೆಯ ಕಾರಣದಿಂದ ಉಂಟಾಗುವ ಅನುಭವ. ನಂಬಿಕೆಯ ನಂತರವಷ್ಟೇ ಅನುಭವದ ಅನುಭವ ಸಾಧ್ಯ ಎನ್ನುವುದು ಮತ್ತೇನೂ ಹೇಳಬೇಕಾಗಿಲ್ಲ.

ಡಿಸೆಂಬರ್ 15 ಮತ್ತು 16 ಹೊಸಹಳ್ಳಿಯಲ್ಲೂ ಹಾಗು 17 ರಿಂದ 19 ರ ವರೆಗೆ ಮತ್ತೂರಿನಲ್ಲೂ ನಡೆದ 'ತೇರಾಕೋಟಿ ರಾಮನಾಮತಾರಕದ ಸಾಂಗತಾಯಜ್ಞ' ಹತ್ತು ಹಲವು ವಿಶೇಷ, ಪರಿಣಾಮ, ಪ್ರೇರಣೆಗಳೊಂದಿಗೆ ಮುಕ್ತಾಯಗೊಂಡದ್ದು ಈಗ ಇತಿಹಾಸ. ಯಜ್ಞದಲ್ಲಿ ಭಾಗವಹಿಸಿದವರು, ಆ ನಂತರದ ಹಾಗು ಆ ಮೊದಲ ಕೆಲವು ಸನ್ನಿವೇಶಗಳನ್ನು ನೋಡಿದಾಗ ನನಗನ್ನಿಸಿದ್ದು ಮೇಲಿನದು.

ಹೆಬ್ಬಳ್ಳಿಯ ಶ್ರೀ ದತ್ತಾವಧೂತ ಮಹಾರಾಜರ ಉಪಸ್ಥಿತಿಯಲ್ಲಿ ನಡೆದ ೫ ದಿನಗಳ ಕಾರ್ಯಕ್ರಮದಲ್ಲಿ ಭಾಗವಹಿಸಿದವರು ೨ ಸಾವಿರಕ್ಕೂ ಹೆಚ್ಚು ಮಂದಿ. ಮೊದಲೆರಡು ದಿನ ಹೊಸಹಳ್ಳಿಯಲ್ಲಿಯೂ ಹಾಗು ನಂತರದ ೩ ದಿನ ಮತ್ತೂರಿನಲ್ಲಿಯೂ ನಡೆದ ಹಲವಾರು ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಬಹುತೇಕ ಬಂದವರೆಲ್ಲರೂ ಭಾಗವಹಿಸಿದುದು ಕಂಡುಬಂತು. ದತ್ತಾವಧೂತರ ಪ್ರವಚನಗಳಿಗೆ ಹದಿಹರೆಯದವರೆನ್ನದೆ ಎಲ್ಲರೂ ದೌಡಾಯಿಸುತ್ತಿದ್ದುದು ಕೆಲವರಿಗೆ ಆಶ್ಚರ್ಯ ಹಾಗು ಮತ್ತೆ ಕೆಲವರಿಗೆ 'ದಾರಿ ತಪ್ಪುತ್ತಿರುವ ಯುವಕರು' ಎಂದೆನಿಸಿದುದೂ ಉಂಟು.

ಪ್ರತಿದಿನದ ಮುಖ್ಯ ಕಾರ್ಯಕ್ರಮಗಳಾದ ರಾಮತಾರಕ ಹೋಮ ಹಾಗು ದತ್ತಾವಧೂತರ ಪ್ರವಚನಗಳಿಗೆ ಜನರು ಕಾದು ಕುಳಿತ್ತಿದ್ದ ಹಾಗೆ ಅನ್ನಿಸುತ್ತಿತ್ತು. ಹೋಮದ ಪೂರ್ಣಾಹುತಿಯವರೆಗೂ ಜನರು ಮಂತ್ರಗಳನ್ನು ಕೇಳುತ್ತಾ ಅಲುಗಾಡದೆ ಕುಳಿತು ಭಾಗವಹಿಸುತ್ತಿದ್ದುದು ಸಾಮಾನ್ಯವಾಗಿತ್ತು. ಹಿಂದೆ ಕಲಿತು ಈಗ ಮರೆತು 'ದಾರಿ ಬಿಟ್ಟಿದ್ದ'ವರಲ್ಲಿ ಕೆಲವರು, ಸಂಪಾದನೆಗೋಸ್ಕರವಲ್ಲದಿದ್ದರೂ ಜತೆಗೆ ಜತೆಯಾಗುವುದಕ್ಕೆ ಕಲಿತ ಮಂತ್ರಗಳನ್ನು ನೆನಪಿಸಿಕೊಳ್ಳುವ ಪ್ರಯತ್ನದಲ್ಲಿದ್ದಾರೆ.

ಧಾರ್ಮಿಕ ಕಾರ್ಯಕ್ರಮದ ವಿಶೇಷ ವಾತಾವರಣದಲ್ಲಿ ಶಾಲೆಗೇ ಇನ್ನೂ ಸೇರದ ಮಕ್ಕಳಾದಿಯಾಗಿ ಎಲ್ಲರ ಕೈಯಲ್ಲಿ ಜಪಮಾಲೆ, ಬಾಯಲ್ಲಿ ರಾಮಜಪ ವನ್ನು ನೋಡುತ್ತಿದ್ದ ಪೋಷಕರಲ್ಲಿ ಸಂತೋಷಪಟ್ಟವರು ಹಾಗು ಭಯಪಟ್ಟವರೂ ಸೇರಿದ್ದಾರೆ. ಆದರೆ ಆ ಸಮಯದಲ್ಲಿ ಇಡೀ ಊರು ರಾಮನಾಮದಲೆಯಲ್ಲಿ ಮುಳುಗಿದ್ದುದು ಮಾತ್ರ ಸತ್ಯ.

ಪ್ರಸ್ತುತ ಈ ಮಟ್ಟದ ಆಧುನಿಕತೆಯ ಅಬ್ಬರದಲ್ಲಿ, 'ಕಾಂಕ್ರೀಟ್ ರಸ್ತೆಗಳ' ಮೇಲೆ ಹಳ್ಳಿಗಳನ್ನು 'ಕಟ್ಟುತ್ತಿರುವಾಗ' ಒಂದು ಸಂಪೂರ್ಣ ಧಾರ್ಮಿಕ ವಾತಾವರಣವನ್ನು ಸೃಷ್ಟಿಸಿ ಜನರನ್ನು ಅದರಲ್ಲಿ ತಲ್ಲೀನರನ್ನಾಗಿಸಿದುದು ವಿಶೇಷವೇ.

ಪ್ರಪ್ರಥಮ 'ವಿಶ್ವ ಸಂಕೇತಿ ಸಮ್ಮೇಳನ'

2011-01-18T17:18:00.009+05:30

ಪ್ರಪ್ರಥಮ 'ವಿಶ್ವ ಸಂಕೇತಿ ಸಮ್ಮೇಳನ' ಅದ್ಧೂರಿಯಾಗಿ ಹಾಗು ಅನೇಕ ವಿಶೇಷತೆಗಳೊಡನೆ ನೆರವೇರಿದೆ. ಸಂಸ್ಕೃತ ಗ್ರಾಮ ಎಂದೇ ಹೆಸರು ವಾಸಿಯಾಗಿರುವ 'ಮತ್ತೂರಿ'ನಲ್ಲಿ 31 ಡಿಸೆಂಬರ್ ನಿಂದ 2 ನೆ ಜನವರಿವರೆಗೆ ನಡೆದ 'ವಿಶ್ವ ಸಂಕೇತಿ ಸಮ್ಮೇಳನ', ಪ್ರಪಂಚದಾದ್ಯಂತ ಹಂಚಿ ಹೋಗಿರುವ ಸಂಕೇತಿ ಸಮುದಾಯವನ್ನು 3 ದಿನಗಳ ಮಟ್ಟಿಗೆ ಒಂದೆಡೆ ಸೇರಿಸುವಲ್ಲಿ ಬಹುತೇಕ ಯಶಸ್ವಿಯಾಗಿದೆ ಎಂತಲೇ ಹೇಳಬಹುದು.

ಅತ್ಯಂತ ಪುಟ್ಟ ಸಮುದಾಯವಾಗಿರುವ 'ಸಂಕೇತಿ ಸಮುದಾಯ' ದವರು ಬಹುತೇಕ ಎಲ್ಲ ದೇಶಗಳಲ್ಲಿಯೂ ನೆಲೆಸಿದ್ದಾರೆ. ನಮ್ಮ ಪ್ರಾಚಿನ ಸಂಸ್ಕೃತಿಗಳಾದ ವೇದ-ಉಪನಿಷತ್ತುಗಳು, ಸಂಸ್ಕೃತ, ವೇದಾಂತ, ಸಂಗೀತ, ಭರತನಾಟ್ಯ, ಮೃದಂಗ ಮುಂತಾದ ಅನೇಕ ವಿಧದ ಕಲೆಗಳು ಮತ್ತು ವಿದ್ಯೆಗಳಲ್ಲಿ ತಮ್ಮದೇ ಆದ ಪ್ರಾವೀಣ್ಯತೆಯನ್ನು ಪಡೆದು ಮೇಲ್ಪಂಕ್ತಿಯನ್ನು ಹಾಕಿಕೊಟ್ಟವರು ಅನೇಕ ಮಂದಿ. ಈ ಕಾರಣದಿಂದ ಸಮ್ಮೇಳನದಲ್ಲಿ ಈ ಎಲ್ಲ ಪ್ರತಿಭೆಗಳ ಅನಾವರಣ ನೋಡುಗರಿಗೆ ಹಾಗು ಕೇಳುಗರಿಗೆ ಅತ್ಯಂತ ಹೆಮ್ಮೆ ಹಾಗು ಸಂತೋಷವನ್ನುಂಟು ಮಾಡಿತು.

ಎಲ್ಲರೂ ತಮ್ಮ ತಮ್ಮ ನೆಚ್ಚಿನ ಸಾಂಪ್ರದಾಯಿಕ ಉಡುಗೆಗಳಲ್ಲಿ ಮೈ ಮರೆತು ಸಮಾವೇಶದಲ್ಲಿ ಭಾಗವಹಿಸುತ್ತ ಒಂದು ಹೊಸ ವಾತಾವರಣದಲ್ಲಿ ಮುಳುಗಿದ್ದರು. ಪುಟ್ಟ ಪುಟ್ಟ ಮಕ್ಕಳ ಖುಷಿಯನ್ನಂತೂ ಕೇಳಲೇಬೇಕಾಗಿಲ್ಲ. ತಮ್ಮ ಮಕ್ಕಳ ಪ್ರತಿಭೆಗಳನ್ನು ತಮ್ಮ ಸಮುದಾಯದವರ ಮುಂದೆ ಅನಾವರಣಗೊಳಿಸಲು ಕಾಯುತ್ತಿದ್ದ ಪೋಷಕರು ಒಂದು ಕಡೆಯಾದರೆ ವೇದಿಕೆಯ ಮೇಲೆ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಲು ತಮ್ಮ ತಮ್ಮ ಸರತಿಗಾಗಿ ಕಾಯುತ್ತಿದ್ದ 'ಪ್ರತಿಭೆ'ಗಳು ಮತ್ತೊಂದು ಕಡೆ. ಕನ್ನಡ ವಾಹಿನಿ ಈ-ಟಿವಿಯ ಪ್ರಸಿದ್ಧ 'ಎದೆ ತುಂಬಿ ಹಾಡುವೆನು' ಖ್ಯಾತಿಯ ಲಕ್ಷ್ಮಿ ನಾಗರಾಜ್, ಇಂದು ನಾಗರಾಜ್ ರಂತಹ ಹೆಸರಾಂತ ಗಾಯಕರ ಕಾರ್ಯಕ್ರಮಗಳಿಗೆ ರಾತ್ರಿ ೧ ಗಂಟೆಯವರೆಗೂ ಶ್ರೋತೃ ಗಳು ಕಾಯುತ್ತಿದ್ದರು.

ಸುಮಾರು ೪೦೦೦ ಜನರನ್ನು ಒಟ್ಟುಗೂಡಿಸಿ, ಮೂರು ದಿನವೂ ದಿನದ ಮೂರೂ ಹೊತ್ತು ಜನರ ಭೋಜನ ವ್ಯವಸ್ಥೆಯನ್ನು ನೋಡಿಕೊಂಡು, ಹಾಗೆಯೇ ಎಲ್ಲ ಹೊತ್ತೂ ಸಾಂಸ್ಕೃತಿಕ ಕಾರ್ಯಕ್ರಮಗಳು, ವಿಚಾರಗೋಷ್ಠಿಗಳು ಹಾಗು ಇನ್ನಿತರ ವಿಶೇಷ ಕಾರ್ಯಕ್ರಮಗಳ ಮೂಲಕ ಸಮ್ಮೇಳನವನ್ನು 'ಸಾಕಷ್ಟು' ವಿಧದ ಜನರಿಗೆ ಮುಟ್ಟುವಂತೆ ಹಾಗು ಅವಿಸ್ಮರಣೀಯವಾಗಿ ನಡೆಯಲು ಕಾರಣರಾದ ಎಲ್ಲ ಸಂಕೇತಿ ಬಂಧುಗಳಿಗೆ ಅಭಿನಂದನೆಗಳು.

ಎಲ್ಲ ಕಾರ್ಯಕ್ರಮಗಳಿಗೂ ಅದರದ್ದೇ ಆದ ಬೇವು ಬೆಲ್ಲಗಳಿದ್ದರೂ ಬೆಲ್ಲಗಳನ್ನು ನೋಡಿ ಸಕಾರಾತ್ಮಕವಾಗಿ ಚಿಂತಿಸುವುದನ್ನು ರೂಢಿಸಿಕೊಳ್ಳುವ ಪ್ರಯತ್ನದಲ್ಲಿ ಇದೂ ಒಂದು ಅಷ್ಟೇ.

"ಸರ್ವೇ ಜನಾಃ ಸಜ್ಜನೋ ಭವಂತು"

-------

ರಾಜೀವರ ಪ್ರವಾಸಗಳು ಯಾವ ರಾಷ್ಟ್ರಕೆಲಸಕ್ಕೆ ಕಡಿಮೆ?

2010-12-27T11:51:00.005+05:30

ಯಾವುದೇ ಒಂದು ಶ್ರೇಷ್ಠ ಸಿದ್ದಾಂತ ಅಥವಾ ಜೀವನಪದ್ದತಿಯ ಬಗ್ಗೆ ಮಾತಾಡುವುದು ಬಹಳ ಸುಲಭ. ಆದರೆ ಪ್ರಸ್ತುತ ಆಚರಣೆಯಲ್ಲಿ ತರುವುದು ಸಾಮಾನ್ಯರಿಗೆ ತುಸು ಕಷ್ಟ. ಆದರೆ ನುಡಿ ಮತ್ತು ನಡೆ ಎರಡರಲ್ಲೂ ಒಂದೇ ಸಮನಾಗಿ ಇರುವುದು ಧ್ಯೇಯ ನಿಮಿತ್ತರಿಗೆ ಮಾತ್ರ ಸಾಧ್ಯ ಎಂದು ಹಿರಿಯರೊಬ್ಬರು ಹೇಳಿದ ನೆನಪು.

ಬಹುಶಃ 10 ವರ್ಷಗಳ ಹಿಂದೆ, ನಮ್ಮ ಊರಿಗೂ ಬಂದಿದ್ದರು. ಬರುವ ಸ್ವಲ್ಪ ಸಮಯಕ್ಕೆ ಮುಂಚೆಯೇ ತಿಳಿದದ್ದು ಅವರು ಬರುತ್ತಾರೆಂದು. ಅದುವರೆಗೆ ಬರೇ ಕ್ಯಾಸೆಟ್ ಗಳಲ್ಲಿ, ಸಿಡಿಗಳಲ್ಲಿ ಕೇಳಿದ್ದೆವು ಅವರ ಮಾತುಗಳನ್ನು. ಹಿಂದಿ ಅರ್ಥವಾಗದಿದ್ದರೂ ಅವರ ಮಾತುಗಳ ಹಿಂದಿದ್ದ ಭಾವನೆಗಳು, ಉದ್ದೇಶಗಳಿಂದಲೇ ಸಾಕಷ್ಟು ಅರ್ಥವಾಗುತ್ತಿತ್ತು. ಅದುವರೆಗೆ ನೇರವಾಗಿ ಯಾರ ಹಿಂದಿ ಭಾಷಣವನ್ನು ಕೇಳಿದ್ದಿಲ್ಲ. ರಾಷ್ಟ್ರೀಯ ಸ್ವಯಂಸೇವಕ ಸಂಘದ 'ಸಂಸ್ಕಾರ'ದ ಕಾರಣದಿಂದ ಮೊದಲೇ ಇದ್ದ 'ಸ್ವದೇಶೀ' ಎಂಬ ಕಲ್ಪನೆಗೆ ಆಚರಣೆಯ ಆಯಾಮವನ್ನು ಕೊಟ್ಟದ್ದು 'ರಾಷ್ಟ್ರಬಂಧು ರಾಜೀವ್ ದೀಕ್ಷಿತ'ರ ನಡವಳಿಕೆ ಹಾಗು ಭಾಷಣಗಳು. ಹೌದು ನಮ್ಮೆಲ್ಲರಿಗೂ ಅವರು ಪರಿಚಯವಿದ್ದದ್ದು 'ರಾಷ್ಟ್ರಬಂಧು' ಎಂತಲೇ. ಅವರ ಭಾಷಣಗಳಿಗಿಂತ ಹೆಚ್ಚಾಗಿ ಅವರ ಜೀವನ ಪದ್ದತಿಯಿಂದಲೇ ಅವರನ್ನು 'ರಾಷ್ಟ್ರಬಂಧು' ಎಂದು ಗುರುತಿಸುತ್ತಿದ್ದೆವು.

ಮೊದಲೇ ಇದ್ದ 'ಸ್ವದೇಶೀ' ನಡವಳಿಕೆಗೆ ಮತ್ತಷ್ಟು ಶ್ರದ್ಧೆ ಹಾಗು ರಾಷ್ಟ್ರಭಕ್ತಿಯನ್ನು ಪೂರೈಕೆ ಮಾಡಿದ ಕೀರ್ತಿ ರಾಜೀವ್ ದೀಕ್ಷಿತರಿಗೆ ಸಲ್ಲಬೇಕು. ಮೊನ್ನೆ ನವಂಬರ್ ೩೦ ರಂದು, ಹುಟ್ಟಿದ ದಿನದಂದೇ ನಮ್ಮನ್ನಗಲಿದ ರಾಜೀವ್ ದೀಕ್ಷಿತರ ಮಾತುಗಳು ನಾಡಿನ ಜನತೆಯಲ್ಲಿ ಉಂಟುಮಾಡಿದ ಪರಿಣಾಮ ಅಕ್ಷರಶಃ ಆಚರಣೆಯಲ್ಲಿದೆಯೇ ಹೊರತು ಯಾವುದೇ ಪ್ರಶಸ್ತಿ ಅಥವಾ ಆಡಂಬರದಲ್ಲಿಲ್ಲ. ಅದೇ ಕಾರಣದಿಂದಲೇ ಅವರ ಅಗಲಿಕೆ ಈ ಭವ್ಯ ಭಾರತದ ಯಾವುದೇ ಪೂರ್ವಾಗ್ರಹ ಪೀಡಿತ ಪತ್ರಿಕೆಗಳಲ್ಲಿ ಸುದ್ದಿಯಾಗದೇ ಬರೇ 'ಮಾಹಿತಿ'ಯಾಯಿತು.

ಮನೆಯಲ್ಲಿದ್ದುಕೊಂಡೇ ರಾಷ್ಟ್ರದ ಕೆಲಸ ಮಾಡುವ ಹಂಬಲವಿರುವವರಿಗೆ 'ಸ್ವದೇಶೀ ಬಳಕೆ' ಎಂಬುದು ಹೆಮ್ಮೆಯ ಜೀವನ ಪದ್ದತಿಯಾಯಿತು. 'ಕಲ್ಪನೆ'ಗೆ 'ಆಂದೋಲನ'ದ ರೂಪ ಕೊಟ್ಟು ಇಡೀ ದೇಶದಲ್ಲಿ ಸಂಚಾರ ಮಾಡಿ ತನ್ನ ಮಾತು ಮತ್ತು ತನ್ನ ನಡತೆಗಳ ಮೂಲಕ ಜನರ ಚಿಂತನೆಗಳನ್ನು ನಿರ್ಧಿಷ್ಟ ದಿಕ್ಕಿನತ್ತ ಕೊಂಡೊಯ್ಯುವುದು ಸಾಮಾನ್ಯ ಸಾಧನೆಯಲ್ಲ. ಲೇಖನಗಳ ಮೂಲಕ ಪ್ರಸಿದ್ಧಿಯನ್ನು ಪಡೆಯುವ 'ಗೀಚಣಿಕರಿ'ಗಿಂತ ರಾಜೀವ ದೀಕ್ಷಿತ್ ರಂತಹವರು ಸಾವಿರ ಪಾಲು ಮೇಲು.

ಸ್ವದೇಶೀ ವಸ್ತುಗಳ ಜೊತೆಗೆ ನಮ್ಮ ದೇಶದ ಉತ್ಪನ್ನಗಳಾದ ಖಾದಿ ಬಟ್ಟೆಗಳನ್ನು ಅತ್ಯಂತ ಹೆಮ್ಮೆಯಿಂದ ಬಳಸುವವರ ನಮ್ಮಂತಹ ಅಸಂಖ್ಯ ಯುವಕರನ್ನು ನಿರ್ಮಾಣ ಮಾಡಿದ ರಾಜೀವರ ಪ್ರವಾಸಗಳು ಯಾವ ರಾಷ್ಟ್ರಕೆಲಸಕ್ಕೆ ಕಡಿಮೆ? ಬಹುಶಃ ಗಾಂಧೀಜಿಯವರ ನಂತರ ಖಾದಿ ಬಟ್ಟೆಗೆ 'ಬಳಕೆಯ ಬೆಲೆ' ತಂದುಕೊಡುವಲ್ಲಿ ರಾಜೀವರು ಅಗ್ರಗಣ್ಯರು ಎಂದರೆ ಅತಿಶಯೋಕ್ತಿಯಲ್ಲ.

ಅತ್ಯಂತ ಕಡಿಮೆ ವಯಸ್ಸಿಗೆ ಅಸಂಖ್ಯರ ಮನಸ್ಸಿನಲ್ಲಿ 'ದೇಶೀಯತೆ'ಯ ಛಾಪನ್ನು ಮೂಡಿಸಿ ಇಹಲೋಕ ತ್ಯಜಿಸಿದ 'ರಾಷ್ಟ್ರಬಂಧು ರಾಜೀವ್ ದೀಕ್ಷಿತ'ರಿಗೆ ಅತ್ಯಂತ ಭಾವಪೂರ್ಣ ಶ್ರದ್ಧಾಂಜಲಿ.

-----------------------------------------------------------------------------------------

'ಓಜಸ್ ನಿಸರ್ಗ' ಎಂಬ ಅಪರೂಪದ ದೇಶೀಯ ಮಳಿಗೆ

2010-12-21T13:14:00.003+05:30

ಯಾರಿಗಾದರೂ ಯಾವುದಾದರು ಅಂಗಡಿ ಅಥವಾ ವ್ಯಾಪಾರವನ್ನು ಪ್ರಾರಂಭಿಸಬೇಕು ಎಂದೆನಿಸಿದರೆ ಎಲ್ಲ ರೀತಿಯಲ್ಲೂ ಯೋಚನೆ ಮಾಡಿ ಲಾಭ ಯಾವುದರಲ್ಲಿ ಹೆಚ್ಚು ಅಂತ ಲೆಕ್ಕ ಮಾಡಿಯೇ ಬಹಳಷ್ಟು ಜನರು ಮುಂದುವರೆಯುತ್ತಾರೆ. ಆದ್ದರಿಂದಲೇ ಎಲ್ಲಿ ನೋಡಿದರೂ ಹೋಟೆಲ್ಗಳು, ಆಭರಣ ಮಳಿಗೆಗಳು, ಬೃಹತ್ ವ್ಯಾಪಾರ ಮಳಿಗೆಗಳು (ಶಾಪಿಂಗ್ ಕಾಂಪ್ಲೆಕ್ಸ್) ತಲೆ ಎತ್ತಿ ನಿಂತಿದೆ. ಅಷ್ಟೇ ಅಲ್ಲದೆ ಜನರ ತಲೆ ಕೆಲಸ ಮಾಡದಿರುವಂತೆಯೂ ಮಾಡಿದೆ! ಆದರೆ ಇಲ್ಲೊಂದು ವಿಶೇಷ ತಂಡವಿದೆ. ತಾವು ಸಮಾಜದ ಒಳಿತನ ಬಗೆಗೆ ಬರೀ ಮಾತಾಡುವವರಿಗಿಂತ ಭಿನ್ನವಾಗಿ ಚಿಂತಿಸಿ ಅದನ್ನು ಕಾರ್ಯರೂಪಕ್ಕೂ ತಂದಿದ್ದಾರೆ. ಸಮಾಜದ ಬಗೆಗಿರುವ ಕಾಳಜಿಯನ್ನು ಅಭಿವ್ಯಕ್ತಗೊಳಿಸಿದ್ದಾರೆ. ಈ ಎಲ್ಲ ಸದುದ್ದೇಶ ಗಳ ಫಲವೇ 'ಓಜಸ್ ನಿಸರ್ಗ' ಎಂಬ ಸಾವಯವ ಹಾಗು ನೈಸರ್ಗಿಕ ಉತ್ಪನ್ನಗಳ ಪುಟ್ಟ ಮಳಿಗೆ.

ಇದರ ವಿಶೇಷ ಎಂದರೆ ಯಾವುದೇ ಕೃತಕ ರಾಸಾಯನಿಕಗಳನ್ನು ಹಾಗು ಕ್ರಿಮಿನಾಶಕಗಳನ್ನು ಬಳಸದೆ ಬೆಳೆದಂತಹ ತರಕಾರಿಗಳು, ಧವಸ ಧಾನ್ಯಗಳು, ದೇಶೀಯ ವಸ್ತುಗಳು, ಸ್ಥಾನೀಯವಾಗಿ ತಯಾರಿಸಲ್ಪಟ್ಟ ವಸ್ತುಗಳಿಗೆ ಪುಟ್ಟ ಮಾರುಕಟ್ಟೆಯ ರೂಪವನ್ನು ಕೊಟ್ಟಿದ್ದಾರೆ. ಕೊಳ್ಳುವ ವಸ್ತುಗಳಿಗೆ ದೇಶೀಯತೆಯ ಹಾಗು ರಾಷ್ಟ್ರೀಯತೆಯ ಗಂಧವನ್ನು ಲೇಪಿಸಿದ್ದಾರೆ. ಮನೆಯಲ್ಲಿದ್ದುಕೊಂಡೇ ರಾಷ್ಟ್ರದ ಕೆಲಸ ಮಾಡಬೇಕೆನ್ನುವ ಹಂಬಲಿಗರಿಗೆ ಅವಕಾಶವನ್ನು ನೀಡಿದ್ದಾರೆ.

ಎಲ್ಲರಿಗಿಂತ ಭಿನ್ನವಾಗಿ ಆದರೆ ಆ ಭಿನ್ನತೆಯಲ್ಲೂ ಶ್ರೇಷ್ಠತೆಯನ್ನು ಹಾಗು ರಾಷ್ಟ್ರೀಯತೆಯನ್ನು ಅಳವಡಿಸಿಕೊಂಡಿರುವ 'ಓಜಸ್ ನಿಸರ್ಗ' ತಂಡಕ್ಕೆ ನಾವೆಲ್ಲರೂ ಅಭಿನಂದನೆಯನ್ನು ಸಲ್ಲಿಸಲೇಬೇಕು. ಅದಷ್ಟೇ ಅಲ್ಲ. ನಾವು ಸಹ 'ಓಜಸ್ ನಿಸರ್ಗ'ಕ್ಕೆ ಭೇಟಿ ನೀಡಿ ನಮ್ಮ ದೇಶೀಯ ವಸ್ತುಗಳನ್ನು ಕೊಂಡುಕೊಳ್ಳುವ ಮೂಲಕ ನಮ್ಮ ಹಸ್ತವನ್ನೂ 'ಓಜಸ್ ನಿಸರ್ಗ' ತಂಡದೊಂದಿಗೆ ಜೋಡಿಸಬೇಕು. ಅದರಲ್ಲೂ ಮುಖ್ಯವಾಗಿ ದಿನೋಪಯೋಗಿ ವಸ್ತುಗಳನ್ನು 'ಓಜಸ್ ನಿಸರ್ಗ'ದಲ್ಲೇ ಕೊಂಡುಕೊಳ್ಳುವ ಪರಿಪಾಠವನ್ನು ಬೆಳೆಸಿಕೊಳ್ಳಬೇಕು. ಈ ಮೂಲಕ ಈ ಭೂಮಿ ಹಾಗು ಪ್ರಕೃತಿಯೊಡಗಿನ ನಮ್ಮ ಸಂಭಂಧವನ್ನ ಉತ್ತಮಗೊಳಿಸುವ ಹಾಗು ನಮ್ಮ ಕಾಳಜಿಯನ್ನ ಪ್ರತ್ಯಕ್ಷ ಆಚರಣೆಗೆ ತರುವ ಪ್ರಯತ್ನ ನಮ್ಮೆಲ್ಲರಿಂದ ಆಗಬೇಕು ಎಂಬುದೇ ಅಪೇಕ್ಷೆ. ಸಮಾಜದ ಬಗ್ಗೆ ಹಾಗು ದೇಶದ ಬಗ್ಗೆ ಬರೇ ಮಾತಾಡುವವರ ನಡುವೆ ಭಿನ್ನತೆಯನ್ನು ಮೆರೆಯೋಣ. ಮಾಹಿತಿಗಾಗಿ ಲಗತ್ತಿಸಿರುವ ಪತ್ರಕವನ್ನು ನೋಡಿ.

ಹೆಚ್ಚಿನ ಮಾಹಿತಿಗಾಗಿ ಭೇಟಿ ನೀಡಿ http://www.ojasnisarga.com/

----------------------------------------------------------------------------

ದೇಶದ್ರೋಹಿಗಳಿಗೂ ಆಶ್ರಯ ತಾಣ ಭಾರತ...?

2010-10-29T16:28:00.003+05:30

ದೇಶದ್ರೋಹಿ ಕೆಲಸಗಳನ್ನು ಮಾಡಿದರೂ ಸೌಖ್ಯವಾಗಿ ಇರಲು ಸಾಧ್ಯವಿರುವ ದೇಶ ಎಂದರೆ ಭಾರತ ಒಂದೇ ಎಂದು ಯಾರಿಗಾದರೂ ಅನ್ನಿಸದಿದ್ದರೆ ಆಶ್ಚರ್ಯ ಪಡಬೇಕು...!

ಭಾರತದ ಮೇಲೆ ಆಕ್ರಮಣ ಮಾಡಿದವರೂ ಭಾರತದಲ್ಲಿ ಆರಾಮಾಗಿ ರಬಹುದು, ಭಾರತ ವನ್ನು ಕೊಳ್ಳೆ ಹೊಡೆದವರೂ ಭಾರತದಲ್ಲಿ ಆರಾಮಾಗಿ ರಬಹುದು, ಭಾರತ ದ ವಿರುದ್ಧ ಹೇಳಿಕೆ ನೀಡಿದರೂ ಅವರಿಗೆ ಭವ್ಯ ಸ್ವಾಗತ ಸಿಗುತ್ತೆ ನಮ್ಮ ಈ ಭಾರತದಲ್ಲಿ...! ಕಸಬ್, ಅಫ್ಜಲ್ ಗುರು ಅಂತಹವರು ಹುಲುಸಾಗಿರುವಾಗ ನಾನು ಯಾರಿಗೆ ಕಮ್ಮಿ ಎಂದು ಅಂತಾರಾಷ್ಟ್ರೀಯ ಖ್ಯಾತಿಯ ಲೇಖಕಿ ಅರುಂಧತಿ ರಾಯ್ ತಮ್ಮ ಹೆಜ್ಜೆ ಇಟ್ಟಿದ್ದಾರೆ, ಅಷ್ಟೇ ಅಲ್ಲ, ಮುಂದೆ ಇನ್ನು ದೊಡ್ಡ ದೊಡ್ಡ ಹೆಜ್ಜೆಯನ್ನು ಇಡಲಿದ್ದಾರೆ ಎಂದು ಸಾಬೀತು ಮಾಡಿದ್ದಾರೆ. ಇಂತಹ ಹೆಣ್ಣು(?) ಮಕ್ಕಳನ್ನು ಪಡೆದ ಭಾರತ ಮಾತೆ ನೀನೆ ಧನ್ಯ...!!!!!

ಪ್ರಸಿದ್ಧಿಯನ್ನು ಪಡೆಯುವ ಸಲುವಾಗಿ ಒಂದು ಸೂತ್ರವಿದೆ. ನಿಮಗೆ ಅಂತಾರಾಷ್ಟ್ರೀಯ ಖ್ಯಾತಿ ಏನಾದರು ಬೇಕಾದಲ್ಲಿ ಭಾರತದ ವಿರುದ್ಧ ಮಾತೆತ್ತಿ ಅಥವಾ ಪುಸ್ತಕ ಬರೆಯಿರಿ ಅಥವಾ ನಮ್ಮ ಈ ಆಧುನಿಕ ಭಾರತದ ಒಳಗೆ ನಿಮಗೇನಾದರೂ ಪ್ರಸಿದ್ಧಿ ಬೇಕಾದಲ್ಲಿ ಹಿಂದೂಗಳ ವಿರುದ್ಧ ದನಿಯೆತ್ತಿ ಎಂದು. ತಕ್ಷಣದಲ್ಲಿ ಪ್ರಸಿದ್ಧಿ ಪಡೆದ ಬಹುತೇಕ ಎಲ್ಲ ಪಿಪಾಸುಗಳೂ ಇದೆ ಗುಂಪಿಗೆ ಸೇರಿದವರಾಗಿದ್ದಾರೆ, ಪರೀಕ್ಷಿಸಿ ನೋಡಿ.

ಸಂವಿಧಾನದ ೩೭೦ ನೆ ವಿಧಿಯ ಕಾರಣದಿಂದಾಗಿ ಇಡೀ ಕಾಶ್ಮೀರ ಬಹುತೇಕ ಪರಕೀಯವಾಗಿಯೇ ಉಳಿದಿರುವಂತಹ ಪರಿಸ್ಥಿತಿಯಲ್ಲಿ ಭಾರತೀಯ ನಾರಿ ಅರುಂಧತಿ ರಾಯ್ ತಮ್ಮ ನಾಲಗೆಯನ್ನು ಹರಿಬಿಟ್ಟಿದ್ದರೂ, ದೇಶದ್ರೋಹದಾಪಾದನೆಯಡಿ ಬಂಧಿಸುವ ಅವಕಾಶವಿದ್ದರೂ, 'ಇಂತಹವರು ಮುಂದೊಂದು ದಿನ ನಮಗೂ ಸಹಾಯಕ್ಕೆ ಬರಬಹುದು' ಎಂಬ ದೂರಾಲೋಚನೆ (!)ಯಡಿ ಕೇಂದ್ರ ಸರಕಾರ ಸಮಸ್ಯೆಯನ್ನು ಹೆಚ್ಚಾಗಿಸುವುದು ಬೇಡ ಎಂಬ ಜಾಣ್ಮೆಯಲ್ಲಿ ಪರಿಸ್ಥಿಯನ್ನು ನಿಭಾಯಿಸುತ್ತಿದೆ!

ಎಲ್ಲ ಪಕ್ಷಗಳೂ, ಎಲ್ಲ ರಾಜಕಾರಣಿಗಳೂ ರಾಷ್ಟ್ರಹಿತದ ವಿಷಯದಲ್ಲಿ ಎಂದಿಗೆ ಒಂದಾಗುವರೋ, ಅಂದಿನಿಂದ ಹೆಚ್ಚುಗೊಳ್ಳುವ ಭಾರತದ ಅಭ್ಯುದಯದ ವೇಗವನ್ನು ನಿಯಂತ್ರಿಸಲೂ ಯಾವ ಅಂತಾರಾಷ್ಟ್ರೀಯ ತಂತ್ರಗಳಿಂದಲೂ ಸಾಧ್ಯವಿಲ್ಲ.

ಸಾಮರಸ್ಯದ ನವ್ಯ ಯುಗಕೆ ನಿಮಗಿದೋ ಆಮಂತ್ರಣ

2010-09-27T13:08:00.002+05:30

ಇದು ಕೆಲವರಿಗೆ ಆಶ್ಚರ್ಯ, ಕೆಲವರಿಗೆ ಪ್ರೇರಣೆ, ಕೆಲವರಿಗೆ ಅಸೂಯೆ, ಕೆಲವರಿಗೆ ಸಂತೋಷ, ಕೆಲವರಿಗೆ ಅನುಕರಣೀಯ, ಕೆಲವರಿಗೆ ಆಜ್ಞೆಯೂ ಸಹ. ಅಸ್ಪೃಶ್ಯತೆ ಯಂತಹ ಅಸ್ಪೃಶ್ಯತೆಯನ್ನು ಪೇಜಾವರ ಶ್ರೀಗಳಂತಹ ಪೇಜಾವರ ಶ್ರೀಗಳು ಮೆಟ್ಟಿ ನಿಲ್ಲಲು ಈ ಪರಿ ಕಂಕಣಬಧ್ಧರಾಗಿ ತಮ್ಮ ಕರ್ತವ್ಯವನ್ನು ಮಾಡುತ್ತಿರುವ ಶ್ರೀಗಳಿಗೆ ವಂದಿಸುವುದು ನಮ್ಮೆಲ್ಲರ ಕರ್ತವ್ಯ. ಉಪೇಕ್ಷಿತ ವರ್ಗಗಳನ್ನು ಸಮಾಜದ ಮುಖ್ಯವಾಹಿನಿಗೆ ಕರೆತರುವ ಸಲುವಾಗಿ, ಅವರಲ್ಲಿ ಕೆಲವರಿಗಿರುವ ಕೀಳರಿಮೆಯನ್ನು ಕಿತ್ತೆಸೆಯಲು 'ವೈಷ್ಣವ ದೀಕ್ಷೆ' ಕೊಡಲು ಸಿದ್ದ ಎಂದು, 'ದಲಿತರು', 'ಮಾದಿಗರು' ಎಂಬುದಾಗಿ ಮೇಲ್ವರ್ಗದವರು ಕರೆಯುವುದಕ್ಕಿಂತ ಹೆಚ್ಚಾಗಿ ಅವರೇ ಕರೆಸಿಕೊಳ್ಳಲು ಹೆಮ್ಮೆ ಪಡುವವರ ಕೇರಿಗಳಲ್ಲಿರುವವರ ಮನೆಗಳಿಗೆ ಭೇಟಿ ನೀಡಿ ಅವರವರ ಕುಲದೈವರ ಪೂಜೆ ಗೈ ಯುವ ಮುಖಾಂತರ ಅತ್ಯಂತ ಪ್ರೇರಣಾದಾಯಿಯಾದ ಕೆಲಸಕ್ಕೆ ನಾಂದಿ ಹಾಡಿದ್ದಾರೆ ಪೇಜಾವರ ಶ್ರೀಗಳು. ಆ ಮೂಲಕ ಉಳಿದೆಲ್ಲ ಮಠಾಧೀಶರಿಗೆ ಹಾಗೂ ಸಾಮರಸ್ಯ ತುಂಬಿದ ಹಿಂದೂ ಸಮಾಜದ ಭವ್ಯ ಕನಸನ್ನು ಕಾಣುತ್ತಿರುವವರಿಗೆ ಮೇಲ್ಪಂಕ್ತಿಯನ್ನು ಹಾಕಿಕೊಟ್ಟಿದ್ದಾರೆ.

ತಮ್ಮ ಸ್ವಾರ್ಥ ರಾಜಕೀಯ ಕಾರಣಗಳಿಗೋಸ್ಕರ ಈ ಕೆಲಸದಲ್ಲೂ ಕೊಂಕನ್ನು ಹುಡುಕುವ ಅಸಾಧಾರಣ ಪ್ರಜೆಗಳು ಅವರವರ ಯೋಗ್ಯತೆಗೆ ತಕ್ಕಂತೆ ನಡೆದುಕೊಳ್ಳುತ್ತಿರುವುದು ಭಾರತದಂತ ಹ ಪ್ರಜಾಪ್ರಭುತ್ವ ರಾಷ್ಟ್ರಕ್ಕೆ ಆಶ್ಚರ್ಯವೇ ಅಲ್ಲ. ಆ ಮೂಲಕ ಉತ್ತಮ ಸಮಾಜದ ನಿರ್ಮಾಣದ ವಿಷಯದಲ್ಲಿ ತಮ್ಮ ಅಭಿಪ್ರಾಯವೇನು ಎಂಬುದನ್ನು ನಿರೂಪಿಸಿದ್ದಾರೆ.

ಅಸ್ಪೃಶ್ಯತೆಯ ವಿರುದ್ಧ ಈ ವರೆಗೆ ಮಾತಾಡಿ ಗೋಳಾಡಿರುವ ಎಷ್ಟು ಜನರು ಅಥವಾ ಎಷ್ಟು ಸಂಘಟನೆಗಳು ತಮ್ಮ ಕಾಳಜಿಯನ್ನು ಕೃತಿ ರೂಪಕ್ಕೆ ತಂದಿದ್ದಾರೆ ? ಸಂಘರ್ಷದ ಮೂಲಕ, ಸೌಹಾರ್ದದ ಮೂಲಕ ಸಂಘಟನೆಯ ಮೂಲಕ ಅಸ್ಪೃಶ್ಯತೆಯನ್ನು ಹೋಗಲಾಡಿಸುತ್ತೇವೆ ಎಂಬ ಕೂಗಿನೊಂದಿಗೆ ಹುಟ್ಟಿದವರು ಬರೀ ಅನ್ಯಾನ್ಯ ಜಾತಿ-ವರ್ಗಗಳ ಜನರ ಮಧ್ಯ ಇರುವ ಅಂತರವನ್ನು ಕಾಪಾಡಿಕೊಳ್ಳುತ್ತ, ತಮ್ಮಗಳ ಸ್ವಾರ್ಥ ರಾಜಕೀಯದ ಬೇಳೆಯನ್ನು ಬೇಯಿಸಿ ಕೊಳ್ಳುತ್ತಿರುವ ಸಮಾಜ ದ್ರೋಹಿಗಳ ಸಂಖ್ಯೆಯೇ ಹೆಚ್ಚು. ಅವರ ಸ್ವಾರ್ಥ ಕ್ಕೋಸ್ಕರ ನಮ್ಮ ಮನದಲ್ಲಿ ದ್ವೇಷ ಬಿತ್ತುವ ಕೆಲಸ ಗಳು ಅವ್ಯಾಹತವಾಗಿ ನಡೆಯುತ್ತಿರುವುದು ನಮಗೆ ಹಾಗು ನಮ್ಮ ಸಮಾಜಕ್ಕೆ ಅತ್ಯಂತ ಕಂಟಕವಾದುದು.

ಪೂಜ್ಯ ಪೇಜಾವರ ಶ್ರೀಗಳ 'ಉತ್ತಮ ಹಿಂದೂ ಸಮಾಜದ' ನಿರ್ಮಾಣದ ಕುರಿತಾದ ಕೆಲಸಗಳಿಗೆ ಮಾದಿಗ ಜನಾಂಗದ ಗುರುಪೀಠದ ಶ್ರೀ ಮಾದಾರ ಚನ್ನಯ್ಯ ಸ್ವಾಮಿಗಳು ಕೈ ಜೋಡಿಸಿರುವುದು ಉತ್ತಮ ಬೆಳವಣಿಗೆಯಾಗಿದೆ. ಮೈಸೂರಿನಲ್ಲಿ ನಡೆದ ಮಾದಾರ ಚನ್ನಯ್ಯ ಸ್ವಾಮಿಗಳ ಬ್ರಾಹ್ಮಣ ಸಮುದಾಯದವರ ಭೇಟಿ ಮತ್ತಿತರ ಬೆಳವಣಿಗೆಗಳು ಮುಂದಿನ ದಿನಗಳಲ್ಲಿ ನಡೆಯಲಿರುವ ಒಳ್ಳೆಯ ಕೆಲಸಗಳ ಮುನ್ಸೂಚನೆ ನೀಡುತ್ತದೆ.

ಆಧುನಿಕ ವಿದ್ಯಾಭ್ಯಾಸದ ಕಾರಣದಿಂದ ಹಾಗು ಇನ್ನಿತರ ಕಾರಣಗಳಿಂದ ಅಸ್ಪೃಶ್ಯತೆಯ ವಿಷಯದಲ್ಲಿ ದಶಕಗಳ ಹಿಂದಿನ ಪರಿಸ್ಥಿತಿ ಪ್ರಸ್ತುತ ಇಲ್ಲದಿರುವಾಗ ಇಂದಿನ ಪರಿಸ್ಥಿತಿಯೂ ಸಹ ಉತ್ತಮಗೊಳ್ಳಲು ಸಮಯದ ಅವಶ್ಯಕತೆ ಇದೆ. ಈ ಕಾರಣದಿಂದ ಎಲ್ಲ ವರ್ಗಗಳ ಜನರು ಸಂಘರ್ಷಗಳಿಗೆ ಎಡೆ ಮಾಡಿಕೊಡದೆ ಸ್ವಾರ್ಥ ಸಾಧಕರ ಕೈಗೊಂಬೆಯಾಗದೆ ಸಾವಧಾನದಿಂದ ಕಾಯಬೇಕಾಗಿದೆ. ಅಸ್ಪೃಶ್ಯತೆಯಂತಹ ಸೂಕ್ಷ್ಮ ಸಮಸ್ಯೆಗಳು ಮನೋ ವಿಕಾಸದ ಮೂಲಕ ಮನಃ ಪರಿವರ್ತನೆಯ ಮೂಲಕ ಬಗೆಹರಿಯುವಂತಹವೇ ಹೊರತು ಸಂಘರ್ಷ ಅಥವಾ ಕ್ರಾಂತಿಯ ಮೂಲಕವಲ್ಲ. ಎಲ್ಲ ಉತ್ತಮ ಕೆಲಸಗಳೂ ಸಾಕಾರಗೊಳ್ಳಲು ಸಮಯದ ಅವಶ್ಯಕತೆ ಇದ್ದೇ ಇರುತ್ತದೆ.

ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಸಂಘಚಾಲಕರಾಗಿದ್ದ ಪರಮ ಪೂಜನೀಯ ಗುರೂಜಿಯವರ ಜನ್ಮ ಶತಾಬ್ದಿ ಯ ನಂತರದಲ್ಲಿ ವೇಗಗೊಂಡಿರುವ ಅಸ್ಪೃಶ್ಯತೆಯ ವಿರುಧ್ಧದ ಕಾರ್ಯಾಚರಣೆಗಳು ಸಮರಸ ಹಿಂದೂ ಸಮಾಜದ ನಿರ್ಮಾಣದ ಸಂಕಲ್ಪದೊಂದಿಗೆ ಯಾವ ಪ್ರಚಾರವೂ ಇಲ್ಲದೆ ನಿರಂತರವಾಗಿ ನಡೆಯುತ್ತಿರುತ್ತಲೇ ಇರುತ್ತದೆ. ಈ ಎಲ್ಲ ಕೆಲಸಗಳಲ್ಲಿ ಉತ್ತಮ ಹಿಂದೂ ಸಮಾಜದ ಅಪೇಕ್ಷೆ ಇರುವ ನಾವುಗಳು ಮನಃ ಪೂರ್ವಕವಾಗಿ ಭಾಗಿಯಾಗಿ ಭವ್ಯ ಸಮರಸ ಹಿಂದೂ ಸಮಾಜದ ನಿರ್ಮಾಣದ ಕಾರ್ಯದಲ್ಲಿ ಪಾಲ್ಗೊಳ್ಳಬೇಕಾದ ಅನಿವಾರ್ಯತೆ ಇದೆ. 'ಸ್ವಾರ್ಥ ಜಾತಿ ಪಿಪಾಸು'ಗಳ ಕುರಿತು ಸದಾ ಜಾಗೃತರಾಗಿರುವ ಅನಿವಾರ್ಯತೆಯೂ ಅಷ್ಟೇ ಇದೆ.

ಬದಲಾವಣೆಗಳೆಲ್ಲವೂ ಅಭಿವೃದ್ಧಿಯ ಸಂಕೇತವೇ?

2010-08-04T23:33:00.003+05:30

ಒಬ್ಬರು ಹಿರಿಯರು ಹೇಳಿದ ಮಾತು ನನ್ನ ಮನಸ್ಸಿನಲ್ಲಿ ಗಟ್ಟಿಯಾಗಿ ಕೂತುಬಿಟ್ಟಿದೆ. ದಿನದ ಬಹಳಷ್ಟು ಸಮಯ ನನ್ನನ್ನು ಕಾಡುತ್ತದೆ. ಅವರು ಹೇಳಿದ್ದು, 'ಇತಿಹಾಸದಲ್ಲಿ ನಡೆದಿರುವ ಎಷ್ಟೋ ಘಟನೆಗಳನ್ನು, ಅನ್ಯಾಯಗಳನ್ನು, ಅವಘಡಗಳನ್ನು ನಾವು ಖಂಡಿಸುತ್ತೇವೆ. ಅದಕ್ಕೆ ಕಾರಣಕರ್ತರಾದವರನ್ನೂ ದೂಷಿಸುತ್ತೇವೆ. ಆದರೆ ನಮ್ಮ ಕಣ್ಣ ಮುಂದೆಯೇ ಆ ಘಟನೆಗಳು ಮತ್ತೊಮ್ಮೆ ನಡೆದರೂ ಕೈ ಕಟ್ಟಿ ಕೂತುಬಿಡುವಷ್ಟು ಹೇಡಿಗಳಾಗಿಬಿಟ್ಟಿರುತ್ತೇವೆ' ಎಂದು.

ಶಿವಮೊಗ್ಗದ ಕುವೆಂಪು ರಂಗಮಂದಿರದ ಮುಂದೆ ಇದ್ದಂತಹ ಹತ್ತಾರು ಬೃಹತ್ ಮರಗಳನ್ನು ಜಿಲ್ಲಾಡಳಿತ ಕಡಿದಾಗ ಕಾಲೇಜಿನಲ್ಲಿ ಕೂತು ಖಂಡಿಸಿದ್ದೇ ಖಂಡಿಸಿದ್ದು , ಮನೆಯಲ್ಲಿ ಕೂತು ಅಂದದ್ದೇ ಅಂದದ್ದು. ಆದರೆ ನಮ್ಮೂರಿನಲ್ಲೇ ನಮಗೇ ತಿಳಿದವರೋ ಅಥವಾ ನಮ್ಮ ರಕ್ತ ಸಂಬಂಧಿಗಳೋ ನಮ್ಮ ಕಣ್ಣ ಮುಂದೆಯೇ ಹತ್ತಾರು ವರ್ಷಗಳ ಬೃಹತ್ ಮರವನ್ನು ಕಡಿದಾಗ ಪ್ರತಿಭಟನೆ ಒತ್ತಟ್ಟಿಗಿರಲಿ, ಆ ಕುರಿತು ಕನಿಷ್ಟ ನಮ್ಮ ಕಾಳಜಿಯನ್ನು ವ್ಯಕ್ತಪಡಿಸಲೂ ಆಗಲಿಲ್ಲ. ದೇಶದ ಎಲ್ಲ ಮೋಸಗಾರರನ್ನು, ಕಳ್ಳರನ್ನು, ಭ್ರಷ್ಟರನ್ನು ಬಾಯಿಗೆ ಬಂದಂತೆ ಬೈಯುತ್ತೇವೆ, ಆ ಶಿಕ್ಷೆ ನೀಡಬೇಕು, ಈ ಶಿಕ್ಷೆ ನೀಡಬೇಕು ಎಂಬಂತೆಲ್ಲ ತೀರ್ಪು ಕೊಡುತ್ತೇವೆ. ಆದರೆ ನಮ್ಮ ಕಣ್ಣ ಮುಂದೆಯೇ ನಮ್ಮೂರಿನವರೋ ಅಥವಾ ನಮ್ಮ ಬಂಧುಗಳೋ ಅದೇ ಕೆಲಸ ಮಾಡಿದಾಗ ತೆಪ್ಪಗಿರುತ್ತೇವೆ!

ದೇಶದ ಸಂಸ್ಕೃತಿ ನಾಶದ ಬಗ್ಗೆ, ದೇಶದಲ್ಲಿನ ಪ್ರಕೃತಿ ದತ್ತವಾದ ಪರಿಸರ ನಾಶದ ಬಗ್ಗೆ ಭಾಷಣ ಮಾಡುತ್ತೇವೆ. ಇತರರಿಗೆ ಬುದ್ಧಿವಾದ ಹೇಳುತ್ತೇವೆ. ಆದರೆ ನಮ್ಮ ಕಣ್ಣೆದುರಿನಲ್ಲಿ ನಮ್ಮೂರಿನಲ್ಲೇ ಇವೆಲ್ಲ ನಡೆಯುತ್ತಿದ್ದರೂ ನಮ್ಮ ಕೆಲಸ ಅಲ್ಲ ಇದು ಎಂಬ ಉದಾಸೀನತೆಯಿಂದಲೋ ಅಥವಾ ನಮ್ಮ ಬಳಿ ಏನು ಮಾಡಲಾಗದು ಎಂಬ ಹತಾಶೆಯಿಂದಲೋ ಅಥವಾ ದೊಡ್ಡವರ ಸಹವಾಸ , ಸಮಾಜದ ಪ್ರಬಲ ಶಕ್ತಿಗಳ ಸಹವಾಸ ಬೇಡೆಂಬ ಭಯದಿಂದಲೋ ನೋಡಿದರೂ ನೋಡದಿದ್ದರ ಹಾಗೆ ಸುಮ್ಮನಿರುತ್ತೇವೆ. ಎಂತಹ ಜೀವನ ನಮ್ಮದು ಎಂದು ಸದಾಕಾಲ ಗೊಣಗುವುದೇ ನಮ್ಮ ದೇಶಸೇವೆಯಾಗಿಬಿಟ್ಟಿದೆ!

ಬೆಂಗಳೂರಿನಂತಹ ನಗರಗಲ್ಲಿ ಕಟ್ಟಡ ನಿರ್ಮಾಣ, ರಸ್ತೆ ಅಗಲೀಕರಣದಂತಹ ಕೆಲಸಗಳು ಸಾಕಷ್ಟು ಅನಿವಾರ್ಯತೆಯನ್ನು ಸೃಷ್ಟಿಸಿರುವುದು ಕಟು ವಾಸ್ತವ. ಆದರೆ ಪ್ರಕೃತಿಮಾತೆಯ ಸಾಕ್ಷಾತ್ಕಾರ ದಂತಿರುವ, ನೆಮ್ಮದಿ ಜೀವನದ ತವರಾದಂತಹ, ನಮ್ಮತನ ವನ್ನು ಹುಡುಕಿ ದಕ್ಕಿಸಿಕೊಳ್ಳಬಹುದಾದಂತಹ, ಹಳ್ಳಿಗಳನ್ನು, ಗ್ರಾಮಗಳನ್ನು ಇದೇ ರೀತಿಯ 'ಅಭಿವೃದ್ಧಿಯ'(?) ಕೆಲಸಗಳಿಗೆ ಅಡ ಇಟ್ಟರೆ ಇದಕ್ಕಿಂತ ಅವಿವೇಕದ ಕೆಲಸ ಮತ್ತೊಂದು ಉಂಟೇ?

ಇತ್ತೀಚೆಗೆ ರಾಜ್ಯದ ಕೆಲವು ಗ್ರಾಮಗಳ, ಹಳ್ಳಿಗಳ ಅಂದವನ್ನು 'ಅಭಿವೃದ್ಧಿ', 'ಸ್ವಚ ಗ್ರಾಮ-ಸುವರ್ಣ ಗ್ರಾಮ' ಎಂಬಂತಹ ಹೆಸರುಗಳಿಂದ ಕರೆಯುವ ಯೋಜನೆಗಳಡಿ ಹಾಳು ಮಾಡುತ್ತಿರುವುದು ನಿಜಕ್ಕೂ ಬೇಸರದ ವಿಚಾರವಾಗಿದೆ. ಟಾರ್ ರಸ್ತೆಗಳು, ಮಾಲ್ ಗಳು, ಬೃಹತ್ ಕಟ್ಟಡಗಳು ನಗರಕ್ಕೆ ಅನಿವಾರ್ಯವಾದರೂ ಅವುಗಳ ಅನಿವಾರ್ಯತೆ ಹಳ್ಳಿಗಳಿಗಾಗಲೀ ಅಥವಾ ಗ್ರಾಮಗಳಿಗಾಗಲೀ ಇಲ್ಲ. ಉತ್ತಮ ಟಾರ್ ರಸ್ತೆಗಳು ಖಂಡಿತ ನಗರಕ್ಕೆ ಬೇಕು. ಆದರೆ ಹಳ್ಳಿಗಳಲ್ಲಿನ ಉತ್ತಮ ಹಾಗು ಆರೋಗ್ಯದಾಯಕವಾದ ಮಣ್ಣಿನ ರಸ್ತೆಗಳನ್ನು ಕಸಿದು ಟಾರ್ ರಸ್ತೆಗಳನ್ನಾಗಲಿ, ಅಥವಾ ಬೆಂಗಳೂರಿನ ಪುಟ್ ಪಾತ್ ಗಳಲ್ಲಿರುವ ಸಿಮೆಂಟಿನ ಕಲ್ಲುಗಳ ರಸ್ತೆಗಳನ್ನಾಗಲೀ ಮಾಡುವ ಅವಶ್ಯಕತೆ ಏನಿದೆ? ಅಕಸ್ಮಾತ್ ಮಣ್ಣಿನ ರಸ್ತೆಗಳು ಸರಿಯಿಲ್ಲದಿದ್ದರೆ ಅದನ್ನೇ ಸಮತಟ್ಟಾಗಿ ಮಾಡಿ ಉತ್ತಮಗೊಳಿಸುವುದನ್ನು ಬಿಟ್ಟು ಮಣ್ಣಿನ ರಸ್ತೆಯನ್ನು ತೆಗೆದರೆ?

ದೈವದತ್ತವಾದ ಮಣ್ಣಿನ ರಸ್ತೆಗಳ ಮೇಲೆ ಸಿಮೆಂಟಿನ 'ಮಾನವ ನಿರ್ಮಿತ' ಕಲ್ಲುಗಳಿಂದ ರಸ್ತೆಗಳನ್ನು ಮಾಡಿ 'ಮಹದುಪಕಾರ' ಮಾಡಿದ್ದೇವೆ, 'ಅಭಿವೃದ್ಧಿ' ಮಾಡಿದ್ದೇವೆ ಎಂದು ತಪ್ಪು ತಿಳಿದುಕೊಂಡಿದೆ ಸರ್ಕಾರ!

ಹಳ್ಳಿಗಳಲ್ಲಿ, ಗ್ರಾಮಗಳಲ್ಲಿ ಚಪ್ಪಲಿ ಹಾಕಿಕೊಂಡು ಓಡಾಡುವವರು ಕಡಿಮೆ. ನಗರಕ್ಕೆ ಅಥವಾ ಶಾಲೆಗೆ ಹೋಗುವಾಗ ಮಾತ್ರ ಚಪ್ಪಲಿ ಬಳಸುವುದು ಅಭ್ಯಾಸ. ಆದರೆ ಈಗ ಚಪ್ಪಲಿ ಅನಿವಾರ್ಯ. ಮಣ್ಣಿನ ರಸ್ತೆಗಳಿದ್ದಾಗ, ಆಟವಾಡುತ್ತಿದ್ದ ಮಕ್ಕಳು ಬಿದ್ದರೆ ಸಣ್ಣ ತರಚಿದ ಗಾಯವಾಗುತ್ತಿತ್ತು. ಆದರೆ ಈಗ ಆಸ್ಪತ್ರೆ ಪ್ರಯಾಣ ಖಚಿತ ! ಮಣ್ಣಿನ ನೆಲದಲ್ಲಿ ಬೆಳಗಿನ ಜಾವ ನಮ್ಮ ತಾಯಂದಿರು ಹಾಕುತ್ತಿದ್ದ ರಂಗೋಲಿಯನ್ನು ನೋಡಲು ಎರಡು ಕಣ್ಣು ಸಾಲದಿತ್ತು. ಅದೂ ಊರಿನ ಜಾತ್ರೆಗಳ ಸಂದರ್ಭಗಳಲ್ಲಿ, ರಥೋತ್ಸವಗಳ ಸಮಯದಲ್ಲಿ, ಎಲ್ಲರ ಮನೆಯ ಮುಂದೆ ಕಂಗೊಳಿಸುತ್ತಿದ್ದ ರಂಗೋಲಿಯನ್ನು ನೋಡುವುದೇ ಕಣ್ಣಿಗೆ ಹಬ್ಬವಾಗಿತ್ತು. ಆದರೆ ಈಗ ನಮ್ಮ ತಾಯಂದಿರಿಗೆ ರಂಗೋಲಿಯಲ್ಲಿ ಮನಸ್ಸಿಲ್ಲದ ಮನಸ್ಸು!

ಮಣ್ಣಿನ ನೆಲವಿದ್ದಾಗ ಕೊಳೆಗಳಾಗಲೀ, ಪ್ರಾಣಿಗಳ ತ್ಯಾಜ್ಯಗಳಾಗಲೀ ಮಣ್ಣಲ್ಲಿ ಮಣ್ಣಾಗಿ ಹೋಗುತ್ತಿತ್ತು. ಆದರೆ ಈಗ ? ಆಗ ಕಸವೂ ಮಣ್ಣಾಗುತ್ತಿತ್ತು . ಆದರೆ ಈಗ ಮಣ್ಣೂ ಕಸವಾಗುತ್ತದೆ. ಈ ರೀತಿಯ 'ಅಭಿವೃದ್ಧಿ'ಗಳನ್ನು ನೋಡಿ ಒಬ್ಬರು ಹಿರಿಯರು ಹತಾಶೆಯಿಂದ ಹೇಳಿದ್ದು ನಗೆಯನ್ನು ತರಿಸುವಂತಿತ್ತು. 'ಇಷ್ಟು ದಿನ ಮಣ್ಣಿನ ರಸ್ತೆಯಲ್ಲಿ ಒಮ್ಮೊಮ್ಮೆ ಕಸಗಳು ಕಾಣಿಸುತ್ತಿತ್ತು. ಆದರೆ ಇನ್ಮೇಲೆ ಕಸಗಳು ಮಾತ್ರವೇ ಕಾಣಿಸುತ್ತೆ' ಅಂತ.

ಈ ವಿಷಯವನ್ನು ಸಮರ್ಥನೆ ಮಾಡಿಕೊಳ್ಳಲು 'ಮಳೆಗಾಲದಲ್ಲಿ ಕೊಚ್ಚೆಯಾಗುವುದಿಲ್ಲ' ಎಂಬ ಅವಿವೇಕದ ಕಾರಣವನ್ನು ಕೊಡುವ ಸಂಭವವಿದೆ. ವರ್ಷದ ಕೆಲವು ದಿನಗಳ ಕಾಲ ಬರುವ ಮಳೆ ಉಂಟುಮಾಡುವ 'ಪ್ರಾಣ ಹಾನಿ'ಯಲ್ಲದ ಕೆಸರಿನ ಕಾರಣ ಕೊಟ್ಟು ಪ್ರತಿದಿನ ಓಡಾಡುವ ರಸ್ತೆಯನ್ನೇ ಹಾಳು ಮಾಡಿದರೆ ಹೇಗೆ? ಮಳೆಯ ನೀರಿನಿಂದ ಈ ರಸ್ತೆಗಳ ಮೇಲೆ ಉಂಟಾಗುವ ಪಾಚಿಗಳು ನಡೆಯುವವರಿಗೂ, ವಾಹನ ಸವಾರರಿಗೂ ಎಂತಹ ಜಾರಿಕೆಯನ್ನುಂಟು ಮಾಡುತ್ತವೆ ಎಂದು ಬಿದ್ದವರಿಗೇ ಗೊತ್ತಿರುತ್ತದೆ. ಬೇಸಿಗೆ ಕಾಲದಲ್ಲಂತೂ ತೆಗೆದುಕೊಂಡ ಸೂರ್ಯನ ಶಾಖವನ್ನು ಹಾಗೆಯೇ ಉಗುಳುವ ಈ ನಮ್ಮ ಹೊಸ ರಸ್ತೆಗಳ ಮೇಲೆ ಬರಿಗಾಲಿನಲ್ಲಿ ರಸ್ತೆಗಿಳಿದರೆ ಕಾಲು ಬೆಂದು ಹೋಗುವುದು ನಿಶ್ಚಯ.

'ಅಭಿವೃದ್ಧಿ' ಎಂಬುದಕ್ಕೆ ಸರಿಯಾದ ವ್ಯಾಖ್ಯಾನ ನೀಡುವ ಅವಶ್ಯಕತೆ ಇದೆ. ಇಲ್ಲದಿದ್ದರೆ ಮೂಲ ಸೌಕರ್ಯದ ಪೂರೈಕೆಯನ್ನು ಬಿಟ್ಟು ಬರೇ ಬೃಹತ್ ಕಟ್ಟಡಗಳು, ರಸ್ತೆಗಳು, ಮಾಲ್ ಗಳಿಂದ ಹಳ್ಳಿಗಳನ್ನು, ಗ್ರಾಮಗಳನ್ನು ತುಂಬಿಸುವುದೇ 'ಅಭಿವೃದ್ಧಿ' ಎಂಬ ತಪ್ಪು ಕಲ್ಪನೆ ಬಂದು ಎಲ್ಲೆಡೆಯಲ್ಲೂ 'ವ್ಯಾಪಾರಿ ಭಾವದ ಮನೋವೈಕಲ್ಯ' ಆಕ್ರಮಣ ಮಾಡೀತು. ಇರುವುದನ್ನು ಹಾಳುಮಾಡಿ ಹೊಸದನ್ನು ಮಾಡುವುದೆಲ್ಲವೂ 'ಅಭಿವೃದ್ಧಿ' ಎಂಬ 'ಗುಮ್ಮ' ಎಲ್ಲರ ಮನಸ್ಸಿನಲ್ಲಿ ಆವರಿಸಿದರೆ ಆಗುವ ಅನಾಹುತಗಳನ್ನು ಸರಿಮಾಡಲು ಯಾರಿಂದಲೂ ಸಾಧ್ಯವಿಲ್ಲ.

ಈ ನನ್ನ ತರ್ಕವನ್ನ ಓದಿದವರು ನನ್ನನ್ನು ದೂಷಣೆ ಮಾಡಬಹುದು, ಯಾವ ಕಾಲದಲ್ಲಿ ಇದ್ದೇನೆ ನಾನು?, ಕಾಲಕ್ಕೆ ತಕ್ಕಂತೆ ಬದಲಾಗಬೇಕು ಅಂತೆಲ್ಲ ಮಾತಾಡಬಹುದು. ಆದರೆ ಕಾಲಕ್ಕೆ ತಕ್ಕಂತೆ ಬದಲಾಗೋದು ಅಂದ್ರೆ ಬದಲಾವಣೆಗಳನ್ನು ತರುತ್ತಿರುವುದು ಎಂದಲ್ಲ. ಅವ್ಯವಸ್ಥೆಗಳನ್ನು ವ್ಯವಸ್ಥೆ ಗೊಳಿಸುವ ದಿಕ್ಕಿನಲ್ಲಿ, ಅನಾನುಕೂಲವಾಗಿರುವುದನ್ನು ಅನುಕೂಲವಾಗಿಸುವ ದಿಕ್ಕಿನಲ್ಲಿ ಮಾಡಬೇಕಾದ ಬದಲಾವಣೆಗಳು, ಅಭಿವೃದ್ಧಿ ಎಂದು ಕರೆಸಿಕೊಳ್ಳುತ್ತದೆ. ಹಿಂದಿನ ಕಾಲದಲ್ಲಿ ಬಲಗೈ ನಲ್ಲಿ ಊಟ ಮಾಡುತ್ತಿದ್ದರು ಎಂದು ಈಗ ಕಾಲ ಬದಲಾಗಿದೆ, ಎಡಗೈ ನಲ್ಲಿ ಊಟ ಮಾಡಲು ಪ್ರಾರಂಭಿಸೋಣ ಎಂದರೆ ಆಗುತ್ತದೆಯೇ?

ರೈತರು ಬೆಳೆದ ಬೆಳೆಗಳಿಗೆ ಒಳ್ಳೆಯ ಬೆಲೆ ಕೊಟ್ಟು ಒಳ್ಳೆಯ ಮಾರುಕಟ್ಟೆ ಒದಗಿಸಲಿ, ಫಲವತ್ತಾದ ಭೂಮಿಯನ್ನು 'ಅಭಿವೃದ್ಧಿ' ಗಾಗಿ ಎಂದು ಕಸಿಯುವುದನ್ನು ನಿಲ್ಲಿಸಲಿ, ಕೃಷಿ ವಿಧಾನದ ಔನ್ನತ್ಯಕ್ಕೆ ಒತ್ತು ನೀಡಲಿ, ಕೃಷಿಯಲ್ಲಿ ಸಾಧನೆಗೈದ ರೈತರಿಗೆ ಪ್ರಶಸ್ತಿಗಳನ್ನ, ಪ್ರೋತ್ಸಾಹಗಳನ್ನ ನೀಡಲಿ. ಅದನ್ನು ಬಿಟ್ಟು ಅಭಿವೃದ್ಧಿ ಅನ್ನೋ ಹೆಸರಿನಲ್ಲಿ, ಅಧಿಕಾರವಿದೆ, ನನ್ನ ಬಳಿ ಸಾಧ್ಯವಿದೆ, ನಾನು ಏನಾದರೂ ಮಾಡಬೇಕು ಎಂಬ ಅಹಂಕಾರದಲ್ಲಿ ಇರೋದನ್ನೆಲ್ಲ ಬದಲಾಯಿಸೋದು ಹುಂಬತನವಾಗುವುದು. ಈ ಕುರಿತು ನಮ್ಮೆಲ್ಲರ ಮನದಲ್ಲಿ ಚಿಂತನೆ ಮೊಳಗಲಿ ಎಂಬುದೇ ನನ್ನ ಉದ್ದೇಶ.

ಇದು ನನ್ನ ದುಃಖ ಭಾವನೆಯ ಅಭಿವ್ಯಕ್ತಿಯಷ್ಟೇ...

ಜನತೆಯಿಂದ ಕಿತ್ತುಕೊಳ್ಳದಿರಲಿ...

2010-06-11T22:59:00.011+05:30

ಸಾಕಷ್ಟು ದೊಡ್ಡದಾಗಿಯೇ 'ಹೂಡಿಕೆದಾರರ ಸಮಾವೇಶ'ವನ್ನು ನಮ್ಮ ಕರ್ನಾಟಕ ಘನ ಸರಕಾರ ನಡೆಸಿ ಹಲವಾರು ಜನರ ಬಳಿ ಸೈ ಎನಿಸಿಕೊಂಡಿದೆ. ಯಥಾ ಪ್ರಕಾರ ಕೆಲವರು ವಿರೋಧಿಸಿದ್ದುದು ಸಹಜವೇ. ನಡೆದ ಸಮಾವೇಶದ ಹಿಂದೆ ಸ್ವಾರ್ಥದ ಜತೆಗೆ ರಾಜ್ಯದ ಆರ್ಥಿಕ ಸ್ಥಿತಿಯನ್ನು ಉತ್ತಮಪಡಿಸುವ 'ರಾಜ್ಯಾಭಿಮಾನ'ವನ್ನು ಹೊತ್ತ ಸಚಿವರು ಹಾಗು ಮುಖ್ಯಮಂತ್ರಿಗಳ ಸಾಕಷ್ಟು ಪರಿಶ್ರಮ ಇದೆ ಎಂಬುದು ಅಷ್ಟೇ ಸತ್ಯ. ಈ ಕಾರಣಕ್ಕೆ ಮುಖ್ಯಮಂತ್ರಿಗಳು ಹಾಗು ಸಚಿವರಾದ ಮುರುಗೇಶ್ ನಿರಾಣಿಯವರು ಅಭಿನಂದನಾರ್ಹರು. ರಾಜ್ಯಕ್ಕೆ ಕೈಗಾರಿಕೆಗಳು ಬರುವುದರಿಂದ ಸಾಕಷ್ಟು ಅನುಕೂಲವಾಗುವುದರಲ್ಲಿ ಸಂದೇಹವಿಲ್ಲ.

ಆದರೆ, ಪ್ರಸ್ತುತ ರಾಜ್ಯದ ಜನತೆಗೆ ಸಿಗುತ್ತಿರುವ ನೀರು ಕುಡಿಯಲಿಕ್ಕೆ ಸಾಕಾದರೆ ಹೆಚ್ಚು. ವಿದ್ಯುತನ್ನಂತೂ ಕೇಳಲೇಬೇಡಿ. ಉತ್ತರ ಕರ್ನಾಟಕದಲ್ಲಂತೂ ನೀರಿಗೇ ಹಾಹಾಕಾರದಂತಹ ಪರಿಸ್ಥಿತಿ. ಇಂತಹ ಸಮಯದಲ್ಲಿ ಬಂಡವಾಳ ಹರಿದು ಬರುತ್ತದೆ ಎಂಬ ಭರಾಟೆಯಲ್ಲಿ ರಾಜ್ಯದ ಜನತೆಗೆ ಸಿಗ್ಗುತಿರುವ ಅಲ್ಪದರಲ್ಲೇ ಕಿತ್ತುಕೊಂಡು ಹೂಡಿಕೆದಾರರ ಪೂರೈಕೆಯನ್ನು ನಿಗಿಸುವ ವಿವೇಕರಹಿತ ಹಾಗು ಅಮಾನವೀಯ ನಿರ್ಧಾರಕ್ಕೆ ಮಾತ್ರ ರಾಜ್ಯ ಸರ್ಕಾರ ಮುಂದಾಗದಿರಲಿ ಎಂಬುದೇ ಜನತೆಯ ನಿರೀಕ್ಷೆ ಹಾಗು ಕೋರಿಕೆ. ಈಗಾಗಲೇ ನೈಸ್ ಯೋಜನೆಯಲ್ಲಿ ತಪ್ಪೆಸಗಿರುವ ರಾಜ್ಯ ಸರ್ಕಾರ ಮತ್ತೊಮ್ಮೆ ಈ ವಿಷಯದಲ್ಲೂ ಫಲವತ್ತಾದ ಕೃಷಿ ಭೂಮಿಯನ್ನೇನಾದರೂ ಮಾರಿದರೆ ರಾಜ್ಯದ ಜನತೆಗೆ ಮೋಸ ಮಾಡಿದಂತೆ. ಹಾಗಾಗದಿರಲಿ ಎಂಬುದು ನಮ್ಮ ಆಗ್ರಹ.

ಈ ಎಲ್ಲ ಕಾರಣಕ್ಕೋಸ್ಕರ, ರಾಜ್ಯದ ಸಾಮರ್ಥ್ಯಕ್ಕೆ ಅನುಗುಣವಾಗಿಯೇ ಸರಕಾರ ಹೂಡಿಕೆದಾರರಿಗೆ ಅವಕಾಶ ಕಲ್ಪಿಸುವ ನಿಟ್ಟಿನಲ್ಲಿ ಯೋಜನೆಯನ್ನು ರೂಪಿಸಲಿ, ರಾಜ್ಯದ ಅಭಿವೃದ್ಧಿ ಸಕಾರಾತ್ಮಕ ರೀತಿಯಲ್ಲಿ ಮುಂದುವರೆಯಲಿ.

--

ಭಾರತ ದರ್ಶನ ತೋರಿದ ವಿದ್ಯಾನಂದ ಶೆಣೈ

2010-04-30T23:58:00.005+05:30

ಒಮ್ಮೆ ಒಬ್ಬ ಹಿರಿಯ ಕಾಂಗ್ರೆಸ್ ಕಾರ್ಯಕರ್ತರ ಜತೆ ಮಾತಾಡುವಾಗ ಸಹಜವಾಗಿ ಆರ್ಎಸ್ಎಸ್ ನ ಬಗ್ಗೆ ಮಾತು ಹೊರಳಿತು. ಆಗ ಅವರು 'ನಾನು ನಿಮ್ಮ ಆರ್ಎಸ್ಎಸ್ ನ ಅಷ್ಟು ಒಪ್ಪಲ್ಲ. ಆದರೆ ನಿಮ್ಮ ವಿದ್ಯಾನಂದ ಶೆಣೈರವರ ಭಾರತ ದರ್ಶನ ಮಾತ್ರ ಇಷ್ಟ ಆಗುತ್ತೆ. ಕಷ್ಟ ಪಟ್ರು ಇಷ್ಟ ಪಡದೆ ಇರಲು ಆಗೋದಿಲ್ಲ. ಹಾಗಿದೆ ಅವರ ಮಾತು. ಅದ್ಭುತ ಮಾತುಗಾರ!' ಅಂತ ಹೇಳಿದ್ದು ನೆನಪಿಗೆ ಬಂತು. ಇದನ್ನ ನೆನಪಿಸಿ ಕೊಳ್ಳುವುದಕ್ಕೆ ಕಾರಣವಿದೆ. ಇದೆ ಸಮಯದಲ್ಲೇ ಈಗ್ಗೆ 3 ವರ್ಷಗಳ ಹಿಂದೆ 2007ರಲ್ಲಿ ವಿದ್ಯಾನಂದ ಶೆಣೈ ರವರು ಇಹ ಲೋಕತ್ಯಜಿಸಿದ್ದರು.

ಎಂತಹವರನ್ನೂ ಮಂತ್ರಮುಗ್ಧರನ್ನಾಗಿಸುತ್ತಿದ್ದಂತಹ ಅವರ ವಾಗ್ಝರಿ ಈಗ ಬರೇ ಸಿಡಿಗಳಲ್ಲಿ, ಕ್ಯಾಸೆಟ್ ಗಳಲ್ಲಿ ಕೇಳುವಂತಹುದಾಗಿದೆ. ನನ್ನಂತಹ ಅದೆಷ್ಟೋ ಜನರಿಗೆ ಈಗಲೂ ಅವರ ಇಲ್ಲದಿರುವಿಕೆಯನ್ನು ನಂಬಲು ಸಾಧ್ಯವಾಗುವುದಿಲ್ಲ. ಮೊನ್ನೆ ಅವರ ಭಾರತ ದರ್ಶನದ ಸಿಡಿಯನ್ನು ಕೇಳುತ್ತಿದ್ದಾಗ, ಮನಸ್ಸು ತಾನೇ ತಾನಾಗಿ ಭಾವಯುಕ್ತ ವಾಯಿತು. ಅವರ ಭಾರತ ದರ್ಶನದ ಧ್ವನಿಸುರುಳಿಗಳು ತಲುಪದಿರುವ ಮನೆ-ಮನಗಳಿಲ್ಲ. ಆ ಪರಿಯಲ್ಲಿ ಅವರ ಮಾತು ಎಲ್ಲರ ಮನಸ್ಸನ್ನು ಆವರಿಸಿತ್ತು.

ಕೆಲ ವರ್ಷಗಳ ಹಿಂದೆ ನಮ್ಮೂರಿನಲ್ಲೂ ಕಾರ್ಯಕ್ರಮ ಆಯೋಜನೆಯಾಗಿತ್ತು. 2 ದಿನಗಳ ಕಾರ್ಯಕ್ರಮ. ಅದು ವಿದ್ಯಾನಂದರ 1100ನೇ ಕಾರ್ಯಕ್ರಮ ಇದ್ದಿರಬಹುದು! ಕಾರ್ಯಕ್ರಮಕ್ಕೊಸ್ಕರ ಸುತ್ತ ಮುತ್ತಲಿನ ಸುಮಾರು 8-10 ಹಳ್ಳಿಗಳಿಂದ ಎತ್ತಿನ ಗಾಡಿಗಳಲ್ಲಿ, ಲಾರಿಗಳಲ್ಲಿ, ಸೈಕಲ್ ಗಳಲ್ಲಿ ಬಸ್ಸಿನಲ್ಲಿ ಬಂದಿದ್ದರು. ನಡೆದುಕೊಂಡೇ ಬಂದವರೂ ಹಲವರು. ಅತ್ಯಂತ ಅದ್ಭುತವಾಗಿ ನಡೆದ ಕಾರ್ಯಕ್ರಮ, ನೆರೆದಿದ್ದವರಲ್ಲಿ ಅದೆಂತಹ ಸಂಚಲನವನ್ನು ಉಂಟುಮಾಡಿತ್ತು ಎಂದರೆ ಪ್ರತಿಯೊಬ್ಬರೂ 'ಪ್ರತಿ ತಿಂಗಳೂ ಇದೆ ಕಾರ್ಯಕ್ರಮವನ್ನು ಮಾಡೋಣ' ಎಂಬ ಕೋರಿಕೆಯನ್ನು ಇಟ್ಟಿದ್ದರು!

ಅವರ ಸ್ಮರಣೆಯ ನಿಮಿತ್ತ ಅವರಿಗೊಂದು 'ಅಕ್ಷರ'ನಮನ.

ಪೂರಕ ಲೇಖನಗಳು : ಅಸಾಮಾನ್ಯ ರಾಷ್ಟ್ರಭಕ್ತ ವಿದ್ಯಾನ೦ದ ಶೆಣೈ

ದಟ್ಸ್ ಕನ್ನಡದಲ್ಲಿ ನನ್ನ ಅಂಕಣಕ್ಕೆ ಇಲ್ಲಿ ಕ್ಲಿಕ್ಕಿಸಿ

"ವಂದೇ ಭಾರತಮಾತರಂ "

ಇವರು 'ಸ್ವಾರ್ಥ'ರೋಗ ಪೀಡಿತರು

2010-03-12T23:36:00.003+05:30

ಕೆಲ ದಿನಗಳ ಹಿಂದೆಯಷ್ಟೇ 'ಗೋ ಹತ್ಯೆ ನಿಷೇಧ ಕಾಯಿದೆಯ' ವಿರೋಧ ಮಾಡಲು ಕೆಲ ವಿಕೃತ ಮನಸ್ಸಿನ ವಿದ್ಯಾರ್ಥಿಗಳು ವಿಶ್ವವಿದ್ಯಾಲಯದ ಆವರಣದಲ್ಲೇ ಗೋವಿನ ಮಾಂಸ ಭಕ್ಷಣೆ ಮಾಡುವ ಮೂಲಕ ರಾಜ್ಯವ್ಯಾಪಿ ಪ್ರಸಿಧ್ಧಿಯಾದರು.

ಈ ವಿಷಯವಾಗಿ ಹಲವಾರು ಬುಧ್ಧಿಜೀವಿಗಳು, ಸಂಘಟನೆಗಳು ಕಾಯಿದೆಯ ವಿರುಧ್ಧ ಪ್ರತಿಭಟಿಸುತ್ತಲೇ ಬಂದಿದ್ದಾರೆ. 'ಅಲ್ಪಸಂಖ್ಯಾತರ ಹಾಗು ದಲಿತರ ಆಹಾರ ಸ್ವಾತಂತ್ರ್ಯ' ಕ್ಕೆ ಧಕ್ಕೆ ಬರುತ್ತದೆ ಎಂದು ಬೊಂಬಡಿ ಬಜಾಯಿಸುತ್ತಿದ್ದಾರೆ. ಆದರೆ ಇದೇ ಗೋಹತ್ಯೆ ನಿಷೇಧದ ಕಾನೂನಿನ ಜಾರಿಗೋಸ್ಕರ ಪೂಜ್ಯ ರಾಘವೇಶ್ವರ ಭಾರತಿ ಸ್ವಾಮಿಗಳ ಜತೆ ಕೈ ಜೋಡಿಸಿ ಸಹಿ ಸಂಗ್ರಹ ಅಭಿಯಾನದಲ್ಲಿ ಭಾಗವಹಿಸಿರುವ ಸುಮಾರು ಮೂರು ಲಕ್ಷಕ್ಕೂ ಅಧಿಕ ಮುಸ್ಲಿಮರು ಮನುಷ್ಯರಲ್ಲವೇ? ಅವರ 'ಆಹಾರ ಸ್ವಾತಂತ್ರ್ಯ' ಹರಣವಾಗುವುದಿಲ್ಲವೇ?

ಮುಸ್ಲಿಂ ರಾಷ್ಟ್ರೀಯ ಮಂಚ್ ಎಂಬ ಸಂಘಟನೆ ಹಲವಾರು ತಿಂಗಳುಗಳಿಂದ ಗೋಹತ್ಯೆ ಯನ್ನು ನಿಷೇಧಿಸಬೇಕು ಎಂಬ ಬೇಡಿಕೆಯನ್ನು ಸರ್ಕಾರದ ಮುಂದಿಡುತ್ತಲೇ ಬಂದಿದೆ. ಕೃಷಿ ಅಭಿವೃದ್ಧಿಗೆ ಮಾರಕವಾದ ಗೋಹತ್ಯೆಯನ್ನು ಖಂಡಿತವಾಗಿ ನಿಷೇಧಿಸಬೇಕು ಎಂದು ಮುಸ್ಲಿಂ ಜಾಗರಣ ಮಚ್ ನ ಕೆ.ಎಂ. ಅನೀಸ್ ಉಲ್ ಹಕ್ ರವರು ಸಾರ್ವಜನಿಕ ವೇದಿಕೆಯಲ್ಲಿ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಈ ಒಳ್ಳೆಯ ಕೆಲಸಕ್ಕೋಸ್ಕರ ಎಲ್ಲ ಮುಸ್ಲಿಮರೂ ಕೈ ಜೋಡಿಸಬೇಕು ಎಂದು ಕರೆ ಕೊಟ್ಟಿದ್ದಾರೆ.

ಆದರೆ ಕೆಲ ಸ್ವಾರ್ಥರೋಗ ಪೀಡಿತ ರಾಜಕಾರಣಿಗಳು ಹಾಗು ಬುದ್ಧಿಜೀವಿಗಳಿಂದ ಇದಕ್ಕೆ ವಿರೋಧ ವ್ಯಕ್ತವಾಗುತ್ತಿದೆ. ತಮ್ಮ 'ಬಿಜೆಪಿ ವಿರೋಧಿ' ನಿಲುವಿನಡಿಯಲ್ಲಿ ಮುಸ್ಲಿಮರನ್ನು ದುರುಪಯೋಗಪಡಿಸಿಕೊಳ್ಳಲಾಗುತ್ತಿದೆ. ಈ ಮೂಲಕ ತಮ್ಮ ರಾಜಕೀಯ ಸ್ವಾರ್ಥದ ಬೇಳೆಯನ್ನು ಬೇಯಿಸಿಕೊಳ್ಳಲಾಗುತ್ತಿದೆ.

ಆದರೆ ಇವುಗಳ ಹಿಂದಿನ ದುರುದ್ದೇಶಗಳನ್ನು ಅರ್ಥ ಮಾಡಿಕೊಂಡಿರುವ ಸಜ್ಜನ ಮುಸ್ಲಿಮರು 'ಗೋಹತ್ಯೆ ನಿಷೇಧ ಕಾನೂನಿನ' ಜಾರಿಗೊಸ್ಕರ ಒತ್ತಾಯಿಸುತ್ತಿದ್ದಾರೆ. ತಮ್ಮ ಧರ್ಮದವರ ಜಾಗೃತಿಗೋಸ್ಕರ ಕೆಲಸ ಮಾಡುತ್ತಿದ್ದಾರೆ. ರಾಷ್ಟ್ರದ ಒಳಿತಿಗೋಸ್ಕರ, ದುಷ್ಟ ರಾಜಕಾರಣಿಗಳ ಓಲೈಕೆಗೆ ಕಿವಿಗೊಡದೆ ಮುನ್ನಡೆಯುತ್ತಿರುವ ಮುಸ್ಲಿಂ ರಾಷ್ಟ್ರೀಯ ಮಂಚ್ ನ ಎಲ್ಲ ಕಾರ್ಯಕರ್ತರೂ ಅಭಿನಂದನಾರ್ಹರು.

ನಿಷ್ಕ್ರಿಯರಾಗಿರುವ ಎಲ್ಲ ಸಜ್ಜನರೂ ಸಕ್ರಿಯರಾಗಿರಬೇಕು. ರಾಷ್ಟ್ರೀಯತೆಯ ಪ್ರವಾಹದಲ್ಲಿ ಒಂದಾಗಬೇಕು.

---

'ಪದ್ಮಶ್ರೀ' ರಾಜಕೀಯ...!

2010-02-04T00:32:00.004+05:30

ಒಮ್ಮೊಮ್ಮೆ ಸ್ವಾರ್ಥ ಯಾವ ಮಟ್ಟ ತಲುಪುತ್ತದೆ ಎಂದರೆ ಸ್ವತಃ ತಮ್ಮ ಹೆತ್ತವರ ಪ್ರಾಣ ತೆಗೆಯಲು ಬಂದವರಿಗೂ ನಾವು ನಮ್ಮ ಸ್ವಂತ ಲಾಭಕ್ಕೋಸ್ಕರ ಮನೆ ತುಂಬಿಸಿಕೊಳ್ಳುತ್ತೇವೆ. ಓಲೈಕೆ ರಾಜಕೀಯದ ಅಗ್ರಗಣ್ಯ, ಕೇಂದ್ರದ ಯುಪಿಎ ಸರ್ಕಾರ ಒಬ್ಬ ಮಾಜಿ(?) ಭಯೋತ್ಪಾದಕನನ್ನು 'ಶರಣಾದವ' ಎಂಬ ಕಾರಣಕ್ಕೆ 'ಸಾಚಾತನ'ದ ಪಟ್ಟದ ಜತೆಗೆ 'ಪದ್ಮಶ್ರೀ' ಪಟ್ಟಕ್ಕೂ ಆಯ್ಕೆ ಮಾಡಿರುವುದು ತಮಾಷೆ ಮಾಡಲೂ ಅಸಹ್ಯಕರವಾಗಿದೆ.

ಕೇವಲ ಹೆಸರೇ ಯೋಗ್ಯತೆಯಾಗಿರುವ 'ಗುಲಾಂ ಮೊಹಮ್ಮದ್ ಮೀರ್ ಯಾನೆ ಮಾಮಾ ಖಾನ್' ನನ್ನು 'ಪದ್ಮಶ್ರೀ' ಗೆ ಆಯ್ಕೆ ಮಾಡಿರುವುದು ಕೇಂದ್ರ ಸರ್ಕಾರದ ಅಲ್ಪಸಂಖ್ಯಾತರ ಓಲೈಕೆ ರಾಜಕೀಯಕ್ಕೆ ಹಿಡಿದ 'ದಿವ್ಯ' ನಿದರ್ಶನವಾಗಿದೆ.

ಇನ್ನು ಇತ್ಯರ್ಥವಾಗದ ಕೊಲೆ-ಸುಲಿಗೆ ಯಂತಹ ಕ್ರಿಮಿನಲ್ ಮೊಕದ್ದಮೆ ಗಳಿರುವ ಮಾಜಿ ಭಯೋತ್ಪಾದಕ, 'ಅಲ್ಪಸಂಖ್ಯಾತ ನಾಯಕ' ನ 'ಸಾಮಾಜಿಕ ಸೇವೆ' ಗೆ 'ಪದ್ಮಶ್ರೀ' ಯ ಬಾಗಿಲು ತೆರೆದಿದ್ದು ಕೇಂದ್ರ ಸರ್ಕಾರದ ಸಾಧನೆಯೇ ಸರಿ! ಈವರೆಗೆ 'ಪದ್ಮಶ್ರೀ' ಪಡೆದಿರುವ ಎಲ್ಲ ಗಣ್ಯರಿಗೂ 'ನಗಣ್ಯ' ಪಟ್ಟ ಕೊಟ್ಟಿದ್ದು ಕೇಂದ್ರದ ಸಾಧನೆಯೇ ಸರಿ!

ಇಷ್ಟೆಲ್ಲಾ ನಡೆಯುತ್ತಿದ್ದರೂ, 'ರಾಮಮಂದಿರ ನಿರ್ಮಾಣ' ಎಂಬ ಖಾತರಿ ಯೋಜನೆಯ ರೂವಾರಿ, 'ವಿರೋಧ ಪಕ್ಷ' ಎಂಬ ಸುಪ್ಪತ್ತಿಗೆಯಲ್ಲಿ ಕುಳಿತು ತಮ್ಮ ಪಕ್ಷದ ಸಮಸ್ಯೆಗಳನ್ನೇ ಮೈಮೇಲೆ ಎಳೆದುಕೊಂಡು ನರಳುತ್ತಿರುವವರಿಗೆ ಅತೃಪ್ತರ ಮನ ಒಲಿಸುವುದೇ 'ಸಾಮಾಜಿಕ ಕೆಲಸ' ವಾಗಿಬಿಟ್ಟಿದೆ.

ಕೇಂದ್ರ ಈ ನಿರ್ಧಾರಕ್ಕೆ ಜಮ್ಮು -ಕಾಶ್ಮೀರ ಮುಖ್ಯಮಂತ್ರಿ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ, ಸಂತೋಷಕ್ಕೋ, ದುಃಖಕ್ಕೋ ಗೊತ್ತಿಲ್ಲ. ಅಂತು ಇಂತೂ 'ಪದ್ಮಶ್ರೀ' ಯ ಘನತೆಗೆ 'ಇತಿಶ್ರೀ'...!

ಪತ್ರಿಕಾ ವರದಿ

'ವನವಾಸಿ ಬಂಧು'ಗಳ ಕಲ್ಯಾಣ : ನಮ್ಮದೇ ಕರ್ತವ್ಯ

2010-01-19T22:39:00.007+05:30

ಸಾಕಷ್ಟು ಆಧುನಿಕ ವ್ಯವಸ್ಥೆಗಳನ್ನು ಹಾಗು ಆಧುನಿಕ ಸವಲತ್ತುಗಳನ್ನು ಅನುಭವಿಸುತ್ತಿರುವ ನಾವೆಷ್ಟೋ ಮಂದಿ ಸಮಾಜಕ್ಕೆ ಏನಾದರೂ ಮಾಡುವುದಿರಲಿ ಅದರ ಬಗೆಗೆ ಯೋಚನೆ ಕೂಡ ಮಾಡುವುದಿಲ್ಲ. ಆದರೆ ಯಾವುದೇ ಮೂಲಭೂತ ಸೌಕರ್ಯಗಳ ವಾಸನೆಯೂ ಇಲ್ಲದೆ, ಅಕ್ಷರಶಃ ಕಾಡುಗಳಲ್ಲಿ, ಜೀವನ ಸಾಗಿಸುತ್ತಿರುವ ಸರಿಸುಮಾರು 10 ಕೋಟಿ ಜನ ನಮ್ಮ ಭಾರತೀಯರಿದ್ದಾರೆ ಎನ್ನುವುದು ನಂಬಲಸಾಧ್ಯವಾದರೂ ಸತ್ಯ!

'ವನವಾಸಿ ಬಂಧು'ಗಳು ಎಂದು ಗುರುತಿಸಬಹುದಾದ ಅವರನ್ನು ಸಮಾಜದ ಮುಖ್ಯ ವಾಹಿನಿಗೆ ಕರೆತರಲು ಅಹರ್ನಿಶಿ ಕೆಲಸ ಮಾಡುತ್ತಿರುವ 'ವನವಾಸಿ ಕಲ್ಯಾಣ' ಎಂಬ ಸಾಮಾಜಿಕ ಸಂಸ್ಥೆ ಸದ್ದಿಲ್ಲದೇ ವನವಾಸಿ ಬಂಧುಗಳ ಏಳಿಗೆಗೋಸ್ಕರ ಹಲವಾರು ಯೋಜನೆಗಳನ್ನು ಹಮ್ಮಿಕೊಂಡು ಅನೇಕ ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಿದೆ. ಈ ಸಾಮಾಜಿಕ ಸಂಸ್ಥೆ ಬೆಂಗಳೂರಿನ ರಾಜಾಜಿನಗರದಲ್ಲಿದೆ.

ವನವಾಸಿ ಬಂಧುಗಳ ಶಿಕ್ಷಣಕ್ಕಾಗಿ ಶಾಲೆಗಳು, ವಿದ್ಯಾರ್ಥಿ ನಿಲಯಗಳು, ತರಬೇತಿ ಕೇಂದ್ರಗಳು, ವೈದ್ಯಕೀಯ ಚಿಕಿತ್ಸಾ ಶಿಬಿರಗಳು ಹಾಗು ಇನ್ನು ಹಲವಾರು ಚಟುವಟಿಕೆಗಳಲ್ಲಿ ಮಗ್ನವಾಗಿದೆ. ಆದರೆ ಇವುಗಳನ್ನೆಲ್ಲ ಯಾವುದೇ ಪತ್ರಿಕೆಗಳ ಮುಂದಾಗಲೀ ಅಥವಾ ಟಿವಿ ಚಾನೆಲ್ ಗಳ ಮುಂದಾಗಲೀ ಹೇಳಿಕೊಂಡಿಲ್ಲ. ಕಾರಣ ಇವೆಲ್ಲವುಗಳ ಹಿಂದಿನ ಉದ್ದೇಶ ಪವಿತ್ರ ದೇಶಭಕ್ತಿಯೇ ಹೊರತು ಪ್ರಸಿದ್ಧಿಯಾಗಲೀ ಪ್ರಚಾರವಾಗಲೀ ಅಲ್ಲ.

ಈ ಎಲ್ಲ ಪವಿತ್ರ ಕಾರ್ಯಗಳಿಗೋಸ್ಕರ ಮಹಿಳೆಯರ ಸಹಿತ ಸಾವಿರಾರು ಮಂದಿ ಪೂರ್ಣಾವಧಿ ಕಾರ್ಯಕರ್ತರು ತಮ್ಮ ಜೀವನವನ್ನು ಮುಡಿಪಾಗಿಟ್ಟಿದ್ದಾರೆ. ವನವಾಸಿ ಬಂಧುಗಳ ಶ್ರೇಯೋಭಿವೃದ್ಧಿಯಲ್ಲಿ ತಮ್ಮ ಜೀವನವನ್ನು ಜೋಡಿಸಿಕೊಂಡಿದ್ದಾರೆ.

ನಮ್ಮಲ್ಲೂ ಅನೇಕ ಮಂದಿಗೆ 'ನಮ್ಮ ದೇಶಕ್ಕೆ ಏನಾದರು ಮಾಡಬೇಕು' ಎಂಬ ಹಂಬಲ ಇರುತ್ತೆ. ಆದರೆ ಅದಕ್ಕೆ ಬೇಕಾದ ಸರಿಯಾದ ಪ್ರೇರಣೆ ಸಿಕ್ಕಿರುವುದಿಲ್ಲ. ಅದಕ್ಕೆ ಬೇಕಾದ 'ಸಾಧನ' ಸಿಕ್ಕಿರುವುದಿಲ್ಲ. ಈ ಕಾರಣಗಳಿಗೆ ಕೆಲವು ಉತ್ತಮ ಕಾರ್ಯಕ್ರಮಗಳು, ಕೆಲವು ಮಾಹಿತಿಗಳು ಪ್ರೇರಕಶಕ್ತಿಯಾಗಿ ಕೆಲಸ ಮಾಡಬಲ್ಲವು. ಬರುವ ಶನಿವಾರ 23ರಂದು ಸಂಜೆ 6 ಗಂಟೆಗೆ 'ವನವಾಸಿ ಕಲ್ಯಾಣ'ದ ಸಂಸ್ಥಾಪನಾ ದಿನದ ಪ್ರಯುಕ್ತ ಒಂದು ಸಣ್ಣ ಕಾರ್ಯಕ್ರಮ ಯೋಜನೆಯಾಗಿದೆ. ನಿಮಗೆ ಆದರದ ಸ್ವಾಗತ.

ಸ್ಥಳ: 'ಶಾಸ್ವತಿ' ಸಭಾಂಗಣ
ಎನ್ ಎಂ ಕೆ ಆರ್ ವಿ ಮಹಿಳಾ ಕಾಲೇಜ್
ಜಯನಗರ ಮೂರನೆ ಬ್ಲಾಕ್
ಬೆಂಗಳೂರು
ಸಮಯ : ಸಂಜೆ 6 ಗಂಟೆಗೆ

'ವನವಾಸಿ ಕಲ್ಯಾಣ'ಸಂಸ್ಥೆಯ ಬಗ್ಗೆ ತಿಳಿದುಕೊಳ್ಳಲು ಭೇಟಿ ಕೊಡಿ ಅಂತರ್ಜಾಲ ವಿಳಾಸ 'ವನವಾಸಿ ಕಲ್ಯಾಣ'ದ ಅಂತರ್ಜಾಲ ವಿಳಾಸ

ಡಾ||ವಿಷ್ಣು ಎಂದರೆ ಆ ಭಗವಂತನಿಗೂ ಪ್ರಿಯ...!

2009-12-31T00:49:00.004+05:30

"ನಾನು ಸಾಧ್ಯವಾದ ಮಟ್ಟಿಗೆ ಕಡಿಮೆ ಸುಳ್ಳು ಹೇಳೋದನ್ನ, ಹೆಣ್ಣಿಗೆ-ಮಣ್ಣಿಗೆ ಗೌರವ ಕೊಡೋದನ್ನ, ಸಾಧ್ಯವಾದ ಮಟ್ಟಿಗೆ ಬೇರೆಯವರ ನೋವುಗಳಿಗೆ ಸ್ಪಂದಿಸೋದನ್ನ ಕಲಿತದ್ದು ಅವರು ಅಭಿನಯಿಸಿದ ಚಿತ್ರಗಳಿಂದಲೇ. ನನ್ನ ಬಹುಪಾಲು ಒಳ್ಳೆಯತನಗಳಿಗೆ ಅವರ ಚಿತ್ರಗಳು, ಅವರ ಅಭಿನಯವೇ ಪ್ರೇರಣೆ, ಸ್ಫೂರ್ತಿ"

ಹೀಗಂತ ಹೇಳುವವರು ಸಾಕಷ್ಟು ಜನ ಇದ್ದಾರೆ. ಪ್ರತ್ಯಕ್ಷ ಆಚರಣೆಯಲ್ಲಿ ಇಟ್ಟುಕೊಂಡಿರುವವರೂ ಸಾಕಷ್ಟು ಸಂಖ್ಯೆಯಲ್ಲಿದ್ದಾರೆ. ಇದು ಖಂಡಿತ ಅತಿಶಯೋಕ್ತಿಯಲ್ಲ, ವಾಸ್ತವ. ಆದರೆ ಅವರಿಗೆ ಯಾವುದೇ ಪ್ರಚಾರ, ಶಹಬ್ಬಾಸ್ ಗಿರಿ ಇವ್ಯಾವುದೂ ಬೇಕಿಲ್ಲ ಅಷ್ಟೇ...!

ಅವರು ಮಾಡುವ, ಕ್ಷಮಿಸಿ, ಮಾಡುತ್ತಿದ್ದ ಪಾತ್ರಗಳು ಹಾಗು ಆ ಪಾತ್ರಗಳ ಅವರ ಅಭಿನಯ ಎಂಥವರ ಹೃದಯವನ್ನೂ ಮುಟ್ಟದೇ ಇರಲು ಸಾಧ್ಯವೇ ಇರಲಿಲ್ಲ. ಚಿತ್ರದಲ್ಲಿ ಅವರ ಕಣ್ಣಿನಲ್ಲಿ ನೀರು ಬರುತ್ತಿದ್ದರೆ ನೋಡುವವರ ಕಣ್ಣಿನಲ್ಲೂ ಅತ್ಯಂತ ಸಹಜವಾಗಿಯೇ ನೀರು ಬರುತ್ತಿತ್ತು, ಬರುವಂತೆ ಮಾಡುತ್ತಿತ್ತು ಅವರ ಮನೋಜ್ಞ ಅಭಿನಯ.

ಕನ್ನಡ ಚಿತ್ರರಂಗ ಕಂಡ ಅತ್ಯಂತ ಸಜ್ಜನ ಸ್ವಭಾವದ, ಉತ್ತಮ ಚಾರಿತ್ರ್ಯವಿದ್ದಂತಹ, ಸಮಾಜದ ಬಗೆಗೆ ಕಾಳಜಿ ಇದ್ದಂತಹ, ಅತ್ಯುತ್ತಮ ನಟನಾ ಕೌಶಲವಿದ್ದಂತಹ, ವೈಯಕ್ತಿಕ ಜೀವನದಲ್ಲೂ ಉತ್ತಮ ನಡವಳಿಕೆ ಹೊಂದಿದ್ದಂತಹ, ವಿವಾದಾತೀತ ನಾಯಕ ನಟ, ಕರ್ನಾಟಕದ ಸುಪುತ್ರ ಕನ್ನಡ ಚಿತ್ರರಂಗದ ಸಾಹಸಸಿಂಹ, ಕೋಟಿಗೊಬ್ಬ, ಡಾವಿಷ್ಣುವರ್ಧನ್ ಆಲಿಯಾಸ್ ಸಂಪತ್ ಕುಮಾರ್.....!

ಅವರ ಯಾವ ಚಿತ್ರವೂ ಯಾರ ಮನಸ್ಸಿನ ಮೇಲು ನಕಾರಾತ್ಮಕವಾಗಿ ಪರಿಣಾಮ ಬೀರಲು ಸಾಧ್ಯವಿರಲಿಲ್ಲ. ಆ ರೀತಿಯಲ್ಲಿ ಅವರ ಪಾತ್ರದ ಆಯ್ಕೆ, ಅವರ ಅಭಿನಯವಿರುತ್ತಿತ್ತು.

ಅವರ 'ವೀರಪ್ಪನಾಯ್ಕ' ಚಿತ್ರದ ಅಭಿನಯ ನೋಡುವವರಲ್ಲಿ ದೇಶಭಕ್ತಿಯ ಜಾಗೃತಿಯನ್ನು ಉಂಟುಮಾಡುತ್ತದೆ, ಅವರ 'ಸೂರ್ಯವಂಶ' ಚಿತ್ರ 'ನಮಗೆ ದ್ರೋಹ ಮಾಡಿದವರಿಗೂ ನಾವು ಒಳ್ಳೆಯದೇ ಬಯಸಬೇಕು' ಎಂದು ಆಶಿಸುವಂತೆ ಮಾಡುತ್ತದೆ, ಅವರ 'ಕರ್ಣ' ಚಿತ್ರವಂತೂ ಅದ್ಭುತ ಪ್ರೇರಣೆ ನೀಡುತ್ತದೆ. ಉತ್ತಮ ಸಾಮಾಜಿಕ ಕಳಕಳಿಯೊಂದಿಗೆ ನಿರ್ಮಾಣವಾದ ಅವರ 'ಸಿರಿವಂತ' ಚಿತ್ರ ನೋಡುವವರನ್ನು ಸಮಾಜಕ್ಕೆ ಆಸ್ತಿಯನ್ನಾಗಿ ಮಾಡುವತ್ತ ಪ್ರಾಮಾಣಿಕ ಪ್ರಯತ್ನ ಮಾಡುತ್ತದೆ. ಅತ್ಯಂತ ಹೆಚ್ಚು ಉತ್ತಮ ಚಿತ್ರಗಳಲ್ಲಿ ನಟಿಸಿದವರಲ್ಲಿ ರಾಜಕುಮಾರ್ ಅವರನ್ನು ಹೊರತು ಪಡಿಸಿದರೆ, ನಂತರದ ಸ್ಥಾನ ನಮ್ಮ ವಿಷ್ಣುವರ್ಧನ್. ಆದರೆ ಚಿತ್ರ ನೋಡುವವರ ಸಾಮಾಜಿಕ ಶಿಕ್ಷಣದ ಕಳಕಳಿ ಹೊತ್ತ ಅತ್ಯಂತ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದ ನಟರಲ್ಲಿ ವಿಷ್ಣುವರ್ಧನ್ ರವರೇ ಮೊದಲಿಗರು.

ಅಂತಹ ಅದ್ಭುತ ನಾಯಕ ನಟ ಇಂದು ನಮ್ಮನ್ನೆಲ್ಲ ಅಗಲಿದ್ದಾರೆ. ಒಳ್ಳೆಯವರನ್ನ ಕಂಡರೆ ಆ ಭಗವಂತನಿಗೂ ಪ್ರಿಯ. ಆ ಕಾರಣಕ್ಕಾಗಿಯೇ ನಮ್ಮ ವಿಷ್ಣುವನ್ನು ಸಾಕಷ್ಟು ಬೇಗ ಭಗವಂತ ತನ್ನ ಬಳಿಗೆ ಕರೆದೊಯ್ದಿದ್ದಾನೆ.

ದೇಶದ ಉತ್ತಮ ಪ್ರಜೆಯನ್ನ, ಸಮಾಜದ ಒಳ್ಳೆಯ ವ್ಯಕ್ತಿಯನ್ನ, ಚಿತ್ರರಂಗದ ಅದ್ಭುತ ನಟನನ್ನ, ನಮ್ಮೆಲ್ಲರ ಆಸ್ತಿಯನ್ನ ನಾವು ಕಳೆದುಕೊಂಡಿದ್ದೇವೆ.

ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಪ್ರಾರ್ಥಿಸೋಣ.

ಇಂತಹ ಸಮಯವನ್ನೂ ಸ್ವಾರ್ಥಕ್ಕಾಗಿ ಬಳಸಿಕೊಳ್ಳುವ, ಸಮಾಜದಲ್ಲಿ ಶಾಂತಿಯನ್ನು ಕದಡುವ ರಾಜಕೀಯ 'ನಾಯಿ'ಗಳಿಗೂ ಆ ಭಗವಂತ ಒಳ್ಳೆ ಬುದ್ಧಿ ಕೊಡಲಿ ಎಂದು ಆ ದೇವರಲ್ಲಿ ಪ್ರಾರ್ಥಿಸೋಣ. .

ಸಾವು ಕಟ್ಟಿಟ್ಟ ಬುತ್ತಿಯಾದರೂ ಎದುರಿಸುವುದು ಅಷ್ಟು ಸುಲಭವಲ್ಲ.

ಹರೇ ರಾಮ ...

---

ಭಾಷಾಭಿಮಾನ 'ದೇಶಾಭಿಮಾನ'ಕ್ಕೆ ಸ್ಪೂರ್ತಿಯಲ್ಲವೇ?

2009-11-26T22:50:00.006+05:30

'ನಾನು ಮುಂಬೈನವ ಎಂಬುದಕ್ಕಿಂತ ಮೊದಲು ನಾನು ಭಾರತೀಯ' ಎಂದು ಯಾರಾದರೂ ಹೇಳಿದರೆ, ಹೇಳಿದವನು ಬಹುಶಃ ದೇಶಕ್ಕೊಸ್ಕರವೇ ಹುಟ್ಟಿದವನಿರಬೇಕು, ದೇಶಸೇವೆಯಲ್ಲೇ ಸದಾ ಮುಳುಗಿರುವವನಿರಬೇಕು, ದೇಶವಾಸಿಗಳೆಂದರೆ ಎಲ್ಲಿಲ್ಲದ ಅಭಿಮಾನವನ್ನು ಇಟ್ಟುಕೊಂಡಿರುವವನಿರಬೇಕು ಎಂದೆಲ್ಲ ಕೆಲವರಿಗೆ ಅನಿಸಬಹುದು. ಅಥವಾ ಅವನೊಬ್ಬ 'ಸೇನಾಯೋಧ' ಎಂದೂ ಕೆಲವರಿಗೆ ಅನಿಸುವ ಸಾಧ್ಯತೆಗಳಿವೆ!.

ಆದರೆ ಮೇಲಿನ ಹೇಳಿಕೆ ನೀಡಿದವ ಆ ಪರಿ ಮೂರ್ಖನಲ್ಲ ಬಿಡಿ!

ಸಚಿನ್ ತೆಂಡೂಲ್ಕರ್, ಹೆಸರು ಕೇಳಿದರೆ ಇಡೀ ಕ್ರೀಡಾ ಜಗತ್ತು ಕಾತುರವಾಗುತ್ತದೆ. ಜನ ಅವನ ಆಟಕ್ಕೋಸ್ಕರ ಮುಗಿಮುಗಿದು ಬಿಳುತ್ತಾರೆ. 'ವಿಶ್ವ ದಾಖಲೆ'ಗಳ ಸರದಾರ ಎಂದು ಕೊಂಡಾಡುತ್ತಾರೆ. ಮನೆಯಲ್ಲೆಲ್ಲ ಅವನ ಫೋಟೋಗಳನ್ನಿಟ್ಟು ಪೂಜಿಸುತ್ತಾರೆ. ಅಭಿಮಾನದಿಂದ ಬೀಗುತ್ತಾರೆ. 'ನಮ್ಮ ಸಚಿನ್' ಎಂದು ಮನೆಮಗನ ಹುಟ್ಟಿದಬ್ಬದಂತೆ ಅವನ ಹುಟ್ಟಿದಬ್ಬವನ್ನು ಸಂಭ್ರಮದಿಂದ ಆಚರಿಸುವವರಿದ್ದಾರೆ. ಅವನ ಆಟದ ವಿಷಯದಲ್ಲಿ ಅವನು ವಿಶ್ವಶ್ರೇಷ್ಠ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಈ ಮಾತ್ರಕ್ಕೆ ಅವನನ್ನು ದೇಶದ ಮಹಾನ್ ವ್ಯಕ್ತಿಯಂತೆ, ದೇಶಕ್ಕೆ ಸಿಕ್ಕಾಪಟ್ಟೆ ಕೊಡುಗೆ ನೀಡಿದವನಂತೆ, ಮಹಾನ್ 'ದೇಶಭಕ್ತ'ನಂತೆ ಬಿಂಬಿಸುವುದು ಎಷ್ಟು ಸರಿ?

ಸಚಿನ್ ತೆಂಡೂಲ್ಕರ್ ನ ಮೇಲಿನ ಹೇಳಿಕೆಯ ಕುರಿತು ಯಥಾ ಪ್ರಕಾರ ಸ್ವಘೋಷಿತ ಭಾಷಾಭಿಮಾನಿಗಳು ತಮ್ಮ ಎಂದಿನ ದುರಭಿಮಾನವನ್ನು ಪ್ರದರ್ಶಿಸುತ್ತಿರುವುದು, ಪುಕ್ಕಟೆ ಪ್ರಚಾರವನ್ನು ಪಡೆಯುತ್ತಾ ಸಮಾಜದ ಸ್ವಾಸ್ಥ್ಯವನ್ನು ಹಾಳುಮಾಡುತ್ತಿರುವುದು ದುರದೃಷ್ಟವೇ ಸರಿ.

'ನಮ್ಮ ಗ್ರಾಮ', 'ನಮ್ಮ ಊರು', 'ನಮ್ಮ ಜಿಲ್ಲೆ', 'ನಮ್ಮ ಭಾಷೆ' ಎಂಬ ಅಭಿಮಾನವಿಲ್ಲದಿರುವವರಿಗೆ 'ನಮ್ಮ ದೇಶ' ಎಂಬ 'ಅಭಿಮಾನ' ಎಲ್ಲಿಂದ ಸಿಗುತ್ತದೆ, ಅದೂ ತಕ್ಷಣಕ್ಕೆ! ಎಂಬುದೇ ನನ್ನ ಪ್ರಶ್ನೆ. ಅಂದ ಮಾತ್ರಕ್ಕೆ ಭಾಷಾಭಿಮಾನದ ಹೆಸರಿನಲ್ಲಿ ಗೂಂಡಾಗಿರಿ ಮಾಡುವವರೆಲ್ಲರಿಗೂ ದೇಶಾಭಿಮಾನವಿದೆಯೆಂದಲ್ಲ. ಭಾಷೆಯ ಹೆಸರಿನಲ್ಲಿ ತಮ್ಮ ಸ್ವಾರ್ಥವನ್ನು ಈಡೇರಿಸಿಕೊಳ್ಳುವವರನ್ನು ಖಂಡಿತ ಶಿಕ್ಷಿಸಬೇಕು. ಅದರಲ್ಲಿ ಎರಡು ಮಾತಿಲ್ಲ. ಆದರೆ 'ನಮ್ಮ ಭಾಷೆ', 'ನಮ್ಮ ರಾಜ್ಯ' ಎಂಬ ಅಭಿಮಾನವಿಲ್ಲದಿರುವವನ 'ನಮ್ಮ ದೇಶ' ಎಂಬ ಅಭಿಮಾನದ ಹಿಂದಿನ ನಿಷ್ಠೆಯನ್ನು ಹೇಗೆ ತಾನೇ ನಂಬಲಾದೀತು?

ಭಾಷಾಭಿಮಾನದ, ಸ್ವರಾಜ್ಯಾಭಿಮಾನದ ಹೊರತಾಗಿ ದೇಶಾಭಿಮಾನ ಎಂದಿಗಾದರೂ ಪರಿಪೂರ್ಣತೆಯನ್ನು ಹೊಂದಲು ಸಾಧ್ಯವೇ? ಅಆಇಈ ಕಲಿಯದವನು ಕವನ ಬರೆಯಲು ಸಾಧ್ಯವೇ? ತನಗೆ ತಾನು ಪ್ರಾಮಾಣಿಕನಾಗದವನು ದೇಶಕ್ಕೆ ಹೇಗೆ ತಾನೇ ಪ್ರಾಮಾಣಿಕನಾದಾನು? ತನ್ನೂರಿಗೇ ಆಸ್ತಿಯಾಗದವ ದೇಶಕ್ಕೆ ಆಸ್ತಿಯಾದಾನೆ?

ಅಂದ ಮಾತ್ರಕ್ಕೆ ಸಚಿನ್ ರವರಿಗೆ ಭಾಷಾಭಿಮಾನದ, ಸ್ವರಾಜ್ಯಾಭಿಮಾನಗಳು ಇಲ್ಲವೆಂದಲ್ಲ. ಉಳಿದವರಿಗಿಂತ ಹೆಚ್ಚಿರಲೂಬಹುದು. ಆದರೆ ಭಾಷೆ, ರಾಜ್ಯದ ಮೇಲಿನ ಶ್ರದ್ಧಾ-ಭಕ್ತಿ-ಅಭಿಮಾನಗಳು ದೇಶಾಭಿಮಾನಕ್ಕೆ ಸ್ಫೂರ್ತಿಯಾಗಿ ಮಾರ್ಪಡುತ್ತವೆ. ಆದರೆ ಭಾಷಾಭಿಮಾನದ ಹೆಸರಿನಲ್ಲಿ ನಡೆಯುವ ಎಲ್ಲವನ್ನು ಒಪ್ಪಲು ಸಾಧ್ಯವಿಲ್ಲ. ದೇಶದ ಹಿತಕ್ಕೆ ಧಕ್ಕೆಯಾಗದಂತೆ, ದೇಶದ ಸಮಗ್ರತೆಗೆ ಚ್ಯುತಿಯಾಗದಂತೆ ಭಾಷಾಭಿಮಾನದ ಆಚರಣೆ ಖಂಡಿತ ಅವಶ್ಯವಿದೆ. ಅನಿವಾರ್ಯವೂ ಹೌದು.

ನಗರದ ಐಟಿ ಕಂಪೆನಿ 'ಕೆ ಪಿ ಐ ಟಿ ಕಮ್ಮಿನ್ಸ್'ನ ಸಾಮಾಜಿಕ ಕಳಕಳಿ

2009-11-08T10:54:00.004+05:30

ನಗರದ ಕೆಲವು ಐಟಿ ಕಂಪನಿಗಳು ಉತ್ತರ ಕರ್ನಾಟಕದ ನೆರೆ ಪರಿಹಾರಕ್ಕಾಗಿ ತಮ್ಮದೇ ಆದ ಕೊಡುಗೆ ನೀಡುತ್ತಿರುವುದು ಅತ್ಯಂತ ಹರ್ಷದಾಯಕ. ಉತ್ತಮ ಸಾಮಾಜಿಕ ಕಳಕಳಿಯೊಂದಿಗೆ ಹಲವರ ನೋವುಗಳಿಗೆ ಹಾಗೂ ಪ್ರಕೃತಿ ವಿಕೋಪಗಳಿಗೆ ಸ್ಪಂದಿಸುತ್ತಿರುವ ನಮ್ಮ ದೇಶದ ಹೆಮ್ಮೆಯ ಕಂಪನಿಗಳ ಸಾಲಿಗೆ ಸೇರುವ ನಗರದ 'ಕೆಪಿಐಟಿ ಕಮಿನ್ಸ್' ಎಂಬ ಕಂಪನಿ ನೆರೆ ಪರಿಹಾರಕ್ಕಾಗಿ ತನ್ನ ಉದ್ಯೋಗಿಗಳಿಗೆ ಸಹಾಯ ಮಾಡಲು ಸೂಚಿಸಿದೆ.

ಉದ್ಯೋಗಿಗಳಿಂದ ಹಣವನ್ನು ಸಂಗ್ರಹಿಸಿ 'ಯೂತ್ ಫಾರ್ ಸೇವಾ' ಎಂಬ ಸಂಸ್ಥೆಯ ಮೂಲಕ ತನ್ನ ಕರ್ತವ್ಯವನ್ನು ನಿರ್ವಹಿಸಲು ಕಂಪನಿ ನಿರ್ಧರಿಸಿದೆ. ಈಗಾಗಲೇ ಸಂಗ್ರಹ ಕಾರ್ಯ ಆರಂಭವಾಗಿದೆ. ಸುಮಾರು 8000 ಉದ್ಯೋಗಿಗಳಿರುವ ಸಂಸ್ಥೆಯಲ್ಲಿ ಎಲ್ಲರೂ ತಮ್ಮ ತಮ್ಮ ಪಾಲಿನ ಕರ್ತವ್ಯವನ್ನು ಕಡ್ಡಾಯವಾಗಿ ನಿರ್ವಹಿಸಲಿದ್ದಾರೆ.

ಕಂಪನಿ ಈ ತರಹದ ಇನ್ನು ಕೆಲವು ಉತ್ತಮ ಕಾರ್ಯಗಳಲ್ಲಿ ತನ್ನನ್ನು ತೊಡಗಿಸಿಕೊಂಡಿದೆ. ಈ ಕಾರಣಕ್ಕಾಗಿಯೇ ಕಂಪನಿ 'ವಿ - ಕೇರ್' ಎಂಬ ಉದ್ಯೋಗಿಗಳ ತಂಡವನ್ನು ಕಟ್ಟಿದೆ. ಈಗ್ಗೆ ಕೆಲವು ದಿನಗಳ ಹಿಂದೆ ನಗರದ ವೈಟ್ ಫೀಲ್ಡ್ ನಲ್ಲಿರುವ ಒಂದು ಸರ್ಕಾರಿ ಶಾಲೆಯನ್ನು ದತ್ತು ತೆಗೆದುಕೊಂಡು ಅಲ್ಲಿರುವ ಮಕ್ಕಳಿಗೆ ಮಧ್ಯಾಹ್ನದ ಭೋಜನದ ವ್ಯವಸ್ಥೆಯನ್ನು ಕಲ್ಪಿಸಲು 'ಅಕ್ಷಯ ಪಾತ್ರೆ' ಯೋಜನೆಯಡಿ ಕೈ ಜೋಡಿಸಿತ್ತು. ಈ ಕಾರಣಕ್ಕಾಗಿ ತನ್ನ ಉದ್ಯೋಗಿಗಳಿಂದ ಸಂಗ್ರಹಿಸಲ್ಪಟ್ಟ ಸುಮಾರು 3 ಲಕ್ಷ ರು.ಗಳನ್ನು ಯೋಜನೆಯಲ್ಲಿ ತೊಡಗಿಸಿದೆ.

'ಸಮರ್ಥನಂ ಟ್ರಸ್ಟ್' ಎಂಬ ಅಂಧ ಮಕ್ಕಳ ಬದುಕಿನಲ್ಲಿ ಹರ್ಷವನ್ನು ತುಂಬುವ ಸಂಸ್ಥೆಯೊಂದಿಗೆ ಕೈ ಜೋಡಿಸಿರುವ 'ಕೆಪಿಐಟಿ ಕಮಿನ್ಸ್', ಬದುಕಿನಲ್ಲಿ ಸಾರ್ಥಕತೆಯನ್ನು ಕಂಡುಕೊಳ್ಳುವ ಇಚ್ಛೆಯುಳ್ಳ ತನ್ನ ಉದ್ಯೋಗಿಗಳಿಗೆ ಉತ್ತಮ ಅವಕಾಶವನ್ನು ನೀಡಿದೆ.

ಯಾರ ನೋವಿಗೂ ಸ್ಪಂದಿಸದಿರುವ, ಆಧುನೀಕತೆಯ ಅಮಲಿನಲ್ಲಿ, ಶ್ರೀಮಂತಿಕೆಯ ಅಟ್ಟಹಾಸದಲ್ಲಿ ಮಾನವೀಯತೆಯನ್ನೇ ಮರೆಯುವ ಹಲವಾರು ಸ್ವಾರ್ಥ ವಿದೇಶೀ ಕಂಪನಿಗಳ ಮಧ್ಯೆ, ಪ್ರಚಾರಕ್ಕಾಗಿ ಟಿವಿಗಳಿಗೆ, ದಿನಪತ್ರಿಕೆಗಳಿಗೆ, ಪೋಸು ನೀಡುತ್ತ ಸಹಾಯಮಾಡುವ ಡೋಂಗಿಗಳ ಮಧ್ಯೆ, 'ಕೆಪಿಐಟಿ ಕಮಿನ್ಸ್' ಕಂಪನಿ ಎಲೆಮರೆಕಾಯಿಯಂತೆ ತನ್ನ ಕೈಂಕರ್ಯದಲ್ಲಿ ತೊಡಗಿದೆ.

ಹೀಗೆ ಹಲವಾರು ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತಾ ತನ್ನ ಸಾಮಾಜಿಕ ಬದ್ದತೆಯನ್ನು ಪ್ರದರ್ಶಿಸುತ್ತ ಆ ಮೂಲಕ ಇನ್ನಿತರ ಐಟಿ ಕಂಪೆನಿಗಳಿಗೆ ಉತ್ತಮ ಮೇಲ್ಪಂಕ್ತಿಯನ್ನು ಹಾಕಿಕೊಟ್ಟಿದೆ ನಮ್ಮ 'ಕೆ ಪಿ ಐ ಟಿ ಕಮಿನ್ಸ್'.

ಇದೂ ಕೂಡ ಭಾರತದಲ್ಲಿ ಮಾತ್ರ ನಡೆಯಲು ಸಾಧ್ಯ

2009-10-13T23:41:00.006+05:30

ಕೆಲವರಿಗೆ ಭಾರತದಲ್ಲಿನ ಭ್ರಷ್ಟಾಚಾರ, ಬಡತನ, ಜಾತಿ ವ್ಯವಸ್ಥೆ, ಅನಾಗರೀಕತನದ ಬಗೆಗೆ ಬರೆದು ಕಡೆಯಲ್ಲಿ ತಮ್ಮ ಬರಹವನ್ನು, 'ಇವೆಲ್ಲ ಭಾರತದಲ್ಲಿ ಮಾತ್ರ ನಡೆಯಲು ಸಾಧ್ಯ' ಎಂದು ಮುಗಿಸುವುದು ಚಟ ಹಾಗು ಅದೇ ಅವರಿಗೆ ಹೆಮ್ಮೆಯ ವಿಷಯ ಕೂಡ. ಆದರೆ ಜಗತ್ತಿನ ಬೇರೆಲ್ಲಿಯೂ ನಡೆಯದ, ಭಾರತದಲ್ಲಿ ಮಾತ್ರ ಸಾಧ್ಯವಾಗುವ ಒಳ್ಳೆಯ ಕೆಲಸಗಳು ಲೆಕ್ಕವಿಲ್ಲದಷ್ಟಿವೆ ಎಂಬುದು ಭಾರತೀಯರಿಗಿಂತ ಉಳಿದವರಿಗೇ ಹೆಚ್ಚಾಗಿ ಹಾಗು ಖಚಿತವಾಗಿ ಗೊತ್ತು.

ರಾಜ್ಯದಲ್ಲಿನ ನೆರೆ ಪರಿಹಾರಕ್ಕೋಸ್ಕರ ನಡೆಯುತ್ತಿರುವ ಪಾದಯಾತ್ರೆಗಳು ಹಾಗೂ ತತ್ಸಂಭದದ ಚಟುವಟಿಕೆಗಳ ಕುರಿತು, ಮೊನ್ನೆ ನಮ್ಮ ಸ್ನೇಹಿತರ ಜತೆಗೆ ಅಮೆರಿಕಾದಿಂದ ಬಂದಂತಹ ವ್ಯಕ್ತಿಯೊಬ್ಬರು ಅತ್ಯಂತ ಹರ್ಷದಿಂದ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದಾಗ ನಮ್ಮ ದೇಶದ ಬಗೆಗೆ ಅತೀವ ಹೆಮ್ಮೆಯಾಯಿತು.

'ನಮ್ಮ ದೇಶದಲ್ಲೂ ಹಿಂದೊಮ್ಮೆ ಪ್ರಕೃತಿ ವಿಕೋಪ ಸಂಭವಿಸಿದಾಗ ಸಹಾಯ ಕೇಳಲು ಬಂದ ಯುವತಿಯನ್ನು ಅನುಚಿತ ವರ್ತನೆಯಿಂದ ಬರ್ಬರವಾಗಿ ಕೊಲೆ ಮಾಡಿದ್ದರು. ಆ ಸಮಯದಲ್ಲಿ ಆ ಬಗ್ಗೆ ಅಳುವವರಿರಲಿ, ಚಿಂತಿಸುವವರೂ ಇರಲಿಲ್ಲ. ಅತಿಯಾದ ಅಧುನೀಕತೆ ಹಾಗು ಶ್ರೀಮಂತಿಕೆಗೊಸ್ಕರ ಮಾನವೀಯತೆಯನ್ನೇ ಬಲಿ ಕೊಡುತ್ತಿದ್ದೇವೆ ನಾವು. ನಮ್ಮಲ್ಲಿ ಕೆಲವೇ ಕೆಲವು ಜನ ಅತಿ ಹೆಚ್ಚಿನ ಹಣ ಕೊಡಬಹುದು. ಆದರೆ ಹಣ ನೀಡುವವರ, ಅದನ್ನು ತನ್ನ ಕರ್ತವ್ಯ ಎಂಬಂತೆ ಅರ್ಥೈಸಿಕೊಳ್ಳುವವರ ಸಂಖ್ಯೆ ಅಧಿಕ. ಚಪ್ಪಲಿ ಹೊಲಿಯುವವನು ಕೂಡ ತನ್ನದೇ ಆದ ಸಹಾಯ ಮಾಡುತ್ತಾನೆ. ಉಳಿದ ಎಲ್ಲ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಮಾತ್ರ ಮಾನವೀಯತೆಗೆ ಕೊರತೆಯಿಲ್ಲ. ರಿಯಲಿ ಐ ಲೈಕ್ ಯುವರ್ ಇಂಡಿಯಾ' ಎಂದಾಗ ಭಾರತ ನಿಜವಾಗಿ ಅತ್ಯಂತ ಪುಜನೀಯವಾಗಿ ಕಂಡಿತು.

ನೆರೆ ಪರಿಹಾರದಡಿಯಲ್ಲಿ ಸರ್ಕಾರ ಖುದ್ದಾಗಿ ಬೀದಿಗಿಳಿದಿದೆ. ವಿರೋಧ ಪಕ್ಷಗಳೂ ತಮ್ಮ ಎಂದಿನ ಕೆಸರೆರಚಾಟದ ಚಾಳಿಯನ್ನು ಬಿಟ್ಟು ತಾವು ಯಾರಿಗೂ ಕಡಿಮೆಯಿಲ್ಲ ಎಂಬಂತೆ ಸಂಗ್ರಹ ಕಾರ್ಯದಲ್ಲಿ ತೊಡಗಿವೆ. ಶ್ರೀಸಾಮಾನ್ಯನಿಂದ ಹಿಡಿದು ಸಂಘ-ಸಂಸ್ಥೆಗಳು, ಕೈಗಾರಿಕೋದ್ಯಮಿಗಳು, ಸಣ್ಣಪುಟ್ಟ ವ್ಯಾಪಾರಿಗಳು, ಹಾಲು ಮಾರುವವರು, ಕಸ ಗುಡಿಸುವವರು, ಪತ್ರಿಕೆ ಹಾಕುವವರು, ತರಕಾರಿ ಮಾಡುವವರು, ವಾಹನ ಚಾಲಕರಾದಿಯಾಗಿ ಎಲ್ಲರು ಕೈ ಪರಿಹಾರ ಕಾರ್ಯದಲ್ಲಿ ಕೈ ಜೋಡಿಸಿದ್ದಾರೆ. ಶಾಲೆಗೆ ಹೋಗುವ ವಿದ್ಯಾರ್ಥಿ-ವಿದ್ಯಾರ್ಥಿನಿಯರು ತಮ್ಮ ಪಾಕೆಟ್ ಮನಿಯನ್ನು ಅರ್ಪಿಸಿದ್ದಾರೆ. ಮಠಾಧಿಪತಿಗಳೂ ತಮ್ಮ ಕರ್ತವ್ಯವೆಂಬಂತೆ ಅಕ್ಷರಶಃ ರಸ್ತೆಗಿಳಿದಿದ್ದಾರೆ. ಇಡೀ ರಾಜ್ಯ ಒಕ್ಕೊರಲಿನಿಂದ ಸ್ಪಂದಿಸುತ್ತಿದೆ. ಹೇಳಿ, ಈ ರೀತಿಯ ಮಾನವೀಯತೆಯ ಮೈವೆತ್ತರೂಪ ಭಾರತದಲ್ಲಲ್ಲದೆ ಮತ್ತೆಲ್ಲಿ ಕಾಣಸಿಗುತ್ತದೆ?

ಭಾರತ ಸ್ಮರಣೀಯ ಮಾತ್ರವಲ್ಲ ಪೂಜನೀಯ ಕೂಡ.

ವಂದೇಮಾತರಂ

ಭಯೋತ್ಪಾದನೆ ವಿರುದ್ಧ ಯಾರ ಹೋರಾಟ ಅತಿಮುಖ್ಯ?

2009-09-30T15:40:00.012+05:30

ಭಯೋತ್ಪಾದನೆಯಂಥ ಬೃಹತ್ ಸಮಸ್ಯೆಗಳನ್ನ ಎದುರಿಸುತ್ತಿರುವ, ಭಯೋತ್ಪಾದನೆಯ ಕಾರಣದಿಂದ ಪ್ರತಿದಿನವೂ ಮಾನವಬಲಿ ಕೊಡುತ್ತಿರುವ, ಹೀಗಾಗಿಯೂ ಸ್ವಾರ್ಥಕ್ಕೋಸ್ಕರ ಭಯೋತ್ಪಾದನೆಯ ವಿರುದ್ಧವೇ ಮೌನ ತಳೆದಿರುವ ಹಲವಾರು ರಾಜಕೀಯ ನಾಯಕರನ್ನು ಹೊಂದಿರುವ ಏಕೈಕ ರಾಷ್ಟ್ರ ಭಾರತ!

ಈಗ್ಗೆ ಕೆಲ ದಿನಗಳ ಹಿಂದೆ, ಅಮೆರಿಕದ ತಪಾಸಣಾ ಅಧಿಕಾರಿಗಳು ವಿಮಾನ ನಿಲ್ದಾಣದಲ್ಲಿ ಹಿಂದಿ ಚಿತ್ರರಂಗದ ಮೇರು ನಟ ಶಾರುಖ್ ಖಾನ್‌ರವರ ಜತೆ ನಡೆದುಕೊಂಡ ರೀತಿ ಎಂಥಹವನಿಗೂ ರೋಷ ಉಕ್ಕಿಸುವಂಥದ್ದು. ಹೀಗೆಯೇ ನಮ್ಮ ಹೆಮ್ಮೆಯ ಮಾಜಿ ರಾಷ್ಟ್ರಪತಿ ಅಬ್ದುಲ್ ಕಲಾಂರವರ ವಿಷಯದಲ್ಲಿ ಹೆಚ್ಚು ಕಮ್ಮಿ ಹೀಗೆಯೇ ನಡೆದುಕೊಂಡಿದ್ದರು ಅಮೆರಿಕದ ತಪಾಸಣಾ ಅಧಿಕಾರಿಗಳು. ಆದರೆ ಕಲಾಂರವರ ಸೌಜನ್ಯತೆಯಿಂದ ಶಾರುಖ್‌ ರೋಷಾವೇಷದಿಂದ ಶಾರುಖ್ ಮಾತ್ರ ತುಂಬ ಸುದ್ದಿಯಾದರು, ಅದು ಬಿಡಿ!

ಇವರೆಲ್ಲ ಪ್ರಸಿದ್ಧ ವ್ಯಕ್ತಿಗಳಾದ ಕಾರಣಕ್ಕೆ ಸಾಕಷ್ಟು ಮಂದಿಗೆ ಈ ಎಲ್ಲ ವಿಷಯ ತಿಳಿಯಿತು. ಹೀಗೆಯೇ ಬಹುತೇಕ ಎಲ್ಲ ಮುಸ್ಲಿಮರಿಗೂ ಇದೇ ರೀತಿಯ ಮರ್ಯಾದೆಯೇ ಸಿಕ್ಕುತ್ತದೆ ಎಂಬುದನ್ನು ಊಹಿಸುವುದಕ್ಕೆ ಬಹಳ ಬುದ್ಧಿ ಏನೂ ಬೇಕಾಗೋದಿಲ್ಲ! ಈ ಎಲ್ಲದಕ್ಕೂ ಕಾರಣ, ಎಲ್ಲರಿಗೂ ತಿಳಿದಿರುವಂತೆ, ಭಯೋತ್ಪಾದನೆಯಲ್ಲಿ ತೊಡಗಿರುವವರಲ್ಲಿ ಶೇ.90% ರಷ್ಟು ಮಂದಿ ಇಸ್ಲಾಂ ಧರ್ಮಕ್ಕೆ ಸೇರಿದುದು!

ಹಾಗಾದರೆ ಭಯೋತ್ಪಾದನೆಯ ವಿರುದ್ಧ ಯಾರು ಹೆಚ್ಚು ಹೋರಾಡಬೇಕು?
ಎಲ್ಲರೂ ಒಟ್ಟಾಗಿ ಹೋರಾಡಬೇಕು ಎಂಬುದು ಖಂಡಿತ ಒಪ್ಪಿಕೊಳ್ಳುವ ಮಾತೇ. ಆದರೆ ಒಬ್ಬ ಸಾಮಾನ್ಯ ವ್ಯಕ್ತಿಯಲ್ಲಿನ ಭಯೋತ್ಪಾದನೆ ಕುರಿತಾದ ಭಯ ಯಾವ ರೀತಿ ಅಭಿವ್ಯಕ್ತವಾಗುತ್ತದೆ?

ಕೆಲ ದಿನಗಳ ಹಿಂದೆ ದಿನಪತ್ರಿಕೆಯೊಂದರಲ್ಲಿ ಪ್ರಕಟವಾದ ಓದುಗರ ಪತ್ರದಲ್ಲಿ ಈ ಕೆಳಕಂಡಂತೆ ಇತ್ತು.

ಗೌರವಾನ್ವಿತ ಪ್ರಧಾನಮಂತ್ರಿಯವರಲ್ಲಿ ನನ್ನದೊಂದು ಬಿನ್ನಹ.

ದಯವಿಟ್ಟು ಭಯೋತ್ಪಾದನೆ ವಿರುದ್ಧ ಅತ್ಯುಗ್ರವಾಗಿ ಹೋರಾಡಿ ಸಮಸ್ಯೆಯನ್ನು ಬುಡ ಸಮೇತ ಕಿತ್ತುಹಾಕಿ. ದಾರಿ ತಪ್ಪುತ್ತಿರುವ ಮುಸ್ಲಿಮರನ್ನು ಕಂಡುಹಿಡಿದು ಸರಿಯಾದ ಮಾರ್ಗದರ್ಶನದ ಮೂಲಕ ಅವರೆಲ್ಲರಿಗೂ ಉತ್ತಮ ಜೀವನ ರೂಪಿಸಿಕೊಳ್ಳಲು ಅವಕಾಶ ಕೊಡಿ ಹಾಗೂ ದಾರಿ ತಪ್ಪಿಸುತ್ತಿರುವ, ಇಸ್ಲಾಂ ಧರ್ಮಕ್ಕೆ ಮಸಿ ಬಳಿಯುತ್ತಿರುವ ವ್ಯಕ್ತಿ ಹಾಗೂ ಸಂಘಟನೆಗಳನ್ನು ಪತ್ತೆ ಹಚ್ಚಿ ಅವರನ್ನು ನೇಣಿಗೆ ಹಾಕಿ. ನಮ್ಮನ್ನು ಹಾಗೂ ಇಸ್ಲಾಮನ್ನು ಸಮಾಜ ಅನುಮಾನದಿಂದ ನೋಡುವುದರಿಂದ ತಪ್ಪಿಸಿ.

ಇಂತಿ,

ಅಬ್ದುಲ್ ಖಲೀಲ್, ಕುಮಾರಸ್ವಾಮಿ ಲೇ ಔಟ್

ಇದರಿಂದ ಗೊತ್ತಾಗುತ್ತದೆ ಭಯೋತ್ಪಾದನೆ ಎಂಬುದು ಯಾವ ಧರ್ಮಕ್ಕೆ ಹೆಚ್ಚಾಗಿ ಮಾರಕ ಹಾಗೂ ನಿಜವಾದ ಮುಸ್ಲಿಮರಿಗೆ ಯಾವ ರೀತಿಯ ಮುಜುಗರವನ್ನುಂಟುಮಾಡುತ್ತಿದೆ ಎಂದು.

ಕೆಲ ವರ್ಷಗಳ ಹಿಂದೆ ಹಿರಿಯರೊಬ್ಬರು ಹೇಳಿದ್ದರು, ಮುಸ್ಲಿಮರಲ್ಲಿ ಹೆಚ್ಚಿರುವ ಅಶಿಕ್ಷತೆ ಅವರನ್ನು ಭಯೋತ್ಪಾದನೆಗೆ ಆಕರ್ಷಿಸುವಂತೆ ಮಾಡುತ್ತದೆ ಎಂದು. ಆದರೆ ಇತ್ತೀಚಿನ ದಿನಗಳಲ್ಲಿ ವಿದ್ಯಾವಂತರೇ ಭಯೋತ್ಪಾದನೆಯಲ್ಲಿ ತೊಡಗಿರುವುದು ಕಾಣಬರುತ್ತಿದೆ!

ಹಾಗಾದರೆ ಏನು ಮಾಡಬಹುದು?

ಪ್ರತಿಯೊಬ್ಬ ಭಾರತೀಯನಲ್ಲೂ ದೇಶದ ಕುರಿತಾದ ನಿಷ್ಠೆಯನ್ನು ಬೆಳೆಸುವ ಸಲುವಾಗಿ ಹಲವಾರು ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕು. ಪ್ರತಿಯೊಂದು ಮದರಸಾದಿಂದ ಹಾಗೂ ಪ್ರತಿಯೊಂದು ಶಾಲಾ-ಕಾಲೇಜಿನಿಂದ ಹೊರಬರುವ ಪ್ರತಿಯೊಬ್ಬ ವ್ಯಕ್ತಿಯೂ ಈ ದೇಶದ ಪರವಾಗಿ ಪ್ರಾಣಾರ್ಪಣೆಗೈಯಲು ತಯಾರಿರುವ ರೀತಿಯಲ್ಲಿ ಅವರನ್ನು ಶಿಕ್ಷಿತರನ್ನಾಗಿಸಬೇಕು. ಧಾರ್ಮಿಕ ದ್ವೇಷವನ್ನು ಬೋಧಿಸುತ್ತಿರುವ ಮದರಸಾಗಳನ್ನು, ಶಿಕ್ಷಣಸಂಸ್ಥೆಗಳನ್ನು ಮುಚ್ಚಬೇಕು. ಪ್ರತಿಯೊಬ್ಬರ ಹೃದಯದಲ್ಲೂ ಭಾರತ ಪೂಜನೀಯವಾಗಬೇಕು. ಭಯೋತ್ಪಾದನೆಯಡಿಯಲ್ಲಿ ಬಂಧಿಸಲಾದವರಲ್ಲಿ ಆರೋಪ ಸಾಬೀತಾದ ಪ್ರತಿಯೊಬ್ಬರಿಗೂ ಮರುಕ್ಷಣವೇ ಮರಣದಂಡನೆ ವಿಧಿಸಬೇಕು. ಇಲ್ಲವಾದಲ್ಲಿ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿಯ ಮೂಲಕವೇ ಅವರನ್ನು ನೇಣಿಗೇರಿಸಬೇಕು.ಪ್ರತಿಯೊಬ್ಬನೂ ಅನ್ಯ ಧರ್ಮದವರ ಪೂಜನೀಯವಾದವುಗಳನ್ನು ಗೌರವಿಸಬೇಕು ಹಾಗೂ ಸಾಧ್ಯವಾದರೆ ತಾನೂ ಪೂಜಿಸಬೇಕು. ಈ ನಿಟ್ಟಿನಲ್ಲಿ ಗೋವಧೆಯ ವಿರುದ್ಧದ ಕಾನೂನಿನ ಜಾರಿಗೋಸ್ಕರ ಭಾರತೀಯ ಮುಸ್ಲಿಮ್ ಮಂಚ್ ನಡೆಸುತ್ತಿರುವ ಕಾರ್ಯಾಚರಣೆ ನಿಜಕ್ಕೂ ಶ್ಲಾಘನೀಯ. ಭಯೋತ್ಪಾದನೆಯ ವಿರುದ್ಧ ಇಡೀ ಇಸ್ಲಾಂ ಧರ್ಮ ಎದ್ದು ನಿಲ್ಲಲಿ. ಭಾಯೋತ್ಪಾದನೆಯ ಹುಟ್ಟಡಗಿಸುವಲ್ಲಿ ಪ್ರತಿಯೊಬ್ಬ ಮುಸ್ಲಿಮನೂ ವೀರ ಸೇನಾನಿಯಂತೆ ತನ್ನ ಕೊಡುಗೆಯನ್ನು ನೀಡಲಿ.

ಉನ್ನತ ಶಿಕ್ಷಣ ಸಚಿವರ ಶ್ಲಾಘನೀಯ ಯೋಜನೆ

2009-09-19T23:41:00.001+05:30

ಉನ್ನತ ಶಿಕ್ಷಣ ಸಚಿವರಾದಂತಹ ಅರವಿಂದ ಲಿಂಬಾವಳಿಯವರು ಶಿಕ್ಷಕರ ವರ್ಗಾವಣೆಯ ವಿಷಯದಲ್ಲಿ ತೆಗೆದುಕೊಂಡಿರುವ ಯೋಜನೆಯ ನಿರ್ಧಾರದ ಬಗ್ಗೆ ಮೊನ್ನೆ ಭೇಟಿಯಾದ ಹಿರಿಯರೊಬ್ಬರು ತಿಳಿಸಿದಾಗ ಆಶ್ಚರ್ಯ ಹಾಗೂ ಸಂತೋಷ ಎರಡೂ ಒಟ್ಟಿಗೆ ಅಟ್ಟಿಸಿಕೊಂಡು ಬಂದವು!

ಮಾನ್ಯ ಸಚಿವರು ಶಿಕ್ಷಕರ ವರ್ಗಾವಣೆಯಲ್ಲಿ ನಡೆಯುವ ಅಕ್ರಮ, ಅವ್ಯವಹಾರಗಳನ್ನು ತಡೆಯುವ ನಿಟ್ಟಿನಲ್ಲಿ ಕೌನ್ಸೆಲಿಂಗ್ ಮೂಲಕ ವರ್ಗಾವಣೆ ಅವಶ್ಯವಿರುವ ಶಿಕ್ಷಕರನ್ನು ಸಂದರ್ಶನ ಮಾಡಿ, ಅವರು ಇಚ್ಚಿಸಿದ ಸ್ಥಳಗಳಲ್ಲಿ ವರ್ಗಾವಣೆ ಮಾಡುವುದು ಮತ್ತು ನಿಜವಾಗಿಯೂ ಶಿಕ್ಷಕರ ಕೊರತೆಯಿದ್ದರೆ ತಕ್ಷಣವೇ ಕೆಲಸ ಆಗುವಂತೆ ಮಾಡುವತ್ತ ಸಾಗಿರುವುದು ಖಂಡಿತ ಅತ್ಯಂತ ಶ್ಲಾಘನೀಯವಾದುದು.

ಈವರೆಗೆ ತಮ್ಮ ಪ್ರಭಾವದಿಂದ ಹಾಗೂ ತಮ್ಮ ಹಣಬಲದಿಂದ ವರ್ಗಾವಣೆಯನ್ನು ಮಾಡಿಸಿಕೊಳ್ಳುತ್ತಿದ್ದ ಪ್ರಭಾವಿಗಳು ಹಾಗೂ ಶ್ರೀಮಂತರ ನಡುವೆ, ವರ್ಗಾವಣೆಗೋಸ್ಕರ ವಿಧಾನಸೌಧಕ್ಕೆ ಅಲೆಯುವ, ಹೊಟ್ಟೆಬಾಕ ದಲ್ಲಾಳಿಗಳ ಜೇಬು ತುಂಬಿಸುವ ಮಧ್ಯಮ ವರ್ಗದವರ ನಾಯಿಪಾಡಿಗಿನ್ನು ಬಿಡುಗಡೆಯ ಸೂಚನೆ.

ಹಾಗೆಯೇ ತಮ್ಮ ಅಸಹಾಯಕತೆಯನ್ನು ವಿದ್ಯಾರ್ಥಿಗಳ ಮೇಲೆ ಪ್ರದರ್ಶಿಸುವ ಹಾಗೂ ಉದಾಸೀನತೆಯಿಂದ ಕೆಲಸ ನಿರ್ವಹಿಸುವ ಶಿಕ್ಷಕರ ಕಿರಿಕಿರಿಯ ಕಾಟ ವಿದ್ಯಾರ್ಥಿಗಳಿಗೂ ತಪ್ಪುತ್ತದೆ. ಹಾಗೂ ಫಲಾನುಭವಿ ಶಿಕ್ಷಕರಿಂದ ಇನ್ನೂ ಹೆಚ್ಚಿನ ಪ್ರಾಮಾಣಿಕ ಕರ್ತವ್ಯವನ್ನು ಅಪೇಕ್ಷಿಸಬಹುದು.

ಸಚಿವರ ಈ ಉತ್ತಮ ಯೋಜನೆಯ ಅನುಷ್ಠಾನದ ಹಿಂದೆ ಇನ್ನೂ ಹೆಚ್ಚಿನ ಪ್ರಾಮಾಣಿಕತೆಯನ್ನು ಅಪೇಕ್ಷಿಸುತ್ತ ಈ ಯೋಜನೆಯು ಧೀರ್ಘಕಾಲ ದೊರಕುವಂತಾಗಲಿ ಎಂದು ಹಾರೈಸುತ್ತೇನೆ.

ಜಿನ್ನಾ 'ಭಜನೆ'ಯಿಂದ ಬಿಜೆಪಿ ವಿ'ಭಜನೆ'ಯತ್ತ?

2009-08-31T21:33:00.011+05:30

ಬಿಜೆಪಿಯ ಹಿರಿಯರು ಅಂತ ಕರೆಸಿಕೊಂಡವರು ತಿಳಿದೇ ಹೀಗೆ ನಡೆದುಕೊಳ್ಳುತ್ತಿದ್ದಾರೋ ಇಲ್ಲವೊ ಗೊತ್ತಿಲ್ಲ. ತಾವು ಒಂದು ರಾಷ್ಟ್ರೀಯ ಪಕ್ಷದ ಜವಾಬ್ದಾರಿಯನ್ನು ಹೊತ್ತಿದ್ದೇವೆ ಎಂಬುದನ್ನು ಮರೆತು ಸ್ವಾರ್ಥದ ಸುಳಿಯಲ್ಲಿ ಸಿಕ್ಕಿ ಒದ್ದಾಡುತ್ತಿದ್ದಾರೆ.

ಈಗ ಪ್ರಸ್ತುತ ಸುದ್ದಿಯಲ್ಲಿರುವ ಜಿನ್ನಾ ಭಜನೆಗೆ ಬಲಿಯಾದ ಜಸ್ವಂತ್ ಸಿಂಗ್, ತಾವೊಬ್ಬ ಸೇನಾನಿಯಾಗಿದ್ದರು ಎಂಬುದನ್ನು ಮರೆತು ನಡೆದುಕೊಳ್ಳುತ್ತಿದ್ದಾರೆ. ಉಚ್ಚಾಟನೆಯಾದದ್ದಕ್ಕೆ ಪಕ್ಷದ ಆಂತರಿಕ ವಿಷಯಗಳನ್ನ, ವಿವಾದಗಳನ್ನು ಹುಟ್ಟಿಸುವ ವಿಷಯಗಳನ್ನ ಮಾಧ್ಯಮಗಳ ಮುಂದೆ ಬೊಂಬಡಿಸುತ್ತ 'ಪ್ರತೀಕಾರ'ದ ಪೋಸು ಕೊಡುತ್ತಿದ್ದಾರೆ!

ಆರೋಗ್ಯಕರವಾಗಿ ಬಗೆಹರಿಸಿಕೊಳ್ಳಬಹುದಾದಂತಹ ವಿಷಯಗಳನ್ನ ಸಮಸ್ಯೆಗಳನ್ನಾಗಿ ಪರಿವರ್ತಿಸುತ್ತ ತಮ್ಮ 'ಸ್ವಾರ್ಥ'ದ ಬೇಳೆಯನ್ನು ಬೇಯಿಸಿಕೊಳ್ಳುತ್ತಿರುವ ಬಿಜೆಪಿಯಲ್ಲಿ 'ಗುಂಪುಗಾರಿಕಾದಾರ'ರಿಗೆ ಲಗಾಮು ಹಾಕುವವರು ಯಾರು?

ಬೆಜೆಪಿಯ ಪ್ರತಿಯೊಂದು ಗೆಲುವಿನ ಹಿಂದೆ ಎಷ್ಟು ನಿಸ್ವಾರ್ಥ ಸ್ವಯಂಸೇವಕರ ಶ್ರಮ ಇರುತ್ತದೆ ಎಂದು ಯಾವ ನಾಯಕನಾದರೂ ಅರ್ಥಮಾಡಿಕೊಳ್ಳುತ್ತಾರಾ? ಬಿಜೆಪಿಗೆ ಮತ ಹಾಕುವುದನ್ನು ದೇಶದ ಕೆಲಸ ಅಂತ ಭಾವಿಸಿರುವವರೆಷ್ಟೋ ಮಂದಿ! ಬಿಜೆಪಿ ಅಧಿಕಾರಕ್ಕೆ ಬಂದರೆ ನಮ್ಮ ದೇಶ ಪರಮ ವೈಭವದ ಸ್ಥಿತಿ ತಲುಪುವುದು ಸಲೀಸು ಎಂದು ಸಿಕ್ಕಾಪಟ್ಟೆ ನಂಬಿರುವ ಮೂರ್ಖರು ಅಸಂಖ್ಯರು! ತಮ್ಮ ದೇಶಭಕ್ತಿಯ ಅಭಿವ್ಯಕ್ತತೆಯಡಿಯಲ್ಲಿ 'ಬಿಜೆಪಿಗೆ ಮತ'ವನ್ನು ಸೇರಿಸಿರುವ ಭಾರತದ ಪ್ರಜೆಗಳಿಗೆಲ್ಲ ಈಗ ಬಿದ್ದಿದೆ ಕೆರದಾಗಿನ ಏಟು!

ಇಷ್ಟು ದಿನ ಬಿಜೆಪಿಯನ್ನು ನಿಸ್ವಾರ್ಥದಿಂದ, ದೇಶಕ್ಕೋಸ್ಕರ ಬೆಂಬಲಿಸುತ್ತಿದ್ದವರಿಗೆ ಮನದಲ್ಲಿ ಎದ್ದಿರುವ ಉತ್ತರಕಾನದ ಪ್ರಶ್ನೆ 'ನಾವು ಯಾಕೆ ಬಿಜೆಪಿಯನ್ನು ಬೆಂಬಲಿಸುತ್ತಿದ್ದೆವು?' ಎಂದು. ಹಾಗೆಯೇ ಅವರೆಲ್ಲರಿಗೂ ಕಾಡುತ್ತಿರುವ ಹಾಗು ದುಃಖಿಸುತ್ತಿರುವ ಪ್ರಶ್ನೆ 'ಇನ್ಮೇಲೆ ನಮ್ಮ ದೇಶವನ್ನು ರಾಜಕೀಯವಾಗಿ ಔನ್ನತ್ಯಕ್ಕೇರಿಸಲು ಯಾರನ್ನು ನಂಬಬೇಕು?'

ಹಿಂದೆ ನನ್ನೊಬ್ಬ ಪರಿಚಿತರೊಬ್ಬರ ಜತೆ ಮಾತಾಡುತ್ತಿರುವಾಗ ಬಂದ ಮಾತು 'ಬಿಜೆಪಿಯಲ್ಲಿರುವ ಹಲವಾರು ಮಂದಿ ಆರೆಸ್ಸೆಸ್ ಹಿನ್ನೆಲೆಯುಳ್ಳವರಾಗಿರುವರಿಂದ ಅವರ ದೇಶದೆಡೆಗಿನ ಬದ್ಧತೆಯನ್ನು ನಂಬಿ ನಮ್ಮ ದೇಶವನ್ನು ಜಗತ್ತಿನ ಪ್ರಬಲ ರಾಷ್ಟ್ರವನ್ನಾಗಿಸುವುದರಲ್ಲಿ ನಾವು ಪ್ರಮುಖ ಪಾತ್ರ ವಹಿಸಬೇಕು' ಎಂದು. ಆದರೆ ಈಗ ಬರಿ ಕಳ್ಳ-ಕಾಕರು, ದರೋಡೆಕೋರರು ತುಂಬಿರುವ ಬಿಜೆಪಿಯ ಶಾಸಕ, ಸಂಸದರ ಶೇ.೯೦ರಷ್ಟು ಮಂದಿಗೆ ಎರಡಂಕಿ ಕೋಟಿರುಪಾಯಿಯ ಕೆಳಗಿದ್ದಂತಿಲ್ಲ!

ಆದರೆ ಒಂದಂತೂ ನಿಜ. ಬಿಜೆಪಿ ಈ ಸಂದರ್ಭವನ್ನು ನಾಂದಿಯನ್ನಾಗಿಸಿಕೊಂಡು ಆಮೂಲಾಗ್ರ ಬದಲಾವಣೆಯೊಂದಿಗೆ ಪೂರ್ಣಪ್ರಮಾಣದ ಪ್ರಾಮಾಣಿಕ 'ದೇಶಭಕ್ತಿ'ಯ ಉದ್ದೀಪನದೊಂದಿಗೆ ಎದ್ದು ಬರದಿದ್ದರೆ ದೇಶದ ಉಜ್ವಲ ಭವಿಷ್ಯವನ್ನು ಎದಿರುಕಾಣುತ್ತಿರುವ ನಮ್ಮಂತಹ ಅಸಂಖ್ಯಾತ ಪ್ರಜೆಗಳ ಕನಸು ನನಸಾಗುವುದು ಯಾವಾಗ?

ಎಂ.ಪಿ.ಪ್ರಕಾಶ್ ರವರ ವಿಭಿನ್ನತೆಯೇ ಅವರ ವಿಶೇಷತೆ

2009-07-18T10:50:00.003+05:30

ಕಳೆದ ಭಾನುವಾರದ ಪತ್ರಿಕೆಗಳನ್ನ ಓದಿಮುಗಿಸಿದಾಗ (ಪೂರ್ತಿ ಏನಲ್ಲ!) ಒಂದು ತರಹದ ವಿಶೇಷ ಅನುಭವವಿತ್ತು. ಮನಸ್ಸಿನ ಯಾವುದೋ ಒಂದು ಮೂಲೆಯಲ್ಲಿ ಖುಷಿಯಡಗಿತ್ತು. ಇ ಅವ್ಯಕ್ತ ಖುಷಿಗೆ ಕಾರಣವೇನು ಎಂದು ಮನಸ್ಸನ್ನು ತಡಕಾಡಿದಾಗ ಸಿಕ್ಕ ಉತ್ತರ, ಮಾಜಿ ಉಪಮುಖ್ಯಮಂತ್ರಿಯವರಾದ ಎಂ.ಪಿ.ಪ್ರಕಾಶ್ ರವರ ೭೦ನೇ ವರ್ಷದ ಜನ್ಮದಿನೋತ್ಸವದ ಆಚರಣೆಯ ಸ್ಥಳ ಹಾಗು ರೀತಿ!

ಸಾಮಾನ್ಯವಾಗಿ ರಾಜಕೀಯ ಪ್ರವೃತ್ತಿಯಲ್ಲಿ ಇರುವವರು ಮಾಡುವ ಕೆಲವೇ ಕೆಲವು ಒಳ್ಳೆಯ ಕೆಲಸಗಳನ್ನೂ ಸ್ವಾರ್ಥ ಪ್ರಚಾರಕ್ಕೊಸ್ಕರವೇ ಮಾಡುತ್ತಾರೆ ಎಂಬ ಧೃಢ ವಿಶ್ವಾಸ ಜನತೆಯಲ್ಲಿದೆ! ಎಂ.ಪಿ.ಪ್ರಕಾಶ್ ರದ್ದು ಹಾಗಾಗಿರದಿದ್ದಲ್ಲಿ ತುಂಬಾ ಒಳ್ಳೆಯದು.

ಆದರೆ, ಒಂದು ವೇಳೆ ಪ್ರಕಾಶ್ ರದ್ದು ಡೋನ್ಗಿತನದ ಆಚರಣೆಯೇ ಆಗಿದ್ದರೂ ಕಾರಾಗೃಹದ ಕೈದಿಯ ಸ್ಥಾನದಲ್ಲಿ ಇರುವವರಿಗೆ ಅದರ ಉದ್ದೇಶದ ಅಗತ್ಯವಿಲ್ಲ. ಅವರಿಗೆ ದೊರಕಿದ ವಿಶೇಷ ವಾತಾವರಣ, ಸಂಗೀತದ ಕಾರ್ಯಕ್ರಮ ಮತ್ತು ಭೂರಿ ಭೋಜನ ಖಂಡಿತ ಅವರಿಗೆಲ್ಲ ಸಂತೋಷವನ್ನುಂಟುಮಾಡಿರುವುದರಲ್ಲಿ ಯಾವ ಅನುಮಾನವೂ ಇಲ್ಲ. ಈ ಎಲ್ಲಕ್ಕೂ ಕಾರಣಕರ್ತರಾದ ಪ್ರಕಾಶ್ ರವರಿಗೆ ನನ್ನ ಕೃತಜ್ಞತೆಗಳು.

ಈ ಘಟನೆಗಳು ಪ್ರಕಾಶ್ ರವರ ಸಹೋದ್ಯೋಗಿಗಳಿಗೆ ಅಸೂಯೆಯನ್ನು ಉಂಟುಮಾಡಿರಲೂ ಸಾಕು. ಸ್ವಾರ್ಥ ಲೋಕದಲ್ಲೇ ದಿನವೆಲ್ಲ ಕಳೆಯುವ ರಾಜಕೀಯ ವ್ಯಕ್ತಿಗಳಲ್ಲಿ ಪ್ರಕಾಶ್ ರವರು ವಿಭಿನ್ನ, ವಿಶೇಷ!

ಪ್ರಕಾಶ್ ರವರ ಈ ಸೃಜನಶೀಲ ವ್ಯಕ್ತಿತ್ವದ ಹಿಂದೆ ಇನ್ನು ಹೆಚ್ಚಿನ ಪ್ರಾಮಾಣಿಕತೆ ಅರಳಲಿ. ಅವರ ವೈಚಾರಿಕತೆ ಹಾಗು ಬದ್ಧತೆಗಳು ಸಮಾಜಕ್ಕೆ ಅರ್ಪಿತವಾಗಲಿ.

ಅಂದ ಹಾಗೆ, ಪ್ರಕಾಶ್ ರವರಿಗೆ ಹುಟ್ಟುಹಬ್ಬದ ಶುಭಾಶಯಗಳು.

ಸಂಸ್ಕೃತದ ಜ್ಞಾನ ಎಲ್ಲ ವರ್ಗಗಳಿಗೂ ಲಭಿಸುವಂತಾಗಲಿ

2009-07-15T08:29:00.004+05:30

ಬೆಂಗಳೂರಿನಲ್ಲಿ ನಡೆದ ೫ನೆ ಸಾಹಿತ್ಯ ಸಮ್ಮೇಳನದ ಸಮಾರೋಪ ಸಮಾರಂಭ 'ಸಂಸ್ಕೃತ ವಿವಿ ಬೇಡ' ಎನ್ನುವ ಕುರಿತಾದ ಕಾಮಿಡಿಗಳನ್ನು ಮಾಡಲಿಕ್ಕೆ ಮೀಸಲಾದಂತಿತ್ತು!

ಕನ್ನಡ ಭಾಷೆಯ ಅಭಿವೃದ್ಧಿಗಾಗಿ ಏನು ಮಾಡಬೇಕು ಎಂದು ಚಿಂತಿಸುವುದನ್ನು ಬಿಟ್ಟು ನಕಾರಾತ್ಮಕ ಧೋರಣೆಯಡಿ ಸಂಸ್ಕೃತ ವಿವಿ ಬೇಡ ಅಂತ ಹೇಳಲಿಕ್ಕೆಂದು ಕೆಲ ಸಾಹಿತಿಗಳ ನಡುವೆ ಸ್ಪರ್ಧೆ ಏರ್ಪಟ್ಟಿರುವುದು ಸಾಹಿತಿಗಳ ಬೌದ್ಧಿಕ ಡೋಂಗಿತನದ ಪರಮಾವಧಿಯಾಗಿದೆ.

ಕಿ.ರಂ.ನಾಗರಾಜ್ ರವರು ತಮ್ಮನ್ನು ತಾವು ಏನೆಂದು ಬಿಂಬಿಸಲು ಪ್ರಯತ್ನಿಸುತ್ತಿದ್ದಾರೆ ಎಂಬುದನ್ನು ತಿಳಿಯಲಾಗಲಿಲ್ಲ. ಅವರೇ ಹೇಳಿದ ಹಾಗೆ ಭಾಷೆಯನ್ನು ತಿಳಿಯಲು ಪಂಡಿತರ ಅವಶ್ಯವಿರುವಂತಹ, ಸೀಮಿತ ವಲಯ ಮಾತ್ರ ಓದುತ್ತಿರುವಂತಹ ಅತ್ಯಂತ ಪ್ರಾಚೀನ ಭಾಷೆಯಾದ ಸಂಸ್ಕೃತವನ್ನು ಬರೇ ಉಳಿಸುವುದಕ್ಕಷ್ಟೇ ಅಲ್ಲದೆ ಸಮಾಜದ ಎಲ್ಲ ವಲಯ ಹಾಗು ವರ್ಗಗಳಿಗೂ ತಲುಪುವಂತೆ ಬೆಳೆಸಲು ಒಂದು ವಿಶ್ವವಿದ್ಯಾಲಯ ಅತ್ಯಂತ ಪುಉರಕ ಎಂದು ಒಬ್ಬ ಸಾಹಿತಿಗೆ ಅನಿಸದಿರುವುದೇ ಆಶ್ಚರ್ಯ! ಅಂಥಾದರಲ್ಲಿ ತಮ್ಮ ಅಸಮ್ಮತಿಯನ್ನು ಒಂದು ವೇದಿಕೆಯ ಮೇಲೆ ಹರಿಯಬಿಟ್ಟಿರುವುದು ಅವರಿಗೆ ಶೋಭೆಯೇ?

ನಮ್ಮ ದೇಶಕ್ಕೆ ಸಾಂಸ್ಕೃತಿಕ ಹಾಗು ಭಾಷಾ ಕ್ಷೇತ್ರದಲ್ಲಿ ಜಗತ್ತಿನಲ್ಲೇ ವಿಶೇಷ ಸ್ಥಾನವಿರುವುದರ ಹಿಂದೆ ಸಂಸ್ಕೃತದ ಪಾತ್ರ ಅತ್ಯಂತ ಹಿರಿದು ಎಂಬುದನ್ನು ಯಾರಾದರೂ ಅಲ್ಲಗೆಳೆಯಲು ಸಾಧ್ಯವೇ?

ನಾನು ಮತ್ತೂರಿನವ (ಸಂಸ್ಕೃತ ಗ್ರಾಮ ಎಂಬ ಹೆಸರೂ ಇದೆ) ಎಂದರೆ 'ನಿಮಗೆ ಸಂಸ್ಕೃತ ಬರುತ್ತೆ ಅಲ್ವಾ?' ಎಂದು ಕೇಳದವರೇ ಇಲ್ಲ! ಕೇಳಿ ಅವ್ಯಕ್ತ ಹೆಮ್ಮೆಯನ್ನು ಅನುಭವಿಸಿದವರೇ ಇಲ್ಲ! ಈ ಹೆಮ್ಮೆ ನನಗೆ ಸಂಸ್ಕೃತ ಬರುತ್ತೋ ಬರಲ್ವೋ ಎಂಬುದಕ್ಕಲ್ಲ. ಸಂಸ್ಕೃತಕ್ಕೆ ವಿಶೇಷ ಸ್ಥಾನ ನೀಡಿ, ಶಾಲಾ ಪಠ್ಯವನ್ನಾಗಿ ಮಾಡಿ, ಹೆಚ್ಚಾಗಿ ಬಳಸುವ ಗ್ರಾಮ ನಮ್ಮ ಭಾರತದಲ್ಲಿದೆ ಎಂಬ ಹೆಮ್ಮೆ ಅದು!

ಸಂಸ್ಕೃತ ವಿವಿಯ ಕಾರಣದಿಂದ ಆ ಭಾಷೆಯಲ್ಲಿ ಅನನ್ಯ ಜ್ಞಾನ ಭಂಡಾರ ಶ್ರೀಯುತ ನಾಗರಾಜ್ ರ ಸಮೇತ ಸಮಾಜದ ಎಲ್ಲ ವಲಯ ಹಾಗು ವರ್ಗಗಳಿಗೂ ಲಭಿಸುವಂತಾಗಲಿ.

ಪರಾಭವಗೊಂಡ ಬಿಜೆಪಿಗೆ ಇನ್ನಾದರೂ ಜ್ಞಾನೋದಯವಾದೀತೇ?

2009-05-24T13:03:00.004+05:30

ಅಂತೂ ಇಂತೂ ಚುನಾವಣೆಯ ಯುದ್ಧ ಮುಗಿದು, ಹೊಸ ವೇಷದಲ್ಲಿ ಹಳೆ ಸರ್ಕಾರ ಮತ್ತೊಮ್ಮೆ ಅಧಿಕಾರದ ಚುಕ್ಕಾಣಿ ಹಿಡಿದು ಆಡಳಿತಕ್ಕೆ ನಿಂತಿದೆ. 'ಸಂಪುಟ ರಚನೆ' ಎಂಬ ದೊಂಬರಾಟದಲ್ಲಿ ಮುಳುಗಿದೆ. ಪರಾಭವಗೊಂಡಿರುವ ಬಿಜೆಪಿಯಲ್ಲಂತೂ 'ಆತ್ಮಾವಲೋಕನ' ಎಂಬುದಡಿ ಮತ್ತದೇ ಕಾಲ ಹರಣದ ಹಾಗೂ ಕೆಸರೆರಚಾಟದ ಕಾರ್ಯಕ್ರಮ!

ಈ ಸಲದ ಚುನಾವಣೆ ರಾಜಕೀಯ ಪಕ್ಷಗಳಿಗೆ ಬುದ್ಧಿ ಕಲಿಸಿದೆಯೂ ಇಲ್ಲವೊ ಗೊತ್ತಿಲ್ಲ. ಆದರೆ ಮತದಾರನಿಗೆ 'ಬುದ್ಧಿ' ಕಲಿಸುವ 'ಬುದ್ಧಿ' ಬಂದಿದೆ ಎಂಬುದನ್ನ ಸಾಬೀತು ಮಾಡಿದೆ.

ಚುನಾವಣೆಯಲ್ಲಿ ಒಂದು ಪಕ್ಷ ಸೋತರೆ ಇದರರ್ಥ ಜನತೆಗೆ ಆ ಪಕ್ಷ ಬೇಕಾಗಿಲ್ಲ ಎಂಬುದಕ್ಕಿಂತ, ಆ ಪಕ್ಷ ತನ್ನ ಆಡಳಿತದಲ್ಲಿ ಜನತೆಗೆ ಮೋಸ ಮಾಡಿದೆ ಎಂದು ಕರೆದರೇನೇ ಹೆಚ್ಚು ಸಮಂಜಸ.

ಅತ್ಯಂತ ಹೆಚ್ಚಿನ ಸಾಮರ್ಥ್ಯ ಇದ್ದಂತಹ, ಹೆಚ್ಚಿನ ವಿದ್ಯಾವಂತರು (ಮತ ಹಾಕದವರು ಎಂದು ಓದಿಕೊಳ್ಳಬಹುದು) ಸಹಜವಾಗಿಯೇ ಅಪೇಕ್ಷೆ ಪಡುವಂತಹ, ಕಿಂಚಿತ್ತಾದರೂ ರಾಷ್ಟ್ರೀಯ ಬದ್ದತೆಯ ಧೋರಣೆ ಹೊಂದಿರುವ ಭಾರತೀಯ ಜನತಾ ಪಕ್ಷ ಮೊನ್ನೆಯ ಚುನಾವಣೆಯಲ್ಲಿ ನೆಲಕಚ್ಚಿದ್ದು ಆಶ್ಚರ್ಯವೋ? ಸಹಜವೋ? ಮೊನ್ನೆ ೨೩ ರ ವಿಜಯ ಕರ್ನಾಟಕದಲ್ಲಿ ಪತ್ರಕರ್ತ ಪ್ರತಾಪ್ ಸಿಂಹ ಮೇಲಿನ ಪ್ರಶ್ನೆಗೆ ಉತ್ತರ ಹುಡುಕುವ ಪ್ರಯತ್ನ ಮಾಡಿದ್ದಾರೆ. ಓದಿದವನಾವನೂ ಒಪ್ಪದಿರಲು ಸಾಧ್ಯವಿಲ್ಲ. ಯಾವ ಬಿಜೆಪಿಯವನೂ ಓದಿರಲಿಕ್ಕೂ ಇಲ್ಲ!

ನನ್ನ ಪ್ರಶ್ನೆಯೇನಂದರೆ, ಮಾಧ್ಯಮದವರನ್ನು ಸರಿಯಾಗಿ ಬಳಸಿಕೊಳ್ಳಲು ಬಾರದ, ರಾಷ್ಟ್ರೀಯ ಸುದ್ಧಿವಾಹಿನಿಗಳ ಜತೆಗೆ ಉತ್ತಮ ಸಂಬಂಧವಿರಿಸಿಕೊಳ್ಳಲು ಬಾರದ ಒಂದು ಪಕ್ಷವನ್ನ'ರಾಷ್ಟ್ರೀಯ ಪಕ್ಷ' ಎಂದು ಕೆರಯಬಹುದಾ? ಅಂತ!

ಭಯೋತ್ಪಾದನೆಯಂಥ ಅತಿ ಮುಖ್ಯವಾದ ಹಾಗೂ ಮಹತ್ವವಾದ ವಿಷಯವನ್ನೇ ಚುನಾವಣೆಯಲ್ಲಿ ಸರಿಯಾಗಿ ಬಳಸಿಕೊಳ್ಳಲು ಸಾಧ್ಯವಾಗದ ಬಿಜೆಪಿಗೆ ಇನ್ಯಾವ ವಿಷಯವನ್ನು ಬಳಸಿಕೊಳ್ಳಲು ಆಗುತ್ತದೆ? ತಾನು ಮಾತ್ರ ಸಮಗ್ರ ಭಾರತದ ಕಲ್ಪನೆಯನ್ನಿಟ್ಟುಕೊಂಡು ಅದನ್ನು ಜನತೆಗೆ ನೀಡುವಲ್ಲಿ ಶಕ್ತರಾಗದ ಬಿಜೆಪಿ ಹೇಗೆ ತಾನೇ ಗೆಲುವಿನ ಕನಸು ಕಂಡಿತು? ಶಿಸ್ತಿಗೆ ಹೆಸರಾಗಿದ್ದಂತಹ ಪಕ್ಷ ಅದನ್ನೇ ಕಳೆದುಕೊಳ್ಳುವತ್ತ ಸಾಗಿರುವಾಗ ತನ್ನ ಸ್ಥಾನವನ್ನು ಹೇಗೆ ತಾನೇ ಭದ್ರಪಡಿಸಿಕೊಂಡೀತು? ಬಿಜೆಪಿಗೆ ನೀಡುವ ಬೆಂಬಲವನ್ನು 'ದೇಶದ ಕೆಲಸ' ಎಂದೇ ನಂಬಿರುವ ಲಕ್ಷಾಂತರ ಪ್ರಜೆಗಳಲ್ಲಿ ಯಾವ ನಂಬಿಕೆಯನ್ನುಳಿಸಿದೆ ಬಿಜೆಪಿ? ಮತದಾನ ಮಾಡದ ವಿದ್ಯಾವಂತರನ್ನ ಆಕರ್ಷಿಸಲು ಅಸಮರ್ಥರಾದ ಬಿಜೆಪಿಗೆ ಜ್ಞಾನೋದಯ ಯಾವಾಗ?

ಇನ್ನಾದರೂ ಭಾರತೀಯ ಜನತಾ ಪಕ್ಷ ಎಚ್ಚೆತ್ತುಕೊಳ್ಳದಿದ್ದರೆ ದೇಶಕ್ಕೂ ನಷ್ಟ, ಜನತೆಗೂ ದ್ರೋಹ, ಪಕ್ಷದ ಅಸ್ತಿತ್ವಕ್ಕೂ ಧಕ್ಕೆ, ಪ್ರತಾಪ್ ಸಿಂಹ ಹೇಳಿದ ಹಾಗೆ, ೨೦೧೪ ರ ಚುನಾವಣೆಯ ನಂತರವೂ 'ಆತ್ಮಾವಲೋಕನ' ದ ಬಿಜೆಪಿಗೆ ಕಟ್ಟಿಟ್ಟ ಬುತ್ತಿ!

ಮತಚಲಾವಣೆ ಮಾಡದಿರುವವರನ್ನು ಕೇಳುವವರಾರು?

2009-04-27T01:24:00.003+05:30

ರಾಜಕಾರಣಿಗಳ ಭ್ರಷ್ಟತೆಯ ಬಗ್ಗೆ, ಅವರ ನಡವಳಿಕೆಯ ಬಗ್ಗೆ, ಅವರ ಕಾರ್ಯಗಳ ಬಗ್ಗೆ, ಅವರು ಲೂಟಿಗೈದ ರಾಷ್ಟ್ರದ ಹಣದ ಬಗ್ಗೆ, ಅವರ ವೈಯಕ್ತಿಕ ವಿಷಯಗಳ ಬಗೆಗೂ ಮಾತನಾಡುವುದು ಸುಲಭ, ಸರಿ ಹಾಗು ಅವಶ್ಯ ಎನ್ನುವವರೂ ಇದ್ದಾರೆ. ಏಕೆಂದರೆ ಸಾರ್ವಜನಿಕ ಜೀವನ(!)ದಲ್ಲಿರುವವರ ಅದರಲ್ಲೂ ಜನಪ್ರತಿನಿಧಿಗಳ ಬಗ್ಗೆ ಮಾತನಾಡುವ ಹಾಗೂ ಪ್ರಶ್ನಿಸುವ ಹಕ್ಕು ಪ್ರಜೆಗಳಿಗಿರುವುದು ನಿಜ.

ಆದರೆ, ಈ ದೇಶದ ಪ್ರತಿಯೊಬ್ಬ ಪ್ರಜೆಯ ಮುಖ್ಯ ಕರ್ತವ್ಯವಾದ ಮತಚಲಾವಣೆಯೊಂದಿಗೆ ಇರುವ ಕೊಳ್ಳೆಬಾಕರಲ್ಲೇ ಕಡಿಮೆ ಕೊಳ್ಳೆಹೊಡೆಯುವವರನ್ನ, ರಾಜ್ಯವನ್ನು ಲೂಟಿಮಾಡಿಕೊಂಡೆ ಅಲ್ಪ-ಸ್ವಲ್ಪ ರಾಜ್ಯದ ಕೆಲಸ ಮಾಡುವವರನ್ನ, ಇದ್ದುದರಲ್ಲೇ ಸ್ವಲ್ಪ ಉತ್ತಮ ಚಾರಿತ್ರ್ಯ ಹೊಂದಿದವರನ್ನ, ಇದ್ದುದರಲ್ಲೇ ರಾಜ್ಯದ-ರಾಷ್ಟ್ರದ ಕುರಿತಾಗಿ ಕಿಂಚಿತ್ ಕಾಳಜಿಯಿರುವವರನ್ನ ಆಯ್ಕೆ ಮಾಡುವ ಕಾರ್ಯದಲ್ಲಿ ಪಾಲ್ಗೊಳ್ಳದ ಪ್ರಜೆ(!)ಗಳನ್ನು ಪ್ರಶ್ನಿಸುವವರು ಯಾರು?

ಮತಚಲಾವಣೆಯ ಕುರಿತಾಗಿ ಹಲವರಿಗೆ ಅಸಡ್ಡೆಯ ಭಾವನೆಯಿರುವ ವಿಷಯದಲ್ಲಿ ಭ್ರಷ್ಟ, ಹೊಟ್ಟೆಬಾಕ ರಾಜಕಾರಣಿಗಳ ಪಾತ್ರ ಎಷ್ಟು ಹಿರಿದೋ, ಮತಚಲಾಯಿಸದ ಪ್ರಜ್ಞಾವಂತ ಪ್ರಜೆಗಳ ಪಾತ್ರವೂ ಅಷ್ಟೇ ಹಿರಿದು.

ಜಗತ್ತಿನ ಬೃಹತ್ ಪ್ರಜಾಪ್ರಭುತ್ವ ರಾಷ್ಟ್ರದಲ್ಲಿ ಮತದಾನ ಶೇ.೫೦ ರಿಂದ ಶೇ.೬೦ ಎನ್ನುವ ವಿಷಯ ಯಾರ ಮನಸ್ಸನ್ನೂ ಆವರಿಸಿದಿರುವವರ ಮಟ್ಟಿಗೆ ನಮ್ಮ ದೇಶದಲ್ಲಿ ಪ್ರಜೆಗಳ ಸಂಖ್ಯೆ ಹಾಗು ವ್ಯಕ್ತಿಗಳ ಸಂಖ್ಯೆಗಳ ನಡುವೆ ಸ್ಪರ್ಧೆ ಏರ್ಪಟ್ಟಿದೆ!

ಈ ರಾಷ್ಟ್ರ ಹಾಗು ಈ ರಾಷ್ಟ್ರದ ಪ್ರಜೆಗಳ ನಡುವೆ ಪವಿತ್ರವಾದ ಹಾಗು ಅಚಲವಾದ ಭಾವನಾತ್ಮಕ ಸಂಬಂಧ ಬೆಳೆಯುವುದು ಹಾಗು ಬೆಳೆಸುವುದೇ ಎಲ್ಲ ರಾಷ್ಟ್ರೀಯ ಸಮಸ್ಯೆಗಳಿಗೆ ಏಕಮೇವ ಪರಿಹಾರ ಎಂದು ಎಲ್ಲರಿಗೂ ಅರ್ಥವಾಗುವುದು ಯಾವಾಗ?

ರಾಜ್ಯ ರಾಜಕಾರಣ - ರಾಜ್ಯದ ಮಾನ ಹರಣ

2009-04-05T22:57:00.007+05:30

ಯಾವೊಬ್ಬ ರಾಜಕಾರಣಿಗಾದರೂ ನಾಚಿಕೆ-ಮಾನ-ಮರ್ಯಾದೆಗಳೇನಾದರೂ ಇದ್ದಿದ್ದರೆ ನಮ್ಮ ರಾಜ್ಯದಲ್ಲಿ ಇ ಮಟ್ಟದ ಹೊಲಸು ರಾಜಕಾರಣ ಇರುತ್ತಿರಲಿಲ್ಲ! ಇಂದಿದ್ದ ಪಕ್ಷದಲ್ಲಿ ನಾಳೆ ಇರುವುದಿಲ್ಲ! ಇದೂ ಒಂದು ಜೀವನವಾ? ಎಲ್ಲರಿಗೂ ಬಂಗಾರಪ್ಪನವರೇ ಆದರ್ಶವಾದರೆ ರಾಜ್ಯದ ಗತಿ?

ಭಾರತೀಯ ಜನತಾ ಪಕ್ಷ ಈ ಸಲ ಅಧಿಕಾರದ ಚುಕ್ಕಾಣಿ ಹಿಡಿಯುವ ಸಾಧ್ಯತೆ ಇದೆ ಎಂಬ ಕನಸು ಕಂಡವರೆಲ್ಲರೂ ತಮ್ಮ ಸಂಸಾರ ಸಮೇತ ಹೊರಟಿದ್ದೆ ಹರಟಿದ್ದು! ಒಂದು ಕಾಲದಲ್ಲಿ 'ಜಾತ್ಯಾತೀತವಾದ' ಎಂಬ ಜಾತೀವಾದದ ಬಗ್ಗೆ ಗಂಟೆಗಟ್ಟಲೆ ಭಾಷಣ ಬಿಗಿಯುತ್ತಿದ್ದ, ಬಿಜೆಪಿಯನ್ನ 'ಕೋಮುವಾದಿ' ಎಂದು ಬಣ್ಣಿಸುತ್ತಿದ್ದ 'ಸೆಕ್ಯುಲರ್ ಲೀಡರ್'ಗಳು ಈಗ ಅದೇ ಪಕ್ಷದ ಹಿಂದೆ ಅಧಿಕಾರದ ಜೊಲ್ಲು ಸುರಿಸುತ್ತ ಯಾವ ಅಳುಕೂ ಇಲ್ಲದೆ ಹೋಗುತ್ತಿದ್ದಾರೆ, ಛೆ! ಒಬ್ಬರಿಗಾದರೂ ನಿಯತ್ತು ಅನ್ನೋದು ಇದೆಯಾ?

'ರಾಷ್ಟ್ರೀಯ ಚಾರಿತ್ರ್ಯ'ವನ್ನು ತನ್ನ ಸಿದ್ಧಾಂತದ ಆಧಾರ ಎಂದೇ ಬಿಂಬಿಸಿರುವ ಬಿಜೆಪಿ ಕೂಡ, 'ರಾಷ್ಟ್ರೀಯತೆ'ಯನ್ನೇ ಅನುಮಾನದಿಂದ ನೋಡುವವರನ್ನೆಲ್ಲಾ ಆಲಿಂಗಿಸಿ, 'ಅಧಿಕಾರವೇ ತನ್ನ ಅನಿವಾರ್ಯತೆ' ಎಂಬ ಪರಿಸ್ಥಿತಿಯನ್ನು ನಿರ್ಮಾಣ ಮಾಡಿಕೊಂಡಿದೆ. ತನ್ನ ಸಿದ್ದಾಂತದ ಜತೆಗೆ ಪರೋಕ್ಷವಾಗಿ 'ರಾಜೀ' ಮಾಡಿಕೊಳ್ಳುವತ್ತ ಸಾಗಿದೆ.

ಪಕ್ಷಾತೀತ ಸ್ಥಾನಕ್ಕೆ 'ಪಕ್ಷ ನಿಷ್ಠ' ವ್ಯಕ್ತಿ!

2009-03-22T01:55:00.011+05:30

ಇಡೀ ದೇಶಕ್ಕೆ ದೇಶವೇ ಅನುಮಾನ ಪಡುತ್ತಿರುವ ನವೀನ್ ಚಾವ್ಲಾರವರನ್ನು ದೇಶದ ಅತ್ಯಂತ ಮುಖ್ಯವಾದ, ಸಂವಿಧಾನದ ಗೌರವಗಳನ್ನು ಎತ್ತಿ ಹಿಡಿಯುವ ಅತ್ಯಂತ ಜವಾಬ್ದಾರಿಯುತವಾದ ಹುದ್ದೆಯಾದಂತಹ 'ಮುಖ್ಯ ಚುನಾವಣಾ ಆಯುಕ್ತ'ರ ಸ್ಥಾನಕ್ಕೆ ಹಲವಾರು ಪ್ರತಿರೋಧಗಳ ಹಾಗು ಅದಕ್ಕಿಂತ ಹೆಚ್ಚಾಗಿ ಅವರ ವಿರುದ್ಧದ ಆಪಾದನೆಗಳ ನಡುವೆಯೂ ಅವರನ್ನೇ ಸುಉಚಿಸಿರುವುದು ಕಾಂಗ್ರೆಸ್ಸಿನ ಸ್ವಾರ್ಥ ರಾಜಕಾರಣಕ್ಕೆ ಉತ್ತಮ ನಿದರ್ಶನವಾಗಿದೆ.

ಯಾರು ಆಪಾದನೆ ಮಾಡಿದರೇನು? ಅವುಗಳನ್ನು ದೇಶದ ಮುಂದೆ ಸುಳ್ಳೆಂದು ಸಾಬೀತು ಪಡಿಸಿದ ನಂತರ ಅವರನ್ನು ಮುಖ್ಯ ಚುನಾವಣಾ ಆಯುಕ್ತರ ಸ್ಥಾನಕ್ಕೆ ಸೂಚಿಸುವುದು ಕೇಂದ್ರ ಸರ್ಕಾರದ ಕರ್ತವ್ಯ ಹಾಗು ತನ್ನ ಘನತೆಗೆ ತಕ್ಕ ಗೌರವ.

ನವೀನ್ ಚಾವ್ಲಾರವರು ಕಾಂಗ್ರೆಸ್ ಪಕ್ಷದ ಪರವಾಗಿ ವರ್ತಿಸುತ್ತಿರುವುದು ಹಾಗೂ ವರ್ತಿಸಿರುವುದಕ್ಕೆ ಹಲವಾರು ದಾಖಲೆಗಳು ಇರುವಾಗಲೂ, ಅವುಗಳ ಬಗೆಗೆ ಪತ್ರಿಕೆಗಳಲ್ಲಿ ಬಂದ ನಂತರವೂ, ಈ ವಿಷಯವಾಗಿ ಯಾವುದೇ ತನಿಖೆಗಳಿಲ್ಲದೆ ಕೇಂದ್ರ ಸರ್ಕಾರ ಅತ್ಯಂತ ರಾಜಾರೋಷವಾಗಿಯೇ 'ನವೀನ್ ಚಾವ್ಲಾರವರೆ ಮುಂದಿನ ಚುನಾವಣಾ ಆಯುಕ್ತ' ಎಂದು ಘೋಷಿಸಿರುವುದು ಭಾರತದ ಸಂವಿಧಾನಕ್ಕೆ ಮಾಡಿದ ಅಪಚಾರವಲ್ಲದೆ ಮತ್ತೇನು?

ಅತ್ಯಂತ ಜವಾಬ್ದಾರಿಯುತವಾಗಿ ಹಾಗೂ ಪಕ್ಷಾತೀತವಾಗಿ ಕೆಲಸ ನಿರ್ವಹಿಸಬೇಕಾದಂತಹ ನವೀನ್ ಚಾವ್ಲಾರವರು ಆಗಲೇ ಒಂದು ಪಕ್ಷದ ಪರವಾಗಿ ಕೆಲಸ ಮಾಡುತ್ತಿರುವುದು 'ದಾಖಲೆ'ಗಳಿಂದ ತೋರಿಸಲ್ಪಟ್ಟಿರುವುದು ದೇಶದ ಘನತೆಗೇ ಅಗೌರವ!

ಬರೇ ಕಾಂಗ್ರೆಸ್ ಪಕ್ಷಕ್ಕೆ ನಿಷ್ಠರಾಗಿದ್ದರು ಎಂಬ ಒಂದೇ ಕಾರಣಕ್ಕೆ ಪ್ರತಿಭಾ ಪಾಟೀಲ್ ಎಂಬವರು ರಾಷ್ಟ್ರಪತಿಯಾಗಿರುವಾಗ, ಹುದ್ದೆಗಳಲ್ಲಿ ಕುಖ್ಯಾತಿ ಪಡೆದರೂ ಬಡ್ತಿ ಪಡೆಯುವುದರಲ್ಲಿ ಆಶ್ಚರ್ಯವಿದೆಯಾ?

ಎಲ್ಲ ಮಾಧ್ಯಮದವರಿಗೆ ಬೇಕು ನೈತಿಕತೆ ಮತ್ತು ರಾಷ್ಟ್ರೀಯತೆ

2009-03-08T22:41:00.005+05:30

ರಾಷ್ಟ್ರೀಯ ಸುದ್ಧಿವಾಹಿನಿಗಳ ಬಹುತೇಕ ಚಂದಾದಾರರಿಗೆ ಹುತಾತ್ಮನಾದ ಉನ್ನಿಕೃಷ್ಣನ್ ಗೊತ್ತಿಲ್ಲದಿದ್ದರೂ 'ಪ್ರಮೋದ್ ಮುತಾಲಿಕ್ ' ಗೊತ್ತೇಯಿರುತ್ತಾರೆ. ಆ ಮಟ್ಟದಲ್ಲಿ ಸುದ್ದಿಯಾಗಿದ್ದಾರೆ, ರಾಷ್ಟ್ರೀಯ ಮಟ್ಟದಲ್ಲಿ ಪುಕ್ಕಟೆ ಪ್ರಚಾರ ಗಿಟ್ಟಿಸಿದ್ದಾರೆ ಪ್ರಮೋದ್ ಮುತಾಲಿಕ್!

ಮಂಗಳೂರಿನಲ್ಲಿ ಪಬ್ ದಾಳಿ ನಡೆಯುತ್ತಿದೆ ಎಂದು ತಿಳಿದ ಮರುಕ್ಷಣದಲ್ಲೇ ತಮ್ಮ ಸಕಲ ಸಿದ್ದತೆಗಳೊಂದಿಗೆ ಧಾವಿಸಿದ ಪತ್ರಕರ್ತರು, ಮಾಧ್ಯಮದವರು ತಮ್ಮ 'ಬಿಜೆಪಿ ವಿರೋಧೀ' ನಿಲುವಿನ ಸಮರ್ಥನೆಗೆ ಉತ್ತಮ ವಿಷಯ ಸಿಕ್ಕಿತು ಎಂಬ ವಿಕೃತ ಸಂತೋಷದಿಂದ ದಾಳಿಯನ್ನು ರಾಷ್ಟ್ರೀಯ ಸುದ್ದಿಯನ್ನಾಗಿಸಿದರು. ಮುತಾಲಿಕ್ ಗೆ ಅತ್ಯಂತ ಅಬ್ಬರದ ಪ್ರಚಾರ ನೀಡಿ ಅವರನ್ನು ರಾಷ್ಟ್ರಮಟ್ಟದಲ್ಲಿ ಸುದ್ದಿಯನ್ನಾಗಿಸಿದರು. ಹಾಗು ವಿವಾದವನ್ನು ಅಂತರರಾಷ್ಟ್ರೀಯ ಮಟ್ಟಕ್ಕೂ ತೆಗೆದುಕೊಂಡು ಹೋಗುವ ಅತ್ಯಂತ ಪ್ರಾಮಾಣಿಕ ಪ್ರಯತ್ನವನ್ನೂ ಮಾಡಿದರು!

ಈ ರೀತಿಯಲ್ಲಿ ನಮ್ಮ ದೇಶದ ಪತ್ರಿಕಾ ಹಾಗೂ ದೃಶ್ಯ ಮಾಧ್ಯಮಗಳು ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸುತ್ತಿದ್ದಾರೆ. ಕೇವಲ ಹತ್ತನೇ ತರಗತಿಯವರೆಗೆ ಓದಿದ ಸಾಮನ್ಯ ವಿದ್ಯಾರ್ಥಿಯೂ ಕೂಡ ಯಾವುದೇ ಪತ್ರಿಕೆಯನ್ನ ವಿಶೇಷವಾಗಿ ರಾಷ್ಟ್ರೀಯ ಮಟ್ಟದ ಪತ್ರಿಕೆಯನ್ನ ಓದಿದ ತಕ್ಷಣವೇ ಹೇಳಬಲ್ಲ, ಪತ್ರಿಕೆ ಯಾವ ಪಕ್ಷದ ಪ್ರತಿನಿಧಿ ಎಂದು!

ವರದಿ ನಿಡುವ ಮೊದಲು ತಾನು ನೀಡುವ ವರದಿ ಸಮಾಜಕ್ಕೆ ಹಿತಕಾರಿಯೋ ಅಲ್ಲವೋ ಎಂದು ಯೋಚಿಸುವ ಅಥವಾ ಪೂರ್ಣ ಸತ್ಯವನ್ನೇ ತನ್ನ ನಿಲುವಾಗಿಸಿಕೊಂಡ ಪ್ರಾಮಾಣಿಕ ಪತ್ರಕರ್ತರ ಅವಶ್ಯಕತೆ ಈ ಸಮಾಜಕ್ಕೆ ಖಂಡಿತ ಇದೆ. ತಾನು ಬರೆಯುವ ಲೇಖನದ ಹಿಂದೆ ಉತ್ತಮ ಸಮಾಜ ನಿರ್ಮಾಣದ ಉದ್ದೇಶವಿಲ್ಲದ ಪತ್ರಕರ್ತ ಹೇಗೆ ತಾನೇ ದೇಶದ ಆಸ್ತಿಯಾಗುತ್ತಾನೆ?

ತನ್ನ ವೃತ್ತಿಯಲ್ಲಿ ನೈತಿಕತೆ ಹಾಗೂ ಪ್ರಾಮಾಣಿಕ, ಉಜ್ವಲ ರಾಷ್ಟ್ರೀಯತೆಯ ಅಭಿವ್ಯಕ್ತಿಯಿಂದ ಮಾತ್ರ ಪತ್ರಕರ್ತರು ಸುಧ್ರುಢ ರಾಷ್ಟ್ರ ನಿರ್ಮಾಣದ ಮಹತ್ಕಾರ್ಯದಲ್ಲಿ ತಮ್ಮದೇ ಆದ ಕೊಡುಗೆಯನ್ನು ನೀಡಲು ಸಾಧ್ಯ.

ರಾಷ್ಟ್ರದ ಸತ್ಪ್ರಜೆಯಾಗದ ಹೊರತು ಸತ್ಪತ್ರಕರ್ತನಾಗಲು ಸಾಧ್ಯವಿಲ್ಲ.

'ವಿರಾಟ್ ಹಿಂದೂ ಸಮಾಜೋತ್ಸವ'ದ ಪರಿಣಾಮಗಳು.

2009-02-26T08:11:00.007+05:30

ಈ ಸಮಾಜದಲ್ಲಿ ಕೆಲವು ಜನ, ಸಣ್ಣ ಸಣ್ಣ ಗುಂಪುಗಳನ್ನು ಕಟ್ಟಿಕೊಂಡು, ಆ ಮುಖಾಂತರ ಕೆಲವು ವಿಚಾರಗಳನ್ನ, ಕೆಲವು ಸಂಘಟನೆಗಳನ್ನ ಹಾಗೂ ಕೆಲವು ಸಮುದಾಯಗಳನ್ನ ವಿರೋಧಿಸುವ ತಮ್ಮ ಜೀವನದ 'ಒನ್ ಪಾಯಿಂಟ್' ಕಾರ್ಯಕ್ರಮದಡಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಎರಡು ವರ್ಷಗಳ ಹಿಂದೆ, ಬಹುತೇಕ ರಾಜ್ಯದ ಎಲ್ಲ ತಾಲ್ಲೂಕು ಕೇಂದ್ರಗಳಲ್ಲೂ ಸಂಘಪರಿವಾರದ ಕಡೆಯಿಂದ ನಡೆದ 'ವಿರಾಟ್ ಹಿಂದೂ ಸಮಾಜೋತ್ಸವ'ದ ವಿರುದ್ಧವೂ ಅತ್ಯಂತ ಸಹಜವಾಗಿಯೇ ಕೆಲವು ಜನ ಪ್ರತಿಭಟನೆ ಮಾಡಿದ್ದುವು. ಆ ಮೂಲಕ ತಮ್ಮ 'ಪ್ರತಿಭಟನಾ ಹಕ್ಕ'ನ್ನು ಚಲಾಯಿಸಿದ್ದವು. ಆದರೆ ಇ ಕಾರ್ಯಕ್ರಮಗಳ ಕಾರಣದಿಂದ ಸಮಾಜದಲ್ಲುಂಟಾದ ಪರಿಣಾಮಗಳ ಕುರಿತು, ಯಾವ ಪ್ರತಿಭಟನಾಕಾರರಾಗಲೀ , ವಿಚಾರವಾದಿಗಲಾಗಲೀ ಚಿಂತನೆ ನಡೆಸುವ ಪ್ರಯತ್ನ ಮಾಡಲಿಲ್ಲ. ಸಮಾಜಕ್ಕೆ ಒಳಿತನ್ನು ಮಾಡುವ ಮನಸ್ಸಾಗಲೀ ಅಥವಾ ಒಳಿತು ಮಾಡುವವರ ಬಗೆಗೆ ಸಹ್ಯವಾಗಲೀ ಇದ್ದಂತಿಲ್ಲ!

ನಡೆದ ಎಲ್ಲ 'ಹಿಂದೂ ಸಮಾಜೋತ್ಸವ'ಗಳಲ್ಲಿ ಅತ್ಯಂತ ಮಹತ್ವದ ವಿಷಯವಾಗಿ ಅಸ್ಪೃಶ್ಯತೆಯನ್ನು ವಿರೋಧಿಸಲಾಯಿತು. ಸಮಾಜದಲ್ಲಿನ ನೂರಾರು ಮಠಾಧೀಷರನ್ನು ಒಂದೇ ವೇದಿಕೆಯಡಿ ಕರೆತಂದು, ಸಮಾಜದ ಎಲ್ಲ ಸಮುದಾಯಗಳಿಗೆ ಕರೆ ನೀಡಿಸಲಾಯಿತು. ಈ ಕಾರಣದಿಂದ 'ಹಿಂದೂ ಸಮಾಜ'ದ ಮೇಲೆ ನಂಬಿಕೆ ಇರುವ ಲಕ್ಷಾಂತರ ಮಂದಿಗೆ ಅಸ್ಪೃಶ್ಯತೆಯನ್ನು ದೂರಗೊಳಿಸುವ ಧೈರ್ಯ ಬಂತು. ಈ ಪರಿಣಾಮಗಳು ಸಾಕಷ್ಟು ಪ್ರಮಾಣದಲ್ಲಿ ಅಕ್ಷರಶಃ ಸಮಾಜದಲ್ಲಿ ಆಚರಣೆಗೆ ಬಂತು.

ಮೆಲ್ವರ್ಗವೆಂಬ ವರ್ಗಕ್ಕೆ ಸೇರಿದ ಯುವಕನೊಬ್ಬ ಬೆಂಗಳೂರಿನಲ್ಲಿ ಮನೆಯೊಂದನ್ನು ಬಾಡಿಗೆಗೆ ಹುಡುಕುತ್ತಿದ್ದ. ಆದರೆ ಸಿಗುತ್ತಿದ್ದ ಎಲ್ಲ ಮನೆಯಅ ಸುತ್ತ-ಮುತ್ತ ತನ್ನ ಸಮುದಾಯದವರಿಲ್ಲ ಎಂಬ ಒಂದೇ ಕಾರಣಕ್ಕೆ ಆ ಎಲ್ಲ ಮನೆಗಳನ್ನು ತಿರಸ್ಕರಿಸಿದ್ದ. ಆದರೆ, 'ವಿರಾಟ್ ಹಿಂದೂ ಸಮಾಜೋತ್ಸವ'ದ ನಂತರ ಅದೇ ಯುವಕ ತಾನೆ ಸ್ವಯಂ ಪ್ರೇರಿತನಾಗಿ ತಾನು ತಿರಸ್ಕರಿಸಿದ ಮನೆಗಳಲ್ಲೊಂದನ್ನು ಆಯ್ಕೆ ಮಾಡಿಕೊಂಡು ಜೀವನ ನಡೆಸುತ್ತಿದ್ದಾನೆ.

ಬೆಂಗಳೂರು ನಗರದ ಪ್ರಮುಖ ಬಡಾವಣೆಯೊಂದರಲ್ಲಿ ವೈದಿಕ ಪರಂಪರೆಯಲ್ಲಿ ಬೆಳೆದ ಕುಟುಂಬವೊಂದು ತಿಂಗಳಲ್ಲಿ ಒಮ್ಮೆ, ತಮ್ಮನ್ನು ಯಾರು ದಲಿತರು ಎಂದು ಕರೆದುಕೊಳ್ಳುತ್ತಾರೋ ಅವರಂತಹವರಲ್ಲಿ ಒಬ್ಬರನ್ನು ಮನೆಗೆ ಕರೆದು ಭೋಜನವನ್ನು ಉಣಬಡಿಸುವ ಸಂಪ್ರದಾಯವನ್ನು ಪ್ರಾರಂಭಿಸುವ ಮಟ್ಟಿಗೆ 'ವಿರಾಟ್ ಹಿಂದೂ ಸಮಾಜೋತ್ಸವ' ಪರಿಣಾಮ ನೀಡಿದೆ!

ನಮ್ಮೂರಿನಲ್ಲಿ 'ಶೂದ್ರರ ಬೀದಿ', 'ಹೊಲೆಯರ ಬೀದಿ' ಎಂದು ಕರೆಯುತ್ತಿದ್ದ ಶಾಲಾ-ಕಾಲೇಜಿನ ಮಕ್ಕಳು 'ವಿರಾಟ್ ಹಿಂದೂ ಸಮಾಜೋತ್ಸವ'ದ ನಂತರ ಅವೆಲ್ಲವನ್ನೂ 'ರೈತರ ಬೀದಿ' ಎನ್ನಲು ಪ್ರಾರಂಭಿಸಿದ್ದಾರೆ. ಅಕಸ್ಮಾತ್ ತಮ್ಮ ತಂದೆ-ತಾಯಿ ಬಾಯಿ ತಪ್ಪಿ ಹೇಳಿದರೂ ಮಕ್ಕಳು ಅವರಿಗೆ 'ಬುದ್ಧಿ' ಹೇಳುತ್ತಾರೆ!

ತಾನು ಕೆಳವರ್ಗಕ್ಕೆ ಸೇರಿದವ ಎಂಬ ಒಂದೇ ಕಾರಣಕ್ಕೆ ಬೇರೆ ಜನರ ಜತೆ ಬೆರೆಯದಿದ್ದ ಒಬ್ಬ ಪ್ರಾಥಮಿಕ ಶಾಲಾ ವಿದ್ಯಾರ್ಥಿ 'ವಿರಾಟ್ ಹಿಂದೂ ಸಮಾಜೋತ್ಸವ'ದ ನಂತರ ತನ್ನ ಕೀಳರಿಮೆಯನ್ನು ಬಿಟ್ಟು, ಎಲ್ಲರ ಜತೆ ಮುಕ್ತ ಮನಸ್ಸಿನಿಂದ ಬೆರೆತು ಆಟವಾಡುತ್ತಿದ್ದಾನೆ!

ಈ ಎಲ್ಲ ಸತ್ಪರಿಣಾಮಗಳನ್ನು ಮುಕ್ತ ಮನಸ್ಸಿನಿಂದ ಸ್ವಾಗತಿಸುವ ತಾಕತ್ತು, ಪ್ರಾಮಾಣಿಕತೆ, ಸಮಾಜದ ಬಗೆಗೆ ನಿಷ್ಥೆಯಂತಹ ಗುಣಗಳು ತಥಾಕಥಿತ ಬುದ್ಧಿಜೀವಿಗಳಿಗೆ, ಪ್ರಗತಿಪರರಿಗೆ, ವಿಚಾರವಾದಿಗಳಿಗೆ, ಜಾತ್ಯಾತೀತವಾದಿಗಳಿಗಿದೆಯೇ?

ಬಿಜೆಪಿಗೆ 'ವೈಯಕ್ತಿಕ ಚಾರಿತ್ರ್ಯ'ದ ಕೊರತೆ

2009-02-20T23:48:00.002+05:30

ದೇಶದ ಔನ್ನತ್ಯದ ಬಗೆಗೆ ಕಿಂಚಿತ್ತಾದರೂ ಕಳಕಳಿಯಿದ್ದರೆ, ದೇಶದ ಹಿತದೃಷ್ಟಿಯಿಂದ ಬಿಜೆಪಿಯ ಪ್ರತಿಯೊಬ್ಬ ಕಾರ್ಯಕರ್ತನೂ ತನ್ನ ವೈಯಕ್ತಿಕ ಚಾರಿತ್ರ್ಯದ ವಿಷಯದಲ್ಲಿ ಆತ್ಮಾವಲೋಕನ ಮಾಡಿಕೊಳ್ಳಬೇಕಾದ ಅನಿವಾರ್ಯತೆ ಇದೆ.

ಪ್ರಸ್ತುತ ರಾಜಕೀಯ ವ್ಯವಸ್ಥೆಯಲ್ಲಿ ಹಾಗು ಇರುವ ಹಲವಾರು ಪಕ್ಷಗಳಲ್ಲಿ, 'ರಾಷ್ಟ್ರೀಯ ಚಾರಿತ್ರ್ಯ'ದ ಕುರಿತಾಗಿ ಸಾಸಿವೆಕಾಳಿನಷ್ಟಾದರೂ ವಿಶ್ವಾಸ ಮೂಡಿಸಿರುವ ಬಿಜೆಪಿ, ದಕ್ಷಿಣ ಭಾರತದಲ್ಲಿ ಮೊದಲ ಬಾರಿಗೆ ಅಧಿಕಾರದ ಚುಕ್ಕಾಣಿ ಹಿಡಿಯಲು ಸಾಧ್ಯವಾಗಿದೆ. ಆದರೆ ಬಿಜೆಪಿ ತನ್ನ ಅಭ್ಯರ್ಥಿಗಳಲ್ಲಿ, ತನ್ನ ಕಾರ್ಯಕರ್ತರಲ್ಲಿ ಉತ್ತಮ ಚಾರಿತ್ರ್ಯ ನಿರ್ಮಾಣ ಮಾಡುವಲ್ಲಿ ವಿಫಲವಾಗಿದೆ.

ಈಗಾಗಲೇ 'ದುಷ್ಶಾಸಕ' ಎಂದೇ ಪ್ರಸಿದ್ಧಿಯಾಗಿರುವ, ಶಾಸಕರ ಸ್ಥಾನಮಾನವನ್ನು ಮೂರು ಕಾಸಿಗೆ ಹರಾಜು ಹಾಕಿರುವ, ಬಿಜೆಪಿ ಶಾಸಕ ಸಂಪಂಗಿಯ ಹಗರಣ, ಸಮಾಜದಲ್ಲಿ ಶಾಸಕರಾದಿಯಾಗಿ ಪ್ರತಿಯೊಬ್ಬ ಮತದಾರನಿಗೂ ಎಚ್ಚರಿಕೆಯ ಸೂಚನೆ ನೀಡಿದೆ.

ಈ ಹಗರಣದಿಂದ ಪಾಠ ಕಲಿತು, ತುತ್ತತುದಿಯ ಕಾರ್ಯಕರ್ತನಿಂದ ಹಿಡಿದು ಪ್ರತಿಯೊಬ್ಬ ಅಧಿಕಾರಸ್ಥರವರೆಗಿನ ಎಲ್ಲರಲ್ಲೂ ಉತ್ತಮ 'ವೈಯಕ್ತಿಕ ಚಾರಿತ್ರ್ಯ'ದ ನಿರ್ಮಾಣಕ್ಕೆ ಪ್ರಥಮ ಆದ್ಯತೆ ನೀಡಿ ಹಾಗು ಆ ನಂತರ ಉತ್ತಮ 'ರಾಷ್ಟ್ರೀಯ ಚಾರಿತ್ರ್ಯ'ದ ನಿರ್ಮಾಣದ ಮುಖಾಂತರ, ಬಿಜೆಪಿ ಹಾಗು ಇತರ ಎಲ್ಲ ಪಕ್ಷಗಳೂ ತಮ್ಮ ಬಲವರ್ಧನೆಯ ಕಾರ್ಯದಲ್ಲಿ ತೊಡಗಬೇಕು. ಆಗ ಮಾತ್ರ ಪ್ರತಿಯೊಬ್ಬ ರಾಜಕೀಯ ವ್ಯಕಿಯೂ ಭವ್ಯ ಭಾರತದ ನಿರ್ಮಾಣದಲ್ಲಿ ತನ್ನದೇ ಆದ ಕೊಡುಗೆಯನ್ನು ನೀಡಲು ಸಾಧ್ಯ.

ಉತ್ತಮ 'ವೈಯಕ್ತಿಕ ಚಾರಿತ್ರ್ಯ'ದ ಅನುಪಸ್ಥಿತಿಯಲ್ಲಿ 'ರಾಷ್ಟ್ರೀಯ ಚಾರಿತ್ರ್ಯ' ಪೂರ್ಣ ಸದುದ್ದೇಶದಿಂದ ಕೂಡಿರುವುದಿಲ್ಲ.

ನರೇಂದ್ರ ಮೋದಿಯಂತಹ ವ್ಯಕ್ತಿ ಬಿಜೆಪಿಗೇ ಆದರ್ಶವಾಗಲಿಲ್ಲವಲ್ಲ!

2009-02-11T07:59:00.001+05:30

ದೇಶದ ಅತ್ಯುತ್ತಮ ಮುಖ್ಯಮಂತ್ರಿ ಎಂದು ತಮ್ಮ ವಿರೋಧಿ ಸಮೂಹದಿಂದಲೇ ಸೈ ಎನಿಸಿಕೊಂಡ ನರೇಂದ್ರ ಮೋದಿಯವರು ಬಿಜೆಪಿಯ ಮುಖ್ಯಮತ್ರಿಯಾಗಿದ್ದರೂ, ಅವರಲ್ಲಿರುವಂತಹ ರಾಜ್ಯದ ಅಭಿವೃದ್ಧಿಯ ಕುರಿತಾದ ಕನಸುಗಳು ಹಾಗು ಅವುಗಳನ್ನು ಆಚರಣೆಗೆ ತರುವಲ್ಲಿರುವನತಹ ನಿಷ್ಠೆ ದೇಶದ ಇನ್ಯಾವ ಮುಖ್ಯಮಂತ್ರಿಗೂ ಇಲ್ಲದಿರುವುದು, ಅದರಲ್ಲೂ ಯಾವ ಬಿಜೆಪಿಯ ಮುಖ್ಯಮಂತ್ರಿಗೂ ಇಲ್ಲದಿರುವುದು ದುರದೃಷ್ಟಕರ!

ರಾಜ್ಯದ ಅಭಿವೃದ್ಧಿಗೆ ನಿಮ್ಮ ಸರ್ಕಾರ ಏನು ಮಾಡಿದೆ, ಆಶ್ವಾಸನೆಗಳನ್ನು ಹೊರತುಪಡಿಸಿ ಎಂದು ಮೋದಿಯವರನ್ನು ಕೇಳಿದರೆ, ಕನಿಷ್ಠ ೪ ಗಂಟೆಗಳ ಕಾಲ ನಿರರ್ಗಳ ವರದಿಯನ್ನು ನೀಡುತ್ತಾರೆ, ಅಗತ್ಯ ದಾಖಲೆಗಳ ಸಮೇತ. ಆದರೆ ಇನ್ಯಾವುದೇ ಬಿಜೆಪಿಯ ಮುಖ್ಯಮಂತ್ರಿಗಳನ್ನೇ ಕೇಳಿದರೂ ಅರ್ಧ ಗಂಟೆ ದಾಟುವುದಿಲ್ಲ, ಆಶ್ವಾಸನೆಗಳ ಸಮೇತ!

ನರೇಂದ್ರ ಮೋದಿಯವರನ್ನು ಹೊರತುಪಡಿಸಿ ಉಳಿದೆಲ್ಲ ಮುಖ್ಯಮಂತ್ರಿಗಳು ಮುಂದಿನ ಚುನಾವಣೆಗಳನ್ನು ಮನದಲ್ಲಿರಿಸಿಕೊಂಡು ಜನಾಕರ್ಷಣೆಯ ಕಾರ್ಯಕ್ರಮಗಳಿಗೆ ಒತ್ತು ನಿದುತ್ತಿದ್ದಾರೆಯೇ ಹೊರತು, ಅಭಿವೃದ್ಧಿಯ ಕನಸೂ ಯಾರಿಗೂ ಇಲ್ಲ.

ನರೇಂದ್ರ ಮೋದಿಯವರ ಕಛೇರಿಯಲ್ಲಿ ವಿಲೇವಾರಿಯಾಗದ ಕಡತಗಳು ಇದ್ದರೆ, ಬೇರೆಡೆ ಓಡಾಡಲಾಗದ ರೀತಿಯಲ್ಲಿ ಬರೇ ವಿಲೇವಾರಿಯಾಗದ ಕಡತಗಳಿಂದಲೇ ಕಛೇರಿಗಳು ತುಂಬಿರುತ್ತದೆ.

ಹಿಂದಿನ ಸರ್ಕಾರ ಗಬ್ಬೆಬ್ಬಿಸಿ ಹೋದುದನ್ನು ಸರಿಪಡಿಸಿ ಅಭಿವೃದ್ಧಿಯ ದಿಕ್ಕಿನಲ್ಲಿ ಸಾಗುವುದು ಕೊಂಚ ಸಮಯ ಹಿಡಿಯುತ್ತಾದರೂ, ಬರೇ ರಾಜ್ಯವನ್ನಾಳುವ ದೃಷ್ಟಿಕೋನ ಬಿಟ್ಟು ರಾಜ್ಯದ ಅಭಿವೃದ್ಧಿಯೆಡೆಗಿನ ಬಗೆಗೆ ತಮ್ಮ ನಿಷ್ಥೆ ತೋರಿಸುವಲ್ಲಿ ಉಳಿದ ಎಲ್ಲರು ವಿಫಲರಾಗಿದ್ದಾರೆ. ಬರೇ ಎರಡು ಜತೆ ಜುಬ್ಬಾ-ಪೈಜಾಮಗಳನ್ನುಇಟ್ಟುಕೊಂಡು ಜೀವನ ಸಾಗಿಸುವ ಜಾರ್ಜ್ ಫರ್ನಾಂಡಿಸ್ ರವರು, ನಿಮಿಷಕ್ಕೆರಡು ಸೂಟುಗಳನ್ನು ತೊಟ್ಟು ಕ್ಯಾಮೆರಾಗಳಿಗೆ ಪೋಸು ಕೊಡುವ ಇನ್ಯಾವ ಎನ್ ಡಿಎ ಯ ಇತರರಿಗೆ ಆದರ್ಶವಾಗುವುದೇ ಇಲ್ಲ!